1 Thessalonians 2

Pol Masmas Ahi Veni Me-Tesalonaeka Keil Amul Arie Lati keke Demkatien One vi Anatin

Tuameitel ka ahinameitel keil, kami mikilea keke navong metvat ven kami, rovitei heisav. Vuo, heite teni mul. Mikilea keke navong metmai ven kami en out Tesalonaeka, metka en taon ten out Pilipae. Ekonek, amumoni tisa min komeitel ka aselus kutut kat komeitel. Ka navong metmai ven kami, avaseini meatin sav keil avit avapurun komeitel, Ahi orer san keihoen min komeitel keke metvahiteni min kami more longlongien koa ka ven kei. Navong metpeah kami keke mihehiles moulien onami, selusien onomeitel kur heite, veni rokatei en rendemien koa romaltei vuo en sakien tai koa kalkali. Anatin, metroselustei keke metvaluvos etai meatin. Vuo, lises metselus suval koa Ahi envat komeitel metvaselus eni, veni kei ling desien onen en komeitel keke metkilea metvahiten more longlongien onen vaha min meatin keil. Sakini, navong metselus, metromumontei keke meatin keil avahasi keil ven komeitel. Vuo, metmumoni keke Ahi enges koa kilea en rendemien ka envatien vasi keil orer hesi kei veni. Mikilea revi keke navong metmai ven kami, metromaitei vatal min selusien koa kas valeh kami, vuo keke metvakur etai mane ran kami vatal selusien onomeitel. Ahi koa kilea en rendemien keil orer kilea keke asa koa metviteni vi anatin. Metromaitei keke kami vuo meatin sav keil koa mivi meatin enges mivamasmas komeitel. Avaseini komeitel metvi hetetamen keil onen Iesu Kristo koa avise komeitel en eiloheh, ka metkilea metvameng kat kami keke mivahouhou min komeitel ka mivasan tounah min komeitel, metromumontei vamukonek. Vuo, navong metro ral min kami, sakien onomeitel memerau enges suval mama tai koa mul lei kat revi titan keil. Ven envatien onomeitel en kami, metsi komeitel keke metvasan more longlongien koa ka ven Ahi min kami, ka metsi komeitel emun keke metvakataun kami en sise vasi koa metkilea metvoumoni. !Anatin, emeitelvat kami mok! Tuameitel ka ahinameitel keil, mihendem usil sakien onomeitel navong metro ral min kami, mukave metmum keih ka avetin onomeitel mue houlu. Meneai ka vongien, metmum keih en umen sav keil keke metvahotin uite teni keke methersantei umen koa meas min kami navong metviten more longlongien koa ka ven Ahi min kami.

10 Navong metro ral min kami koa mikul anatin en Iesu, milei kilea keke sakien onomeitel muto, mal revi, ka tounah tovuol avahotini vatisa en sakien onomai. Ka Ahi emun, koa kilea en tounah vasi, lei kilea eni. 11 Kami mikilea keke komeitel metmumoni tahos min tetai en kami suval etin tata tai mul lei kat revi titan keil. 12 Anatin, komeitel metsel kat kami, metkataun kami keil koa mivotini keih, ka metpeah kami mivoual en sakien keil koa Ahi vasi veni. Metvis kami keke mihoumon sakien keil en moulien onami koa hetie lati keke mivinvin mivahi meatin keil onen. Veni Ahi vise kami mivahi meatin keil onen keke mivapil en hiasuvien ka hetetamenien onen.

13 Lises metmasmas Ahi ven tounah tamun navong metling kami en hisien onomai. Navong metkur selusien onen Ahi emai ven kami, miraengoni ka mikur kati mul en kami. Mirkurtei vasuval selusien onen meatin keil enges. Vuo, kami mikur kati suval vi selusien onen Ahi kati. Anatin, kei vi selusien onen ka mul mum en kami vasi koa mikul anatin eni. 14 Tuameitel ka ahinameitel keil, asa koa kistal en kami suval etin asa koa kistal en meatin keil onen Iesu Kristo koa amul en sios keil onen Ahi en provins ten out Sudea. Veni kami mun mikul anatin en selusien onen Ahi, ka sakini, me-Grik keil koa avi tuami keil asan mahien min kami suval koa Siu keil en out Sudea akuri en hen Siu keil, koa avi tue keil. 15 Ka Siu keil enek avi koakeil amu vini provet keil telamu, amu vini Asuv Iesu, ka alikat rasilin komai ran out vasi. Ven sakien one, amul aleh mahien ten vurohien onen Ahi emai en keil. Uvae kat meatin vasi, 16 ka asak visi mok avating koe komai mervarselustei min koakeil arvitei Siu usil mukave Ahi voutut keil ran tisaen one. En sise enek, keil asien tisaen keil one va vio ... Ahi lesi vinvin tuai. Sakini, mahien ten vurohien onen mul mita en keil.

Pol Envati Vasao en Me-Tesalonaeka Keil Avong Tamun

17 Tuameitel ka ahinameitel keil, navong meatin keil akeih kat komeitel, metlokovein kami ten avong havivis. Ka metlonge suval metvi timaru keil ka emeitelvati mok keke metvamai ris metvasao en kami. Ka avaseini avemeitel mul soutin ran kami, rendemien onomeitel mul ral min kami lises. 18 Anatin, emeitelvati metvamai ris ven kami ka Temat ring koe sise onomeitel. Inau, Pol, nasak visi maha ris ven kami avong houlu. 19 ?Metvit metvales kami eris vensa? Veni metvilelau en sien ven kami veni mivi heite ten umen onomeitel. Ka veni metmundesini keke metheilea methehati kerein komeitel ven kami en meten Iesu Kristo navong hemai ris. 20 !Anatin eli, demkatien onami mul sakin komeitel metvut komeitel ka metsi komeitel houlu mok!

Copyright information for `PMA