1 Thessalonians 4

Pol Sel Kat Keil Usil Vati Moulien Koa Ahi Si Veni

Tuameitel ka ahinameitel keil, navit mahit ekor en selusien onak. Komeitel metvisein kami tuai en sakien tetahos keil koa Ahi si mivousili, koa suval etin asa koa mimul mimumoni tuai. Ka kosa, metpeah kami li mok en isen Asuv Iesu keke mihoumoni hetahos tamun emau. Mihelong kat hihiseien keil koa metsani veni mikilea keke metmul metselus en isen Asuv Iesu.

Ahi envati mok vasakin kami mivahi votut ka mihermatiltei hetal min koakeil mirretelihetei veah vatal min keil. Tetai en kami helei kat revi sakien keil koa kei mul mumoni ral min aven keke vatolas ka vasakin meatin keil avahouhou mini. Namaentei envatien ten aven naleh rendemien onen keke noum natisa natal meatin sav nasuval koakeil arvitei Siu koa areingeingen Ahi amul amumoni. Sakini, tovuol en kami houmoni hetisa min tunali vuo ahinali tai koa vi kristin. Suval koa metviteni min kami tuai ka metsel kat kami eni keih, Asuv Iesu hesa kes mahien min koakeil umon vati saktisaen keil ekek. Veni Ahi rovisetei ir rovoumon saktisaen keil. Vuo, kei envat ir rovahi votut ka rovoumon sakien keil koa muto. Sakini, navong meatin etai sesein hihiseien keil enek, roseseintei meatin tai. Vuo, kei mul sesein Ahi varei koa san Ninin Votut onen min kami.

Kami mikilea tuai en sakien koa emihehathat tuomi ka ahinemi keil veni Ahi visein kami eni tuai. Sakini, methermutistei mun usili hehat min kami. 10 Anatin eli, kami mimul mumoni tuai min tuomi ka ahinemi keil vasi koa avi kristin koa amul en provins keisom ten out Masedonia. Ka kami koa envatien onomeitel mul en kami, komeitel metpeah kami keke mihoumoni hekeih tamun.

11 Metpeah kami keke miheling rendemien onami hekeih en sakien keitel ekek: miheto en tomat hetal min meatin sav keil; minasantei vulingasumi nahatei neim en moulien onen meatin sav keil; ka mihoum hekeih en umen onami keke mivalei kat revi onami keil. Tounah keitel enek suval asa koa metviteni tuai navong metro ral min kami mulamu. 12 En sise enek, kami minahiramtei en mesav keil keke avamai avakataun kami, ka koakeil arkultei anatin en Ahi ihouhou min kami ka ilei kilea sakien tetahos onami.

Pol Vit Luvat Asa koa Hekistal Navong Asuv Iesu Hemai Ris Eni

13 Tuameitel ka ahinameitel keil, emeitelvati keke mivailea anatinien usil asa koa hekistal en koakeil umat tuai koa aling desien one en Iesu. Emeitelrovattei keke mivalonge vatisa vasuval koakeil desien one tovuol, koa arkultei anatin en mearisien. 14 Ir rokilea keke Iesu mat ka mea ris ran matien. Sakini, rokul anatin keke navong Iesu hemai ris eni, Ahi hesakin koakeil umat tuai koa aling desien one eni, keil emun imai ris hetal mini. 15 Asa koa metmul metvisein kami eni en avong enek vi hihiseien onen Asuv Iesu varei. Kei viteni keke ir koa romoul veah en avong koa kei hemai ris eni, rosakras rovahina valamu en koakeil umat tuai. 16 Vuo, tounah keil enek hekistal. Asuv Iesu varei hemita ran out nesa ka hemakul en rea takeih. Ka en avong etin enek, vativar onen angelo keil heselus hekeih ka tai en angelo keil houh amaru onen Ahi. Hevus, koakeil umat tuai koa aling desien one en Iesu Kristo, keil imea ran matien helamu. 17 Hevus, ir koa romoul veah en avong enek, rehehina out hetas en mahmah keil keke rovahisu min Asuv Iesu en teilang. Ka en avong koanek heha, reheto hetal mini lises. 18 Sakini, mihehati lat rendemien onami hetal min selusien keil ekek.

Copyright information for `PMA