1 Thessalonians 5

Pol Sel Kat Kristin Keil keke Isak Mesen Moulien One Ven Amairisien Onen Iesu Kristo

Tuameitel ka ahinameitel keil, methermutistei mun hehat min kami usil avong keil koa tounah keil enek ikur out, veni kami mikilea revi keke Avong ten Amairisien onen Asuv Iesu hesakin meatin keil iti manin eni hesuval amuti manin en tarhena tai koa mai en vongien. Anatin, en avong enek, meatin keil il ihiteni ihit, “Tomat mul en out vasi ka roro en tahosien.” !Ka hatte hetas, keil iti manin ka Ahi hesan mari mahien hesut keil. Anatin, keil isakras ilohosai rani hesuval ahin tai sakras valohosai ran mahien keil koa emai eni navong vakur tivava. Ka kami, tuameitel ka ahinameitel keil, mirrotei en mankoli. Mikilea en asa koa hemai hekistal. Sakini, kami miherti manintei en avong enek hesuval navong tarhena tai hemai. Veni kami vasi mivi meatin keil koa mimumon sakien tetahos suval mimual en meneai. Ir rorvitei meatin keil koa romum kalkali suval koakeil amual en mankoli ten vongien. Sakini, ronamatiltei nasuval meatin sav keil. Meter hele lises ka rehelei kat sakien keil orer keke housil rendemien tetahos keil. Vongien vi avong meatin keil amul amatil. Vongien vi avong meatin keil amul amunmun. Ka veni ir rovi meatin keil ten meneai, sakien orer housil rendemien tetahos keil. En demkatien orer, ir rehoumoni hesuval koa rovi meatin tavaeen keil onen Iesu Kristo. Rehesin revi ir en demkatien ka envatien hesuval koa vi eisin ten vaeen koa mul koe veimaser. Ka desien keke Ahi houtut ir, rehesin eni hesuval tounah koa mul koe vatir. Rehoumoni hemukonek veni navong Ahi rie lat ir, rovitei keke rovakur mahien ten vurohien onen. Vuo, kei rie lat ir rovakur mututien koa ka en Iesu Kristo, Asuv orer. 10 Kei mat vinat ir keke rovato out vatas vatal mini navong hemai ris, avaseini ir romoul veah vuo romat tuai. 11 Sakini, mihehati lat rendemien onami ka mihekakataun kami, hesuval koa mimul mimumoni tuai.

Selkatien Ekor

12 Tuameitel ka ahinameitel keil, komeitel metpeah kami keke mihouhou revi mok min koakeil amul amum ven kami en isen Asuv Iesu, koa alosil kat kami ka aralimal en kami. 13 Mihouhou revi ven keil en sakien ten envatien ven umen koa amul amumoni. Ka miheto en tomat hetal min kami.

14 Tuameitel ka ahinameitel keil, metpeah kami keih emok keke mihesel kat tarmah keil, mihehati lat rendemien onen koakeil ametau, mihekataun koakeil amemerau en demkatien one, ka mihoumon rendemien onami hetaveah keke minavuroh kalahtei natal min meatin sav keil. 15 Mihelei kat revi keke tovuol en kami hesa kes tounah koa tisa min meatin tai koa mum tisa mini. Ka en avong vasi, mihesak visi keke mihoumon tounah koa tahos min kami ka min meatin sav keil.

16 Mihesi kami lises, 17 mihehikit hisien, 18 ka mihemasmas Ahi en tounah keil koa mul mai ven kami, avaseini atahos vuo atisa. Ahi envati mok keke mihoumon sakien keitel enek veni moulien onami mul kapil ral min Iesu Kristo.

19 Minating koetei umen keil onen Ninin Votut, 20 suval navong Ahi san selusien min meatin tai onen, minalong seseintei. 21 Tahos imok, mihelei rahit revi selusien vasi keil koa hemai: asa koa tahos, mihehuli kati, 22 ka asa koa tisa, miheseseini.

23 Mevisi keke Ahi koa san tomat minir hesakin kami mivahi votut vasi. Anatin, mevisi keke heting koe kami ran tisaen: heting koe moulien onami, rendemien onami ka ninin onami. Hemukonek, navong mihelomal en meten Ahi en avong koa Iesu Kristo hemai ris eni, tounah tovuol avahotini vatisa en sakien onami. 24 Mikilea mivaling desien onami en kei koa vise kami keke mivi onen veni kei kilea voumoni.

25 Tuameitel ka ahinameitel keil koa envatien onomeitel mul en kami, mihehis eli mun ven komeitel. 26 Mihehiten 'more' onomeitel heha min tuameitel ka ahinameitel keil en demkatien, ka miheav kat kami en envatien koa vi votut onen Ahi. 27 Inau, Pol, napeah kami ral min hetetamenien koa Asuv Iesu sani minau keke mihehuli leta koanik min kristin vasi keil keisom.

28 Metvisi keke more envatien onen Iesu Kristo, Asuv orer, heto hetal min kami.

Copyright information for `PMA