1 Timothy 1

Inau Pol keke namutis leta koanik. Navi eiloheh tai koa namum en isen Iesu Kristo. Ahi koa mutut ir ka Iesu Kristo koa desien orer mul ien, keilu luling nau umen enek.

More minuk Timoti, koa kosuval natkuli kati ven demkatien oralu vatte tas. Navisi keke more envatien, enmahisien ka tomat onen Ahi Tamer ka Iesu Kristo hel enuk.

Koakeil Hihiseien One vi Liluvosien

Timoti, ekvati kovato en out Efeses, suval koa naviteni tuai minuk navong nalinguk ekok ka nuva en out Masedonia. Meatin tei en out enek amul avihisein liluvosien keil usil sise ten demkatien, ka ekvati keke kihiteni min keil ihati keil. Kihiteni mun min keil itivilin mari tunien telamu keil usil avu onen Siu keil. Tunien keil eke romultei en hatkatien onen Ahi koa rokilea eni ral min demkatien enges. Tunien keil one amul amumon selkututien enges. Vatte ten selkatien onak vasakin kami emivahat kami en sakien ten tinahos, vatal rendemien koa mutolas, ka vatal min demkatien tai koa anatin. Meatin keil koa amusil sakien tetahos enek mulamu, ka kosa aviles eisile rani ka amul apurun avong one en vati selusien keil koa vi heisavos. Keil avit avi tiser ten mengkatien onen Ahi. Ka avaseini amang vas onge lises, arkileatei vati rendemien ten tounah koa amul aviteni.

Rokilea keke mengkatien keil onen Ahi, kei tahos imok navong rokilea vensa Ahi mumon keil. Reheilea keke mengkatien keil enek, Ahi romumontei keke avahisen meatin keil koa amusil sakien tetahos keil tuai. Vuo, Ahi mumoni keke meatin tatisa keil avalei kilea keke sakien one romaltei: amul arali vas hakot keil ka avi vatkeih keil; amumon tisaen keil ka armusiltei Ahi; arvouhoutei en Ahi ka moulien one mul soutin rani; amu vini meatin sav ka amu vini mama ka tata one emun; 10 amumon sakien tisa ral min ahin keil, ka meahos keil emun; akur suain meatin keil; amul aluvos meatin sav ka aliluvos en isen hanu sav; ka amumon tisaen tateisav keil koa teisav ran hihiseien onen Ahi. 11 Hihiseien keil onen Ahi musil more longlongien koa kei sani minau mahitehiteni min meatin keil. Longlongien enek vi moreite mok ka ka ven Ahi koa vi houlu vis houlu mok.

Pol Masmas Ahi ven More Envatien Onen

12 Nasan masmasien min Iesu Kristo, Asuv orer, veni kei ling desien enau keke moum veni, ka san keihoen minau keke nakilea moumoni. 13 Mulamu naselus tisa en kei, namumoni keih en koakeil amusili ka navi vati karien. Mukos, Ahi enmahis nau ven demkatien onak en Iesu tovuol ka nareingeingen keke namum tisa. 14 Ka Iesu Kristo, Asuv orer, rie lat more envatien onen enau koa mariso mok, ka sakinau nakilea maling demkatien ka envatien onak eni. 15 Nihiten tounah eke vi anatin, kikur kati hel enuk keke: 'Iesu Kristo mai en out netan voutut meatin tisa keil.' Ka inau, natisa mok en keil. 16 Ka mukos, Ahi enmahis nau ka rolingtei hakot enau. En sakien enek, Iesu Kristo rie lat more rendemien onen koa taveah minau. En sise enek, koakeil iling demkatien one eni ka ikur moulien hau ikatau enau, keil ilei kilea tahosien onen Iesu ven asa mumoni en moulien onak. 17 !Anatin eli! !Rehehou lat isen Ahi! !Kei vi Asuv Houlu ten lises! Rosakras rovalesi ka kei mul vatte tas, sakras vamat. !Tahos imok rehesan houhouen ka masmasien mini! !Anatin!

Pol Sel Kat Timoti Keke Hehati Hekeih

18 Timoti, natkuli, nasan selkatien koanik minuk koa musil selusien koa kistal ran Ahi usiluk navong aling he enuk mulamu. Munak kindem kat selusien koanik ka kusili, kihi more meatin tavaeen onen Ahi koa mul mum keih en usite onen. 19 Ka navong kumoni, lises kihuli kat demkatien onom hekeih ka kumoni en sakien koa kokilea kovit mal. Meatin koan armumontei asa koa akilea mal, ka apurun demkatien one. Asuval vatihos tisa ten sip koa kilea en sise koa mal ka romusiltei. Sakini, sip onen marindo ka moulien onen vuol. 20 Meatin elu koa lumukonek, tai vi Haemeneas ka tamun vi Aleksanda. Sakini, nasil lat keilu ranir keke luvakur mahien onealu en hen Temat. Koanek hesakini luhehat sakien onealu ka luhervihiseintei mun liluvosien usil Ahi.

Copyright information for `PMA