1 Timothy 4

Pol Selus Usil Tiser Keil Taliluvosien

Ninin Votut vit kilea keke en Avong Ekor, meatin houlu ilokovein demkatien one. Keil imaen ninin tisa keil iluvos keil ka usil hihiseien one. Vati hihiseien koa mukonek ka ven meatin keil taliluvosien koa amutolas enges en hilive, ka armusiltei mun anatinien. Sakini, arkileatei mun asa koa tahos ka asa tisa. Meatin keil amukonek, asel kat meatin keil avit anatetalihetei. Ka asel kat keil emun avit anien koan rotahostei taanian. Ka Ahi mumon anien keil vasi atahos, sakini rokilea rovani en rendemien ten masmasien. Anien vasi keil atahos minir koa romusil Ahi ka rokilea anatinien onen. Tounah vasi keil Ahi mumoni tahos, tounah tovuol rovaso seseini. Veni munak rehekuri hetal min hisien ten masmasien, rorie lati keke aka ven Ahi ka kei viteni tuai en selusien onen vit atahos.
4:5 Senesis 1:31; 2:18; 9:3


Pol Sel Kat Timoti Keke Vahi More Eisisil Onen Iesu Kristo

Munak kisan hihiseien keilek min koakeil amusil kat Iesu, keik kihi more eisisil tai onen. En hati avong enek, keik emun kimoul hemarite en demkatien onom en Iesu hetal min selusien onen Ahi. Kimoul emun hetal min hihiseien ten anatinien koa komusili tuai tuetin. Keik, kimea ran koakeil arun lises usil tunien telamu onen Siu keil, koa sakras voumon more tounah en moulien onen meatin keil. !Vuo! Keik, kiles kisak mesenuk lises keke kusil sakien keil koa kilea hesakin moulien onom hemal en meten Ahi. Mahiten selusien tai minuk: Navong kosak mesenuk ven kosaksakit vasakin avem vakeih, koanek tahos. Ka tahos imok kosak mesenuk kumon sakien keil koa houmonuk kimal en meten Ahi. Veni sakien keil enek kilea mumon moulien onom hetahos imok en avong koro netan, ka en avong kiha en out nesa. Selusien koanek anatin ka tahos meatin keil ikur vasi ka indem kati. 10 Anatin, ven koanek, romum keih keke rovousil sakien keil koa atahos. Rokilea rovoumoni veni roling desien orer en Ahi koa moul. Kei vi Ahi ten mututien onen meatin keil, onen koakeil aling demkatien one en Iesu.

11 Hihiseien keil eke koa namutisi, kihihiseini min koakeil kolei kat keil keke avalong kati. 12 Konamaentei meatin keil analei vinik ven kovi meatin hau tai. !Vuo! Kihi metai tai en sakien keil onom en meten koakeil akur demkatien: en selusien onom ka en ualien onom; en envatien onom en meatin sav keil; ka en demkatien onom. Moulien onom hetolas en tounah vasi. 13 Hetokol avong nimai, san avong onom ten sakien keitel ekek: kihuli selusien ten Tus Votut min meatin keil, kihit kilea aneite teni navong kosan selusien onen Ahi min keil, ka kihisein keil en sakien koa akilea avousili. 14 Kum hetal min sanien koa Ahi lingi en moulien onom, konasehtei eni. Kindem kati keke Ahi lingi enuk navong provet keil aselus ka elda keil aling he enuk. 15 Kiles kumon tounah keitel enek ka kisan keik eni, hesakin meatin vasi keil ilei kilea ualien onom tahos imok. 16 Kilosil kat revin moulien onom ka kilosil kat revin hihiseien onom emun. Kiles kumon tounah keil enek, veni munak kiles kumoni, Ahi houtut moulien onom ka houtut koakeil araengon hihiseien keil onom ka ilong kati.

Copyright information for `PMA