a5:4 Exo 20:12

1 Timothy 5

Meatin Onen Ahi Keil Um Vituai Suval Avi Vatiamal Tas

Timoti, munak ulmatu tai mumon tounah tisa, konavul kattei. !Vuo! Kiselus revi min keil hesuval koa avi tata onom. Ka en sakien enek, meatin hau keil, kumoni min keil hesuval avi tumali keil. Tovuli keil, kihise revi keil hesuval avi mama onom keil. Ka atouli keil, konandemtei natisa en keil, kumoni min keil isuval avi tumahin keil.

Hemukave Mihelei Kat Vatina Keil

Kihiteni min meatin keil ilei kat revin vatina keil koa meatin tovuol valei kat keil. Ka munak vatina tai, titan vuo havinali keil amul, keil etin ilei kati mau hesuval Ahi mul viteni. a  Hemukonek, asa kes lei katien koa tetahos mini veni Ahi si ven sakien enek. Vatina koa meatin tovuol valei kati, kei ling desien onen en Ahi enges, ka mules visi en vongien ka meneai keke Ahi val vakatauni. Ka vatina tai koa san kei en sakien tisa keil ten out netan, minalei kattei. Heisavos kei moul, mul musil sise ten matien. Hihiseien keil ekek, kisani min meatin keil onen Ahi avousili. Hesakini, meatin hetovuol heselus hetisa en keil usil leikatien one en vatina keil. Ka munak tei en meatin keil irlei kat revitei vatina keil koa amul en vatiamal one, vuo koakeil aro en teim one, keil arie lati keke demkatien one vi liluvosien. Keil atisa mok en koakeil arkurtei anatinien en Ahi.

Vatina keil koa mihekataun keil, mihetis ise en tus tai taleikatien. Koakeil enek, sua one helin hanumau etel (60), ka mulamu, kei ro ral min ason enges. 10 Vatina keil enek, meatin keil alei kilea sakien tetahos one keke: mulamu, alei kat revin titiali one, akur revin meatin en teim se, ka akataun meatin sav keil koa amusil Ahi en sakien ten merauen. Navong ales meatin mul en avong takeih, asan kataunien mini. Ka tounah keil vasi tetahos, keil asan keil eni.

11 Vatina keil koa milei kat keil, keil amumon hatkatien keke isan revin moulien one min Iesu ka irretetalihetei mun. Hesakini, vatina keil koa armatu ramattei, minatistei ise naha en tus onami. Veni navong envatien keil one uas keil ka sakin avakur kes meatin, keil akilea avahilehiles eisile ran Iesu Kristo, ka itetalihe ris. 12 Mukonek, itali koteh hatkatien koa amumoni mulamu, ka ileh hakot onen Ahi hel en keil. 13 Ka tamun, keil ikur sakien ten silipeng ka iles ika vasi teim. Ka tisa mok, keil ihitehit usil ka iselus houlu usil tounah koa romaltei. 14 Sakini, tahos imok keke vatina hau keil itetalihe, ikur titae, ka ilosil kat teim se. Hemukonek, koakeil avit avaselus karen ir, asakras. 15 Koan en vatina keil enek alokovein sise koa mal onen Ahi tuai, ka amusil sise tatisa koa Temat envati keil avousili. 16 Munak ahin tai koa musil Ahi, ka vatina tai ro ral mini, kei helei kati suk. Nalingtei en hen elda keil ten sukul ka hesan umen sav keil koa meas min keil. Hesakini, elda keil enek akilea avalei kat vatina sav keil koa aro sase.

Timoti Hetie Sise min Metai Keil ten Sukul

17 Elda keil koa alei kat revin meatin keil amul en sukul, akilea avakur houhouen ka uite ten umen one veni keil amul amum keih aviten selusien onen Ahi ka amul avisein meatin keil. 18 Keil ikur uite ten umen one suval Tus Votut viteni vit,“Munak buluk esom mul mum venuk, konapar koetei ongon, kimaeni hean tei.”(Dut 25:4) Ka Tus Votut viteni mun vit,“Koakeil amum ikur uite teni.”(Luk 10:7)

19 Ka munak meatin tanges viten selusien tai koa vakat elda tai, konakalahtei konakur anatinien eni. Kitosini munak meatin elu vuo etel telmai, ka telselus usili vatte tas. 20 Elda keil koa amumon tisaen, kihit lat tisaen one en meten meatin keil onen Ahi. Hesakini, tateisav keil imetau avoumon tisaen.

21 En meten Ahi, meten Iesu Kristo ka meten angelo keil emun, naviteni keih minuk Timoti: navong elda tai mumon tisaen, kusil vasi asa koa naviteni minuk. Kumoni vatte tas en meatin vasi keil, heisavos munak kei vi time tahos minuk. 22 Konakalahtei konaling hem en meatin keke vakur umen onen Ahi, veni munak kei mot en tisaen, hesuval keik komaeni mumoni. Ka moulien onom hetolas, kirmottei en tisaen.

23 Ka hemukos, konamunteis oai, kimun etai hati uaen hesuval meresin hesakini vangom koa mah avong houlu hemai hetahos.

24 Anatin, konalei kantei meatin keil nakalah veni meatin koan, amumon tisaen en mesai, ka meatin vasi keil akilea arvinvintei keke avakur umen onen Ahi. Ka meatin koan, aling suain tisaen one ka meatin keil avotini katau suk. 25 En vati sakien enek, meatin koan, amumon sakien tetahos en mesai. Ka koan, asa tahos amumoni, meatin sav keil arlei kileatei. Sakien onen koakeil vasi enek hemai hekikistal, sakras vato suai.

Copyright information for `PMA