2 Chronicles 33

Asuv Houlu Manase Viles Ran Sakien Tatisa Keil Onen ka San Moulien Onen Va Min Ahi

2 Kronikel 33:10-13,15-17,20

10 Ka avaseini Iahova sel kat Manase ral meatin keil onen, keil erovattei avalonge. 11 Sakini, Iahova maen avat keil tavaeen ten out Siria umai uvae ral me-Sudah keil ka amulin keil. Keil avuli kat asuv houlu Manase ka arili vas vulingasen en huk tai. Evus, keil apar kati ral sen koa vi brons ka amulamuni uva en mari taon one ten out Babilon.

12 En avong ten mahien onen, Manase lei kilea suk en sise onen ka mumon rendemien onen va netan. Kei mul peah Iahova ven kataunien, Ahi onen avu onen keil telamu. 13 Ka navong kei vis mini, Iahova long isien onen, enmahisi, ka san heite ten hisien onen mini. Ahi maeni va ris Serusalem ka ling risi valosil kat meatin keil onen. Sakini Manase mundem kilea suk keke Iahova enges vi Ahi anatin.

15 Kei va en Eim Votut onen Iahova, ka kulat nana keil ral min ahor ten sanien onen ahi savsav keil koa kei ling keil ien. Evus, kei va lah lat ahor sav keil koa kei lingi en Vatihou Saeon ka hou savsav keil vesesal en out Serusalem. Navong kei mumoni evus, lah ruain keil ka revin keil uva soutin ran taon onen. 16 Evus, kei mum revi ahor votut onen Iahova ka munit tirendan keil vahi sanien votut ten lahruaien ral sanien votut keil ten masmasien vaha mini. Katau suk, kei meng kat meatin vasi keil ten out Sudah iha netan min Iahova koa vi Ahi onen me-Isrel keil. 17 Katau en avong enek, meatin keil amules avina en hoi hou keil keke avaha netan ka asan sanien votut keil one ien, ka amumoni va min Iahova enges.

20 Sua keil muli, asuv houlu Manase mat, ka uva arahini vesesal en mari eim omon. Evus, natnali Amon kur vulin mai vi asuv houlu.

Copyright information for `PMA