a1:5 Sion 15:18-21; 16:33
b1:8 Umen 19:23-41; 1 Korin 15:32
c1:10 2 Tim 4:18
d1:12 2 Kor 2:17
e1:14 Pil 2:16
f1:15 Umen 19:21; 1 Kor 16:5-6
g1:19 Umen 18:5
h1:22 Efe 1:13; 4:30; 2 Kor 5:4

2 Corinthians 1

Inau Pol, eiloheh onen Iesu Kristo musil rendemien onen Ahi, namul namutis leta koanik ral min Timoti, tuer en demkatien. Namutis vat min kami koa mivi Sios onen Ahi en taon ten out Korin, 1:1 Umen 18:1 ka heha min meatin sav vasi keil emun onen Ahi koa mimul en out savsav keil en provins ten out Akaea.
  • Navisi keke Ahi Tamer ka Asuv Iesu Kristo luhesan more envatien ka tomat onealu hel en kami.

Pol Masmas Ahi Veni Ring Koe Moulien Onen en Avong Keil Takeih

Rehesan masmasien heha min Ahi koa vi Tata onen Iesu Kristo, Asuv orer. Kei vi Tata orer koa rie lat enmahisien onen minir ka mul vati lat rendemien orer. Anatin, kei mul vati lat rendemien orer en avong keil vasi takeih rovisu eni. Hesakini, ral min rendemien tetahos koa Ahi mul vati lat ir eni, ir emun rokilea rovahati lat rendemien onen mesav keil koa amul avisu en avong keil takeih. Veni romusil kat Iesu, romul rovisu en avong keil takeih en hen mesav keil suval koa kei mun kuri. a  Ka, en usite sav, en vati sakien koa Ahi vati lat rendemien onen Iesu, Ahi mul vati lat rendemien orer emun houlu. Komai, eiloheh keil, memul mevisu en avong keil takeih keke mekilea mevahati lat rendemien onami ka mevakataun demkatien onami. Anatin, navong Ahi mul vati lat rendemien onomai, mumoni keke mekilea mevahati lat rendemien onami eni navong mikur avong keil takeih en hen mesav keil en sakien ten merauen. Veni avong keil takeih koa mimul mivisu eni vatte tas en avong keil takeih koa komai mun memul mevisu eni. Sakini, avaseini melonge keke mimul mivisu en avong keil takeih suval koa memul mevisu eni, mekilea revi keke Ahi mul vati lat rendemien onami en vati sakien koa kei mul vati lat rendemien onomai eni.

Tuak ka ahinkuli keil, emaivati mevahit meseni min kami keke, navong komai memul en provins ten out Esia, meatin houlu amumoni keih en komai. b  Avong keil takeih enek koa mevisu eni mu tan en komai houlu mok keke mermundemtei mun mevahit mevamoul. Memundem sesai suval etin meatin tai koa va en kot ka avit hemat. Ka melei kilea keke koanik kur out vasakin komai meherlingtei mun desien onomai hel en komai enges. Vuo, koanik kur out vasakin komai mevaling desien vasi onomai hel en Ahi koa mul rali lat meatin keil ran matien. 10 Anatin, Ahi mutut komai ran avong keil takeih koa vi ten matien enges. Ka sakini, melei kilea keke vati Ahi enek kilea voutut moulien onomai ran tounah savsav keil emun. c  Ven koanek, komai meling desien onomai keih eni keke houtut komai eris en avong etai ris veah. 11 Ahi houmoni hemukonek veni kami mimul mikataun komai en hisien onami. Hesakini, meatin houlu imasmas Ahi ven tokolkatien keil koa kei sani min komai musil hisien keil onami ka onen mesav keil en usite onomai.

Pol Vit Kilea Vensa Rovatei Mau ven Keil

12 Komai mesi komai veni memundemi mevit tounah vasi koa memul memumoni mal imok en meten Ahi. d  En out netan ekek, melei kati keke sakien onomai musil rendemien koa vi anatin ka muto suval koa Ahi envati. Romusiltei meteisauen onen meatin keil ten out netan. Ka memumon sakien keil enek vat min kami mok. 13 Asa koa memul memutisi vat min kami vi asas koa mikilea mivahuli ka koa mae keke mivailea eni. Ka ekvati mok miheilea eni. 14 Ka avaseini munak mirkilea revitei veah komai, en avong koa Asuv Iesu hemai ris eni, kami miheilea mivavut kami ven komai en vati sakien koa komai mun mehevut komai ven kami. e 

15 Veni nakul anatin keke misi kami venau, mulamu, naling rendemien onak emau keke nisao en kami en ualien onak hatte helu keke mivakur tokolkatien ten umen ka selusien onak hatte helu. f  16 Anatin, mulamu, naling rendemien onak keke, navong maha moum en provins ten out Masedonia, maha mau masao en kami. Ka navong num evus ekonek, navit nisao ris en kami keke mivailea mivasila lat nau maha en provins ten out Sudea. 17 Ka asa koa naling kati viles ka narvatei mun ven kami. ?Ka mukave, mikilea mivandesin selusien keil onak? Nalonge keke mimundemi namul namumon hatkatien keil onak musil rendemien keil onen meatin keil ten out netan enges. Mimundemi keke navi meatin taliluvosien tai koa mul viteni, 'anatin numon koanek,' ka katau, naviteni suk navit, 'vuo, nirmumontei mun'. 18 !Vuo, narvitei meatin taliluvosien! Suval koa Ahi mum vasi hatkatien keil onen ka sakras valuvos, selusien keil onomai emun rovitei luvosien. En selusien onomai, navong meviteni, 'anatin mehoumon koanek,' meherviteni suk mehehit, 'vuo, mehermumontei mun'. 19 Anatin, mermultei mevaliluvos, veni Iesu Kristo, Natin Ahi koa Saelas, Timoti ka inau metselus usili min kami, kei roluvostei. g  Vuo, lises, navong Iesu vit, “Anatin, numon koanek,” kei mumoni varei. 20 Anatin, mermultei mevaliluvos, veni Ahi roliluvostei. Hatkatien vasi keil onen, Iesu mum vasi keil umai avi anatin. Ven koanek, navong rovis, romul rovit 'Anatin' en isen Iesu Kristo keke rovahati lat isen Ahi vahi hetetamen imok. 21 Ka Ahi varei sakin komai ka kami mun romulomal keih en demkatien orer navong rokapil ral min Kristo. Ka Ahi varei ling seh en ir keke rovahi onen. 22 Kei mutis isen en moulien orer ka san Ninin Votut onen minir vato en tiner. Ahi mumoni mukonek vatie lati keke hesan vasi tounah koa kei vat kati vasani minir. h 

23 Sakini narvatei masao eris en kami en out Korin veni, vahit mahat, masel kat ris kami mun vakeih ka mivalonge vatisa ris. Ahi kilea keke selusien onak vi anatin. 24 Komai emairovatei mevahi houlu en kami keke mevameng kat kami en tounah keil lisenges, veni mimul mimulomal keih en demkatien onomi tuai. Komai emaivati mok mevoum vituai vatal min kami vasakin kami mivahilelau en sien.

Copyright information for `PMA