a2:6 1 Kor 5:1-5
b2:13 Umen 20:1
c2:14 1 Kor 4:9
d2:15 1 Kor 1:18

2 Corinthians 2

Sakini namumon rendemien onak keke nirvattei ris emau keke miherlongtei ris hetisa ven selkatien keil onak. ?Veni munak numon kami mihelonge hetisa, isei mun heto keke voumonau nisinau? Meatin tovuol veni nasakin kami milonge tisa houlu. Sakini namutis leta tai min kami keke mikilea mivahiles ran sakien keil onami koa ramaltei. Hesakini, navong nihat nisao ris en kami, nirlongtei hetisa ven sakien tisa keil onami. Vuo, ekvati mok keke kami mihesakinau nilonge hetahos. Nakul anatin keke kami vasi mihoum vasi asa koa naviteni keke sien onak hemai hehi sien onami. Navong namutis leta enek min kami keke masel kat kami, tinok mah, nalonge tisa, ka simetok motmot. Ka narmutistei vasakin kami mivalonge vatisa. Vuo, namutisi vasakin kami mivailea keke envatien onak en kami marite mok.

Selkatien keke Umon Methos Hetal Min Kristin Tai koa Mum Romaltei

Ekvati maselus usil meatin keisom koa mum tisa. Asa koa kei mumoni romumontei inau nges malonge vatisa, ka, en usite tai, kei mumon kami vasi milonge tisa. Mahien koa kami houlu misani min meatin enek vinvin tuai. a  Sakini, kosa, hetahos keke mihoumon methos hetal mini ka mihehati lat rendemien onen. Hesakini, longtisaen onen herkav koe vasitei kei. Sakini, napeah kami keke mihoumoni heilea ris keke envatien onami mul ien. Navong namutis leta min kami mulamu, namumoni keke masak visi mahotini keke mivi anatin minau ka mikilea mivalong kat nau en tounah vasi. Ka anatin keke milong kat asa koa naviteni. 10 Ka kosa, ekvat kami mihoumon methos hetal mini. Ka navong kami mihoumon methos hetal min meatin tai, inau mun numon methos hetal mini. Ka munak vi anatin keke kei mumon tounah tisa va kat inau, en meten Iesu Kristo, namumon methos ral mini vakataun viluen onami. 11 Rehoumoni hemukonek veni rokilea revi rendemien vasi keil onen Temat koa mul sak visi vatiti vas ir ka vapurun ir en sise houlu.

En Ualien onen Pol, Meatin Houlu Akur Demkatien

12 Navong nasan leta onak min kami evus, namual nuva en taon ten out Troas keke mahiten more longlongien usil Iesu Kristo eni. Ka nalesi keke Asuv sehen voiteh en out enek keke moumon umen onen. 13 Ka navong narvotintei tuak Taetas en out enek koa nasila vat ven kami, namundemko houlu. Sakini nasentulai min meatin keil ekonek, ka nuva ris en sise onak maha en provins ten out Masedonia keke malekati. b 

14 Ka avaseini namundemko mukok, namasmas Ahi houlu mok. Namasmasi veni kei sakin Iesu Kristo vavae lin vativieh keil onen, ka lisenges kei mul mulamun komai en meten meatin keil. Ka en out vasi koa mulamun komai eni, more longlongien koa sakin meatin keil availea en Ahi mul ka vasi out. c  15 Tei en meatin keil, Ahi mul mutut keil, ka teisav en keil amul avupuol. Ka navong mevitehiten more longlongien usil Kristo min meatin keil, Ahi si veni suval si kei navong mus vite ten sanien votut tai. d  16 Navong koakeil Ahi mul mutut keil amusi, vi vite ten moulien min keil. Ka navong koakeil amul avupuol amusi, vi vite ten matien.

?Isei varei vinvin vakur vati umen koanek? !Meatin tovuol!
17 Ka komai mersuvaltei meatin keil houlu koa amul avis meatin keil keke avahul more longlongen onen Ahi ran keil suval vi titi tounah tai. !Vuo! Veni Ahi sila komai mevaha vasuval eiloheh keil onen keke mevahitehiten more longlongien usil Iesu Kristo. Ka melei kati keke sakien onomai musil rendemien koa vi anatin ka muto suval koa Ahi envati, veni mekilea keke meten Ahi mul en komai.

Copyright information for `PMA