a3:3 Eks 24.12; Ser 31:33; Ese 11:19; 36:26
b3:6 Ser 31:31; 32:40; 1 Kor 11:25; Hib 8:8-13; Rom 7:6
c3:7 Eks 34:29-30
d3:9 Dut 27:26
e3:9 Rom 1:17; 3:21
f3:13 Eks 34:33
g3:14 Eks 34:34; Rom 11:23,26
h3:17 Rom 8:2; Kal 5:1,13

2 Corinthians 3

Hetetamenien ten Hatkatien Takeih Hau onen Ahi Mulin Hetetamenien ten Mengkatien Keil koa Ahi Sani Mulamu

Navong namutis selusien enek min kami usil umen onomai, eiloheh keil, narmumontei keke mahati lat isomai eris en metomi. ?Vuo mukave? ?Kami emivati mivakur leta ten hitkileaien ran hetetamen tai keke mikilea mivaling desien onami en komai? ?Vuo kami mihetis leta ten hitkileaien en usite onomai keke meatin sav keil akilea avaling desien one en komai? !Vuo! Veni kami varei mivi leta koa mul vit kilea keke mevi anatin. Ven envatien onomai en kami, isomi mul en tinomai keke meatin vasi keil akilea avahuli ka avalei kilea eni. Anatin, demkatien onami koa vi anatin suval leta koa Kristo varei mutisi vahit kilea en komai. Ka romutistei eni vatal min pen tai. Vuo, mutis eni ral min Ninin onen Ahi koa moul. Ka romutistei en ahat suval koa Mosis mutis eni. Vuo, mutis kati en tinomi varei. a 

Komai mekilea mevahiteni vamukonek veni memundesini keke Ahi rie lat komai en Iesu Kristo keke mevoumon umen koanek. Mervitentei keke komai enges mevinvin mevoumon tounah vuo mevasakin heite ten umen onomai vakistal. Komai mekilea keke tounah koa memul memumoni ka heite teni, keilu vasi luka ven Ahi enges. Anatin, kei enges sakin komai mevinvin mevahi meatin keil onen keke mevaselus en usite ten hatkatien takeih hau onen. Hatkatien takeih hau koanek, vatte teni rovitei mengkatien keil koa amutisi veni kei san matien min koakeil arali kotehei. Ka vatte ten hatkatien takeih hau vi Ninin koa mul san moulien min koakeil amusili. b 

Mulamu, navong Ahi san mengkatien keil koa rei lati en ahat min Mosis, kei vothot en hetetamenien ka muohien onen mini. Ka navong Mosis mita ris ven me-Isrel keil, asakras avalele vamal en nan veni hetetamenien ka muohien onen Ahi mul vilehil eni. c  Ka katau suk, hilhilien ten muohien enek va, va vio ... vuol rani. Ka mengkatien keil enek asan matien min meatin keil veni asakras avousil kat keil. Ka munak Ahi san mengkatien keil onen ral min vati muohien enek, kei hesakin hatkatien takeih hau koa Ninin Votut mul mum ral mini keke hemai hetal min hetetamenien ka muohien koa hemariso mok. Veni mengkatien keil koa Ahi sani min meatin keil koa sakin keil alei kilea armaltei en meten d  ka mal akur mahien veni, kei sani ral min mari muohien. Ka munak san mengkatien keil enek ral min mari muohien, hatkatien takeih hau koa sakin meatin keil amal en meten e  mul mai ral min muohien koa mariso mok. 10 Anatin, asa koa mai ral min muohien onen Ahi mulamu, rolesi keke vuol rani, veni muohien ten asa koa kei sani katau suk mariso mok muli. 11 Asa koa Ahi sani mulamu ral min muohien koa vuol rani, kei ling lati keke vasan hatkatien takeih hau ten lisenges. Sakini, rokilea keke muohien teni mariso mok ka hel lisenges.

12 Sakini, veni desien onomai en hatkatien takeih hau onen Ahi mariso, memarir en umen vasi keil onomai. 13 Mermumontei vasuval Mosis koa ling kaliko mul kav koe veinan f  vasakin me-Isrel keil arvarlei kileatei keke Ahi mul ling lat muohien teni keke vaha vavuol. 14 Anatin, Ahi sakin rendemien onen me-Isrel keil koteh keke arkileatei aneite teni. Ka en avong kosa emun, navong me-Isrel keil alonge meatin tai mul vuli selusien ten hatkatien takeih matu, rendemien one koteh veah. Suval kaliko tai mul koe rendemien one keke arlong kileatei anatinien ten hatkatien takeih hau. Ka navong umai akapil ral min Iesu Kristo, Ahi mul sehen rendemien one suval koa kulat kaliko koa mul koe rendemien one. g  15 Anatin, rokol avong kosa, navong avuli mengkatien onen Mosis, suval koa kaliko enek mul veah kav koe rendemien onen me-Isrel keil. 16 Ka navong tine viles ka umai ven Asuv, Ahi kulat kaliko enek ran rendemien one. 17 Ka Asuv enek vi Ninin Votut, ka navong Ninin onen Ahi Asuv mul en tiner, romaluv ran mengkatien keil koa ring koe ir ran Ahi. h  18 Sakini, ir vasi koa roling desien orer en Asuv, asa koa kav koe rendemien orer, Ahi kulati tuai. Sakini, rolei kilea en hetetamenien ka muohien onen Asuv, ka mul viles ir va vio ... moulien orer mul kur suvalien onen suval kilas tai mul kur suvalien ten tounah. Ka vi Ninin onen Asuv koa mul mumon tounah keil enek en moulien orer.

Copyright information for `PMA