a4:1 2 Kor 3:6
b4:2 1 Tes 2:5
c4:3 1 Kor 1:18
d4:4 Efe 2:2
e4:4 Pil 2:6; Kol 1:18; 2:9; Hib 1:3
f4:6 Aes 9:2; 2 Kor 3:18
g4:8 2 Kor 1:8; 7:5
h4:10 Rom 8:10; Pil 3:10; Kol 1:24; 2 Tim 2:11; 1 Pit 4:13
i4:14 Rom 8:11; 1 Kor 6:14; 1 Tes 4:14
j4:16 Efe 3:16; Kol 3:10
k4:17 Rom 8:17-18; 1 Pit 6-7
l4:18 Rom 8:24; 2 Kor 5:7; Hib 11:1

2 Corinthians 4

Rendemien onen Kristin Keil Namottei veni Ahi Sakin Hetetamenien ka Muohien Onen Ritin en Moulien One

Ka vi Ahi varei koa san umen koanik a  min komai keke mevahit luvati usil hatkatien takeih hau onen. Sakini, veni Ahi san umen enek min komai musil more envatien onen keke mesan more longlongien onen, rendemien onomai sakras vamot ka meherlokoveintei umen enek. Komai mesesein sakien tisa keil koa meatin keil asak visi avoum suaini veni amemou eni. Ka meling rendemien onomai keke meherluvostei meatin sav vuo merhervilestei selusien onen Ahi nateisav. b  En meten Ahi, mevitehiten tounah koa vi anatin en sakien koa meatin sav keil ilesi hemal eni. Ka munak koakeil amul en sise ten matien arkilea revitei aneite ten more longlongien koa mevitehiteni, arkileatei veni rendemien one koteh suval kaliko tai mul kav koe keil veah. c  Keil arkultei anatin eni ven Temat, koa meatin keil ten out netan amusili suval ahi one, mul sakin rendemien one koteh suval mete var. d  Sakini, asakras avalei kilea titinien ten muohien ten more longlongien usil Iesu Kristo koa suval Ahi etin en usite vasi keil. e  Sakini, navong meva keke mevaselus min meatin keil, mervitehitentei usil komai, ka mevitehiten keke Iesu Kristo vi Asuv ka memum mini suval mevi slev onami. Navong Ahi mumon out netan kei vit,“Maen meneai vaka ran mankoli ka vatitin.”(Sen 1:3) Ka kei vi vati Ahi etin koa mumon meneai onen ritin en tiner neim f  keke rovailea revi hetetamenien ka muohien onen. Ka koakeil ales veinan Iesu Kristo, alei kilea en hetetamenien ka muohien enek.

Anatin, hetetamenien ka muohien ten hatkatien hau enek koa moreite mok, Ahi lingi mul ritin en tinomai neim. Koanek suval koa meatin tai mul ling suai tounah koa mormoreite val en veite koa amumoni en tanhilhili enges koa rokeihtei. En sakien koanek, meatin vasi keil ilei kilea keke mari keihoen teni kistal ka ven Ahi, rokistaltei ran komai. Avong houlu, komai mekur mahien en usite vasi keil, ka mermundem sesaitei. Avaseini memundemko, ka desien onomai rovuoltei. g  Meatin houlu asak visi avapurun komai, ka Ahi rolokoveintei komai. Avaseini amu tan en komai, ka armu vasitei komai. 10 Ka en sise ten avong keil takeih enek, avemai mul kapil ral min Iesu en mahien ka matien koa kei kuri en aven. h  En sise enek, meatin keil akilea avalei kilea moulien onen Iesu vaka en moulien onomai. 11 Veni navong memul memoul veah, meatin sav keil amul asan matien min komai veni memusil kat Iesu. En sise enek, meatin keil akilea avalei kilea moulien onen Iesu vaka en avemai koa memerau enges. 12 Ka avaseini komai memul mevisu en matien lises keke mevakur more longlongien vaha min kami, kami mimul mikur moulien ten lisenges.

13 Tus Votut viteni vit,“Veni navuli kat demkatien onak en Ahi, namules naselus.(Sam 116:10) Ka veni komai mekur vati demkatien enek, komai emun memules meselus. 14 Ka memul veah meselus veni mekilea keke Ahi koa rali lat Asuv Iesu ran matien, kei varei hetali lat komai emun veni mekapil vituai ral min Iesu. Anatin, kei hetali lat komai hetal min kami mun reheha rehelomal en meten. i  15 Anatin, mahien ka avong keil takeih koa mevisu eni, mekuri keke mekilea mevahithiten more longlongien veni mekilea koanek mul kataun kami ka mul kataun meatin sav keil emun avalong kilea usil more envatien onen Ahi. Ka navong along kilea eni, keil akilea avamasmas Ahi veni, ka avahati lat isen ven hetetamenien onen.

16 Sakini, komai mermaentei rendemien onomai vamot. Avaseini avemai hae mul makutkut, ka en avong vasi, demkatien koa mul en tinomai neim mul mai keih imok. j  17 Veni komai meles mahien keil koa memul mekuri suval vi titi tounah ten avong havivis. Ka navong memul mevisu en keil, mehekur mormore tounah koa hetetamen imok koa sakras vavus en out nesa. k  18 Veni navong komai meles tounah keil ten out netan en metomai, merlingtei demkatien onomai eni, veni mekilea amul ten avong havivis. !Vuo! Komai melele va en tounah keil en out nesa koa meten meatin keil sakras valesi, ka meling demkatien onomai eni veni keil amul lises ka lisenges. l 

Copyright information for `PMA