a5:2 Rom 8:23
b5:4 1 Kor 15:53-54
c5:5 Rom 8:16,23; 2 Kor 1:22; Efe 1:13
d5:8 Fil 1:23
e5:9 Kol 1:10; 1 Tes 4:1
f5:10 Mat 16:27, Umen 10:42; Rom 2:16; 14:10
g5:15 Rom 14:7-9
h5:17 Rev 21:5
i5:18 Rom 5:10
j5:19 Rom 3:24-25; Kol 1:20
k5:20 Efe 6:19-20
l5:21 Kal 3:13; Hib 4:15; 1 Pit 2:22
m5:21 Pil 3:9

2 Corinthians 5

Rehermundemkotei ven Mahien koa Romul Rokuri en Aver, Veni Ahi Hesan Aver Hau ten Lisenges Minir

Tahos rehermundem ramattei usil aver, veni rokilea keke aver suval eim tavolin koa roro ien en out netan ekek ten avong havivis. Ka navong vuol, reheha reheto en teim koa Ahi varei mumoni. Teim tai koa mal rovato ien lisenges en out nesa. Ka navong roro veah en eim tavolin ekek, romahise ka ervati mok keke rovakur aver hau koa hehi teim orer en out nesa. a  Ka navong rumat, ninin orer herkaka hontei veni aver hau orer heav koe ris ninin orer tuai. Navong roro veah en eim tavolin ekek, ir romahise veni mahien koa rokuri meas. Ka navong romahise, rovitei veni ervati rovamat keke rovalokovein eim tavolin ekek. Vuo, ervati mok keke aver ten out netan hehiles varei hemai hehi aver koa hehi heite hau koa kilea vamoul lises. b  Ka Ahi varei sak mesen ir keke rovakur aven hau enek. Ka kei san Ninin onen mai moul enir suval metai vatie lati vi anatin keke houmon asa koa kei vat kati. c 

Sakini, rendemien orer keih, avaseini keke navong roro semau en eim tavolin ekek, rorrotei veah en out koa Asuv Iesu mul ien. Veni navong roro semau en out netan, romusil Iesu ral min demkatien, rormusiltei veni rokilea rovalesi en meter. Anatin, rendemien orer keih, veni rosi ir munak rehemat ka rehelokovein aver ekok, veni rokilea keke reheto hetal min Asuv Iesu en teim orer ke va. d  Ka avaseini munak roro ekok vuo ke va, rosak visi keih rovasan sien mini en tounah vasi koa romumoni. e  10 Veni, ir vasi rehelomal en meten Iesu Kristo en avong koa helei rahit usite onen meatin vasi keil. Ka ir vasi rehekur asa koa mal musil tounah vasi keil koa romumoni en aver, asa koa tahos vuo asa koa tisa. f 

Iesu Kristo Mai vi Sise koa Rokilea Rovato en Tomat vatal min Ahi eni

11 Sakini, veni mehouhou min Asuv ka mekilea keke meatin keil ilomal en meten, memul mesak visi mevapeah mesav keil keke avaling desien one en Kristo. Ahi kilea revi keke memumon tounah vasi ral min rendemien koa mal, ka ekvati mok keke kami mun miheilea eni. 12 Komai mersak vistei mevahati lat komai eris min kami. Ka mesak visi mevahit kilea en umen keil onomai keke mivasi kami ven komai. Hesakini, kami mikilea mivasa kes selusien en usite onomai min koakeil aselus houlu usil aven meatin hae, ka armundemtei usil asa koa mul en tin meatin neim. 13 Munak memumon tounah suval mevi varu, memumoni veni memusil kat Ahi. Ka munak memumon tounah ral min rendemien koa tahos, memumoni vakataun kami. 14 Ka tounah vasi koa memul memumoni, memumoni veni envatien onen Kristo vi houlu en moulien onomai. Veni mekul anatin keke meatin tai emat vinat meatin vasi keil en out netan. Ka ven koanek, suval koa ir vasi mun romat. Ka suval teiai tai sakras emun voumon etai tisaen, ir rehermumontei mun tisaen keil. 15 Anatin, kei mat venir vasi vasakin ir koa rokur moulien hau, rormoultei mun vousil rendemien orer enges. !Vuo! Ir rehemoul vousil kat rendemien onen Kristo koa mat ka mea ris ran matien venir. g 

16 Sakini, komai merlei rahittei mun usite onen etai meatin musil rendemien keil onen meatin enges. Anatin keke mulamu, melei rahit usite onen Kristo musil rendemien onen meatin keil ten out netan. Ka mermundemtei mun usili vamukonek. 17 Navong meatin tai kapil ral min Iesu Kristo, kei mai vi heite hau. Moulien matu onen vuol, ka kei kur moulien hau tai. h  18 Vi Ahi koa mul viles ir mukok. Mulamu, rovi vativieh keil ral mini, ka ven asa koa Iesu Kristo mumoni en usite orer, Ahi sakin ir roro en tomat ral mini. i  Ka evus, kei san umen min komai keke mevaha mevahit meseni min meatin keil keke keil emun akilea avato en tomat vatal mini. 19 Anatin, asa koa Iesu Kristo mumoni mumon sise keke Ahi kilea vato en tomat vatal min meatin vasi keil. j  Ahi rovulitei mun tisaen keil one vaha kat usite one. Ka kosa, more longlongien usil sise ten tomat enek, Ahi sani min komai keke mevahitehiteni min meatin vasi keil. 20 Sakini, komai memul meva min meatin keil vasi en usite onen Iesu Kristo, ka Ahi varei mul selus min keil ka en komai. k  Sakini, en isen Iesu Kristo, komai mepeah kami keke mihervitei mun vativieh hetal min Ahi, ka miheto en tomat hetal mini. 21 Iesu Kristo, tisaen onen tovuol. Ka veni Ahi mundem usil ir, ling tisaen vasi keil orer va kat Iesu ka san vasi mahien teni mini. l  Mukonek, veni rokapil ral min Kristo, Ahi les ir suval romal en meten. m 

Copyright information for `PMA