a6:5 2 Kor 11:23-27
b6:6 1 Tim 4:12
c6:7 Rom 1 Kor 4:10
d6:7 2 Kor 10:4
e6:8 1 Kor 4:10-13
f6:9 Rom 1 Kor 1:8-10
g6:10 Umen 3:6; Rom 8:32; 2 Kor 8:9; 1 Tes 1:6
h6:13 1 Kor 4:14
i6:14 Efe 5:7-11
j6:16 1 Kor 3:16; 6:19

2 Corinthians 6

Sakini, veni memum vituai ral min Ahi varei, mepeah kami koa mikur more envatien onen Ahi tuai keke mihendemvu ven more envatien enek. Mihelong asa koa Ahi viteni navong vit,

“En avong mal teni, nalong tangien onami,
ka numai makataun kami ka moutut kami.”(Aes 49:8)
!Anatin, kosa vi avong mal keke Ahi vamai vakataun kami! !Kosa vi avong koa kei houtut kami!

Pol Selus Usil Mahien Keil koa Kuri keke Vasan More Longlongien onen Ahi min Meatin Keil

En umen ka moulien vasi onomai, mesak visi keke mevoumon tounah vasi vamal en meten meatin sav keil keke mersakin etai meatin val vasavoi en demkatien onen. En tounah vasi koa memumoni, mesak visi mevatie lati keke mevi meatin keil toumien onen Ahi. Avaseini meatin sav keil amul asak vis demkatien onomai, asan mahien min komai, ka amumoni keih en komai, mekuri ral min rendemien koa taveah. Amuas komai, aling komai en eim takeih, ka aso koe komai. Umen takeih muas komai, amai kat komai, ka vongien houlu, mermatiltei. a  Merie lati keke mevi anatin en Ahi ka en sakien keil koa mutolas, ka en ileilien koa Ahi sani min komai, ka ka en tounah koa mekuri en rendemien koa taveah. Memumoni tahos min meatin sav keil ka memumon tounah ral min envatien koa vi anatin. b  Ka memum ral min tounah koa Ninin Votut mul sani min komai. Selusien onomai vi anatin ka memum ral min keihoen onen Ahi. c  Suval meatin tavaeen keil, sakien onomai koa mal mai suval naef tavaeen koa mevae en usite onen Ahi ka mai suval eikokoe koa mering koe more longlongien eni. d  Mevikit umen koa Ahi sani min komai, avaseini meatin keil avouhou min komai vuo arvouhoutei, avati lat isomai vuo avitan eni. Avaseini meselus en anatinien, amumoni min komai suval mevi meatin taliluvosien keil. e  Avaseini meatin houlu akilea en komai, amumoni min komai suval koa areingeingen komai. Avong houlu amutah purun komai ka asak visi avou vini komai, ka milesi, memoul veah memules. f  10 Avaseini melonge tisa veni tounah houlu, sien mul en komai lisenges. Avaseini mane onomai tovuol, mesakin meatin sav keil avilelau en tounah keil onen Ahi. Anatin, avaseini keke tounah onomai en out netan tovuol, tounah vasi onen Ahi vi onomai. g 

11 Tuak keil en out Korin, mevit vasin rendemien onomai, ka mirling suain etai tounah ran kami. Envatien onomai mul en kami houlu ka memul mesehen tinomai ven kami. 12 Munak tounah tai mul koa mul ring koe viluen orer, rokatei ven komai, ka en kami koa mikoteh en tinomi ven komai. 13 Namul naselus min kami suval mivi titak keil kati. h  Ka napeah kami keke mihesehen tinomi ven komai keke mihesa kes envatien onomai.

Selkatien keke Ronapiltei Natal min Koakeil Amusil Sakien Keil ten out Netan

14 Minapiltei natal koakeil arkultei anatin en Ahi. Veni koakeil amusil sise koa mal asakras avousil sise tas vatal min koakeil amusil sise koa kalkali. i  ?Mukave, meneai ka mankoli lukilea luvato out vatas? 15 ?Mukave, Iesu Kristo ka Temat lukilea luvakur rendemien vatas? !Lusakras! En vati sakien enek, meatin tai koa kul anatin en Kristo sakras vapil vituai en tounah vatal min meatin koa rokultei anatin eni. 16 En sakien koa arvatei netan min nana onen ahi sav en Eim Votut onen Ahi, ir rosakras rovaha netan vituai vatal min koakeil uva netan min nana keil. Veni ir rovi Eim Votut onen Ahi koa moul. j  Koanek suval asa koa Ahi viteni navong vit,

“Inau nito en tin meatin keil ka nito vituai hetal min keil.
Inau nihi Ahi one ka keil ihi meatin keil onak.”(Lev 26:12; Ese 37:27)
17 Sakini, Ahi Asuv viteni mun vit,

“Kami mihemea ran keil ka mihekeka ran keil.
Munak mihertokoltei tounah koa romutotei en metok, inau nikur revi kami.”(Aes 52:11; Ese 20:34)
18 “Inau koa navi Ahi Asuv ten keihoen naviteni keke nihi tata onami
ka kami mihehi natkuli keil ka natukahin keil.”(2 Sam 7:8,14)
Copyright information for `PMA