2 Kings 17

Meatin Tavaeen Keil Ten out Asiria Umai Amu Lin Me-Isrel Keil

2 King 17:5-10

Navong asuv houlu Hosea onen me-Isrel keil mules en eim takeih en out Asiria, asuv houlu Salmanesa ten out Asiria mai ral min meatin keil tavaeen onen keke avavae vatal me-Isrel keil. Umai aka rahit mari taon ten out Sameria suval vieh keke me-Isrel keil asakras avamea rani. Amumoni mukonek sua etel (3) varei. Sakini, en keite ten sua etel enek, en sua ouhat (9) ten losilkatien onen asuv houlu Hosea, me-Isrel keil koa aro en mari taon ten out Sameria amaen keil uva en hen asuv houlu ten out Asiria. Sakini, me-Asiria keil amulamun keil uva en kantri one ka asakin keil umai avi slev keil one. Keil koa, aling keil aro en taon ten out Halah, keil koa mun, aling keil aro vesesal ven Oaisal Habor koa mul en atan ten out Nggosan. Ka keil koa mun, aling keil aro en taon ten out Midia.

Iahova, Ahi one koa lah lat keil ran hen asuv houlu ten out Isip mulamu, kei sakin me-Isrel keil uva amules en hen me-Asiria keil veni aviles eisile rani ka uva netan min ahi savsav keil. Anatin, keil amusil sakien tatisa onen me-Kenan keil. Ka ven sakien tisa keil one varei, Iahova viteni min me-Isrel keil keke u rasilin keil ran atan enek ka ikuri suk hemai hehi one. Ka asuv houlu keil kati one varei amulamun keil en vati sakien tatisa keil enek. Me-Isrel keil amum suai en tounah houlu koa romaltei en meten Iahova, Ahi one. Keil amumon ahor houlu keke avaha netan min ahi savsav keil ien en titi meteimal keil one va rokol mari taon keil one emun. 10 Ka en hoi hou vasi keil ka en nimal ten vatiai houlu, aling ahat votut keil ka nana keil onen ahi Astata koa vi ahin keke avatetengeiril min keil.

Me-Asiria Keil Umai Aro Kat en Atan ten out Isrel

2 King 17:24-29

24 Asuv houlu ten out Asiria kur tei en meatin keil onen ran taon keil ten out Babilon, Kut, Iva, Hamat ka Separvaem ka sakin keil akur atan koa alah lati ran me-Isrel keil. Sakini, keil umai en atan ka taon keil ten out Sameria, ka aro ien suval out kati one. 25 Navong umai aro en out enek, arvatei netan min Iahova, sakini kei sila laeon keil umai akat vinvini tei en keil umat. 26 Longlongien teni va rokol asuv houlu ten out Asiria keke meatin keil koa ling keil en taon keil ten out Sameria arkileatei mengkatien keil vuo sakien keil onen ahi ten out enek. Sakini, ahi ten out enek sila laeon keil uva akat vini meatin keil onen umat.

27 Navong asuv houlu kur longlongien enek, kei meng kati vit, “Sila ris etai en pris keil ten out Isrel koa rolah lat keil ran atan koanek. Kei heha ris, heto hetal min meatin keil onak ka hehisein keil en mengkatien keil onen ahi ten out enek keke avousili.” 28 Sakini tai en pris keil ten out Isrel koa alah lat keil ran out Sameria, kei mai ris ro en taon ten out Betel. Ka en out enek, visein meatin keil en sise koa avaha netan min Iahova ien. 29 Ka avaseini, vangi meatin savsav keil koa amul en atan enek amules uva netan min nana keil one musil sakien matu one. Keil uva aling nana keil ten kantri kati one amul en ahor keil koa me-Isrel keil amumoni en hoi hou keil koa mul vesesal en taon keil ten out Sameria.

Copyright information for `PMA