2 Kings 22

En Losilkatien Onen Asuv Houlu Sosaea, Keil Avotin Mengkatien Keil Onen Mosis

2 King 22:1-2,11-13,16-20

Navong me-Sudah keil aling Sosaea vi asuv houlu one, sua onen vi outel (8) enges. Mama onen, isen Sededah, natnahin Adaea ten out Boskat. Ka Sosaea losil kat me-Sudah keil en taon ten out Serusalem sua hanumau tai ka teindan tai mun (31). Sosaea mumon sakien keil koa mal ka Iahova si houlu veni. Kei musil sakien tetahos keil onen avu onen, asuv houlu Deved, mumoni mulamu, ka musil kat revi mengkatien keil vasi onen Iahova.

Navong asuv houlu Sosaea losil kat me-Sudah keil, kei meng kat meatin keil toumien onen avoum revi ris Eim Votut onen Iahova. Ka navong amul amumoni, keil avotin tus tai koa Mengkatien keil onen Mosis mul ien. Sakini, keil akuri uva asani min asuv houlu Sosaea, ka meatin tai onen vuli mini raengoni.

11 Navong Sosaea long selusien keil koa avuli en tus enek, kei longe tisa houlu ka rali vas eisin omon veni kei kilea suk keke kei ral min meatin onen keil amul soutin ran asa koa Iahova envati. 12 Evus, kei san selusien va min meatin keil ekek: pris Hilkaea, Ahikam (natin Safan), Akbor (natin Mikaeah), Safan (klak onen asuv houlu), ral min Asaea (meatin takataunien onen asuv houlu). Ka navong umai, asuv houlu Sosaea meng kat keil vit, 13 “Miheha mihehis min Iahova venau ka ven me-Sudah keil usil selusien keil koa mul en tus koanek. Nakilea keke Iahova tin vepeng houlu kat ir ka hesan mahien minir veni avu orer keil telamu arlong kattei selusien keil koa mul en tus koanek ka armumtei vousili.”

Evus, Sosaea sila meatin keil ekek uva ales ahin tai koa vi provet onen Ahi, isen Hulda.

16 Sakini provet Hulda san selusien va min asuv houlu vit, “Koanek vi selusien onen Iahova, 'Anatin keke inau nipurun meatin keil ten out Serusalem hesuval selusien keil koa asuv houlu vuli en tus koanek. 17 Numon koanek veni meatin keil aseseinau ka uva netan min ahi sav keil ka asan sanien votut one va min keil. Sakien tisa keil one sakin nau tinok vepeng houlu va kat keil. Anatin, vurohien onak mariso va kat me-Serusalem keil ka sakras vaha netan.'”

18 Evus, provet Hulda vit risi vit, “Ka min asuv houlu koa san kami mimai, mihehiten selusien koanek onen Iahova usil selusien keil koa kei longe en tus enek, 19 'Navong kolong selusien keil onak keke nipurun out Serusalem hetal min meatin keil onen, keik komundemko houlu ka komumon rendemien onom va netan en metok. Anatin, navong kolonge keke inau numon taon koanek hemai hehi out ten sesendaien keke tounah hetovuol hemoul ien, keik, korali vas eisin omom ka komurang mai venau. Sakini, inau, Iahova, nalong hisien onom. 20 Ka mahien koa nisani hemai heha kat Serusalem, hermaitei mau kosa en avong keil koa keik komoul veah. Nimaenuk kimat en tomat.'”

Copyright information for `PMA