2 Kings 5

Iahova Sak Revi Aven Koan Siria Tai Mai Ris Tahos

2 King 5:1-3,9-15

En kantri ten out Siria, avat tai tavaeen mul ien, isen Neman. Ka en hen meatin enek, Iahova mumon kantri ten out Siria vae mulin kantri sav keil. Ven koanek, asuv houlu ten out Siria vouhou veni ka mumoni mai vi mari hetamen tai. Ka avaseini keke Neman kur eis tai koa marite, mesaien ten leporsi mul purun vasi aven. Avong tai, meatin keil tavaeen onen uva en taon tai onen me-Isrel keil keke avahenan tounah keil ran keil, ka en avong enek, avuli kat atouli tai one. Evus, asani min Neman keke vamai vahi slev onen ahin onen.

Avong tai, atouli enek viteni min ahin onen Neman vit, “Namundemi keke tahos asuv onak vaha vales vis provet onomai ten out Isrel koa mul en provins ten out Sameria. Kei kilea vasak revi aven keke mesaien ten leporsi enek vavuol rani.”

Navong Neman longe, kur meatin onen vahis amusili ka amuloh en kat keil onen koa hos keil osen alehei ka uva avales provet Elisa. Ka navong arokol teim sen, amulomal vesesal en voiteh. 10 Sakini Elisa sila meatin toumien onen va vahit meseni min Neman keke heha hemarindun kei en Oaisal Sodan hatte hehi oulu (7). Kei viteni mini keke munak houmoni, mesaien ten leporsi hetovuol emun ka aven hemai ris hetolas.

11 Navong Neman longe, tin katiat ka vut van kat onen ka va. Kei viteni min meatin keil onen vit, “!Inau navi hetamen tai! Namundemi keke provet enek hesital vales naus. Namundemi keke helomal hehis min Iahova, Ahi onen, ka hetelan hen en out koa mesaien ten leporsi mul ien keke hesak revi avek heto. !Ka vuo! !Kei romumon etai tounah! 12 En out kati onak en out Damaskas, Oaisal Abana ka Oaisal Parpar lumul ien. Koakeilu enek lutahos imok mulin oaisal keil vasi koa mul en atan ten out Isrel. ?Vensa nasakras makul en tai en koakeilu enek keke avek vamai ris vato?”

13 Meatin toumien keil onen umai veni ka aviteni mini avit, “Asuv, munak provet enek visuk kovoumon etai tounah takeih, keik kumon asas koa viteni. ?Ka mukave? ?Kosakras kovaha kovamarindun keik en oaisal enek vasuval koa kei viteni minuk keke avem vamai vato ris?” 14 Sakini, Neman maeni ka va en Oaisal Sodan. Kei mual vita en oai ka marindun kei eni hatte oulu (7) suval asa koa Elisa viteni mini. Navong kei mea ran oai, lesi keke aven vasi mutolas. Hiliven mai ris tahos suval hiliven titiali tai. Navong lesi mukok, kei mu ris ral min meatin keil onen uva avales Elisa. Kei viteni min Elisa vit, “Kosa nakilea suk keke ahi sav tovuol emun. Ahi onen me-Isrel keil, kei tas moul.”

En avong enek, kantri ten out Asiria kur keihoen mulin kantri savsav keil ka amumon meatin keil ten kantri sav keil amul en he. Akeih kat asuv houlu sav keil keke avasan hatte tei en tounah one keil vaha min keil. Ka munak irmumontei, meatin tavaeen keil one ten out Asiria imai u vinvini meatin keil onen asuv houlu enek. Sakini, sua houlu, asuv houlu onen me-Sudah keil ka asuv houlu onen me-Isrel keil emun asan sanien one min me-Asiria keil enek. Sakini, me-Asiria keil enek arpurun ramat entei keil. Asuv houlu tai onen me-Sudah keil, koa isen Ehas, kei mun mumoni keke asuv houlu ten out Asiria namaitei napurun meatin keil onen.

Sua houlu muli, ka asuv houlu hau tai mai losil kat me-Isrel keil, isen Hosea. Kei sakin asuv houlu Salmanesa ten out Asiria tin katiat. Sakini, kei mai ral min meatin tavaeen keil onen, avuli kati, ka alingi va en eim takeih.

15 

Copyright information for `PMA