2 Peter 2

Ahi Hesan Hakot min Tiser Keil Taliluvosien ka Koakeil Amusil Keil

Ka en avong mulamu, provet keil taliluvosien akistal luhu en me-Isrel keil. Ka en vati sakien enek, tiser keil taliluvosien ikistal luhu en kami. Keil ikur lelau en hihiseien taliluvosien keil koa heleh mahien en koakeil amusili. Ka koa tisa mok, keil ihiles eisile ran Asuv Iesu koa vul lat keil amaluv ran tisaen one. Sakini, keil amul aleh kekerat mahien mai en keil eris en avong keil ilomal en meten Ahi. Meatin houlu usil sise ten saktisaen keil one. Ka ven tisaen keil koa amumoni, meatin sav keil iselus hetisa kat Sise ten Anatinien koa romusili. Tiser taliluvosien keil enek avi metenan ka ipurun kami hetal min tunien keil enges koa amumoni keke avaleh mane ran kami eni. Avong taveah tuai, Ahi sak mese keke vasan hakot min keil. Anatin, kei koa mul san hakot min meatin keil sakras vamatil, hesan mahien min keil ka hesakin keil ivupuol varei.

Ahi hesan mahien min tiser keil enek hesuval koa mumoni en avong mulamu. Kei rolokoveintei angelo keil avalaia en tisaen keil one ka rovuli kattei mahien ran keil veni. Vuo, kei son keil uva en Vulvul koa keite teni tovuol ka par kat keil en sen takeih keil keke avato en mankoli, avatosin Avong ten Hakot.
2:4 Hesuval Rev 20:1-3
Ka en vati sakien koanek, en avong onen Noah, Ahi rolokoveintei meatin keil avalaia en tisaen keil one ka rovuli kattei mahien ran keil. Vuo, kei san mari oai mai mutaluh koe out netan keke vou vini meatin tatisa keil enek. Noah san selusien koa rie sise ten maluen min meatin keil, ka aseseini. Sakini Ahi mutut Noah enges ral min onen keil oulu (7) keke armattei.
2:5 Lesi en Senesis 6:1-7,24
Ka en avong onen Lot, Ahi san hakot min meatin keil koa amul en mari taon keilu ten out Sodom ka Komorah. Anatin, san ahang mai kan lin tounah vasi keil koa mul en keilu va vio ... lumai luvi meas enges.
2:6 Lesi en Senesis 19:24
Kei mumoni mukonek keke meatin sav keil ilei kilea keite ten koakeil amum tisa.
Ka Lot, Ahi mututi veni sakien onen mal en meten ka kei longe tisa ven sakkalkalien onen meatin keil koa asesein more mengkatien keil.
2:7 Lesi en Senesis 19:1-16
Anatin, Lot koa mal ro ral min keil, ka avong vasi enges, kei les sakkalkalien keil one ka long selusien tatisa keil one. Ka veni ualien onen Lot mal, sakien keil one vesesal vasakin kei vahi vau eni. Sakini, rolei kilea keke Ahi kilea mukave voutut koakeil amum mal ran sakvisien keil one, ka kilea emun vasan hakot min koakeil amum tisa keke il ikur mahien one hetokol navong ikur vasin mahien one en Avong ten Hakot. 10 Anatin, Ahi hesan hakot min meatin vasi keil koa amum tisa, ka min koakeil emok amusil saktisaen keil koa ave envati voumoni ka asesein koakeil alosil kat keil.

Tiser taliluvosien keil enek, vatie keih ka armetautei keke avaselus karen koakeil avi hetetamen imok en out netan ka out nesa emun.
11 Ka angelo keil emun, avaseini akur keihoen ka hetetamenien mulin tiser keil taliluvosien enek, armumontei vati sakien one. Vuo, en meten Ahi Asuv, arsan etai selusien tatisa vaha kat angelo sav keil. 12 Ka tiser keil enek aselus karen tounah keil koa arkileatei. Asuval tirendan keil koa ileilien one tovuol koa amusil tounah koa ave enges envati. Tiser keil enek imatmat en vati sakien koa tirendan keil amoul keke meatin keil avuli kat keil ka amu vini keil. 13 Anatin, Ahi hesa kes mahien min keil housil mahien koa keil asani min meatin sav keil. Asi keil enges avoumon saktisaen keil one en meneai. Navong tiser taliluvosien keil enek umai akanian vituai ral min kami en ale onami, asuval amus ka manu koa vite vo veni amules amumon saktisaen keil one, ka memouen one tovuol varei. 14 Keil amai kat keil ven tisaen lises ka evati mok avasak tisa vatal min ahin keil vasi koa alesi. Amulamun meatin keil amemerau en demkatien one uva en sise ten tisaen. Ka avisein revi keil eris en sakien ten metenan. Koakeil enek amul en sesendaen onen Ahi. 15 Keil alokovein sise koa mal ka ale ras sise one. Amules amusil sise onen provet Baalam, natin Beor, koa kei si vakur mane ven tounah tisa koa mumoni.
2:15 Nam 22:1-35
16 Ka ven sakien tatisa enek, Ahi sel kati ka en ongen dongki osen. Anatin, Ahi sakin tirendan kuren enges, koa sakras vaselus, keke selus en rea suval meatin keke vating koe provet enek noumontei mun sakien ten vau onen.

17 Tiser keil taliluvosien enek aviten tounah enges, ka asakras esuk avoumoni. Asuval vulioai keil koa amemes. Asuval mahmah heisavos koa eang mul muhi, ka rosantei ous vous. Ahi ling kat out one en mankoli koa malikelik vis malikelik emok. 18 Avut keil en selusien one, ka selusien one vi heisav enges. Ka aluvos meatin keil avit tahos avoumon saktisaen keil koa ave envati. Ka en sakien enek, amul aleh koakeil avi heite hau en demkatien keke avavuol eris en saktisaen keil vasuval meatin keil koa akalkali. Ka saktisaen keil enek avi vati sakien koa amaluv rani rovitei tuetin. 19 Tiser keil taliluvosien enek avat kati keke itie lat sise ten maluvien min meatin keil, ka tiser keil enek, sakien tatisaso mul par kat keil ka mul sakin keil armaluvtei. Anatin, keil avi slev ten saktisaen keil one koa mul purun keil, veni meatin vi slev ten tounah koa vi masta en moulien onen. 20 ?Ka mukave en koakeil enek akilea tuai en Iesu Kristo, Asuv orer, koa sakin keil amaluv ran viau ten sakien tatisa keil ten out netan, ka evus, amaen ris sakien tatisa keil enek vihi kat keil eris? Meatin keil enek ihotini keke moulien one hetisa mok helin avong koa mulamu. 21 Veni mahien koa keil ikuri ven aviles ran mengkatien votut onen Ahi koa komai eiloheh keil mesani min keil hehi houlu mok helin munak arvarkileatei sise ten maluen enek. 22 Asa koa amumoni mul rie lati keke selusien keilu ten meteisauen koanik luvi anatin koa luvit,

“Huli tai mul va ris kan luon”
2:22 Prov 26:11
ka
“Vuas koa amukul moteini mul va ris mukul en tan melmel.”
Copyright information for `PMA