2 Thessalonians 1

Inau, Pol, ral min Saelas ka Timoti, metmutis leta ekek vat min kami, meatin keil koa mivi onen Ahi Tamer ka onen Asuv Iesu Kristo koa mimul en sios ten out Tesalonaeka. Metvis Ahi Tamer ka Asuv Iesu Kristo luhesan more envatien ka tomat onealu hel en moulien onami.

Pol Vit Luvat Mukave Iesu Hemai Ris Eni ka Houmon Kot en Meatin Vasi Keil

Tuameitel ka ahinameitel keil, lises metmasmas Ahi ven kami. Ka mal keke metvoumoni vamukonek veni demkatien onami mul mai keih imok ka envatien koa tetai en kami mirie lati ven meatin sav keil mul moul marite. Sakini, komeitel metvasi kami min kristin keil en sios vasi keil onen Ahi. Metrun min keil usil kami, mukave mimul mimulomal keih en demkatien onami, avaseini sakvisien keil ka mahien keil koa mimul mikuri.

Demkatien takeih onami navong sakvisien keil umai ven kami mul rie lati keke navong Ahi houmon kot en meatin keil, houmoni en sakien koa mal revi. En avong enek kei hehitehiteni keke mivinvin keke miheto hetal mini veni mimul mikur mahien ven hiasuvien onen. Ahi houmon asa koa hemal, ka hesa kes mahien min koakeil asan mahien min kami. Ka kei hesan sehien min kami koa mimul mikur mahien ka min komeitel emun. Houmoni en avong Asuv Iesu hekistal ran out nesa hetal min angelo takeih keil onen. Keil imita hetal min ahang takeih keke avasan mahien min koakeil asesein Ahi ka koakeil arlong kattei more longlongien usil Asuv Iesu. Navong Ahi houmon kot en keil, hesan mahien koa sakras vavus min keil. Hemukonek, keil ito soutin ran hetetamenien ten keihoen onen Asuv Iesu lises ka lisenges. 10 Tounah keil enek hekur out navong kei hemai keke meatin keil onen ihati lat isen hehina nesa. Anatin, koakeil akul anatin eni ilesi ka iti manin en hetetamenien onen. Ka kami mun miheto hetal min keil veni mimul mikul anatin en selusien koa komeitel metviteni min kami.

11 Ka veni emeitelvati mok miheto hetal min koakeil enek, lises metvis Ahi orer voumon kami mivavinvin mivakur moulien koa kei vise kami mivakuri. Metvisi mun hesan keihoen min kami keke mihoum vasin tounah keil koa tahos emivati mivoumoni veni miling demkatien onami en Iesu Kristo. 12 Metmul metvis ven tounah keil enek keke koakeil ales asa koa Asuv Iesu mul mumoni en moulien onami ihati lat isen. Ka kei suk hehati lat isomi. Metkilea keke tounah keil enek hekur out ven more envatien onen Ahi orer ka Asuv Iesu Kristo.

Copyright information for `PMA