Daniel 1

Ahi Vati Lat Meatin Hau Ehat (4) ten Out Isrel Keke Umai Amum min Asuv Houlu ten out Babilon

Daniel 1:1-21; 2:48-49

Navong asuv houlu Sehoiakim losil kat me-Sudah keil sua etel (3), asuv houlu Nebukanesa ten out Babilon mai ka mumon vaeen ral min keil ka meatin onen keil aka rahit koe taon ten out Serusalem. Ahi Asuv maen asuv houlu Sehoiakim ten out Sudah va en hen me-Babilon keil enek. Sakini, meatin tavaeen keil onen asuv houlu Nebukanesa umai alah tounah keil tetahos koa mul en Eim Votut onen Ahi. Akuri ka alingi en out koa aling revi tounah keil tetahos en eim onen ahi one keil en out Babilon.

Evus, asuv houlu Nebukanesa meng kat avat toumien en teim sen, koa isen Aspenas, keke vaha valei kan meatin hau keil koa atahos imok en meten koa aka en vatiamal keil onen asuv houlu keil vuo hetetamen keil ten out Isrel. Asuv houlu visi keke valei kan meatin hau keil koa nae tahos, ka tounah tovuol vakula ave. Meteisauen ka ileilien hel en keil, ka ihi vati meatin koa ikur tounah hekalah keke imai ivinvin avoum en mari eim omon asuv houlu. Ka asuv houlu Nebukanesa viteni min avat Aspenas vahisein keil en sakien tahulhulien ka tatisien en selusien Arameak, selusien onen me-Babilon keil. Asuv houlu meng kati mun keke helei kat revi keil ka hesan tei anien ka uaen min keil hesuval asa koa koakeil amul en mari teim sen asuv houlu amul akuri. Ka navong ihisein keil sua etel (3) hevus, keil iha um min asuv houlu.

En meatin hau keil enek koa alei kan keil, etel en keil telka en mari vatiamal onen Sudah, iseatel Daniel, Hananaea, Misel, ka Asaraea. Avat Aspenas viles iseatel mukok: min Daniel, ling isen vi 'Beltesasar', min Hananaea, ling isen vi 'Sadrak', min Misel, ling isen vi 'Misak', ka min Asaraea, ling isen vi 'Abednego'.

Ka Daniel, kei mumon rendemien onen keke aven hetolas en meten Ahi. Sakini, kei vit herkantei anien vuo hermuntei uaen koa ka en teim omon asuv houlu koa romutotei en meten Ahi. Sakini vis avat Aspenas vakatauni. Avaseini keke Ahi sakin avat Aspenas rendem tahos en Daniel ka enmahisi, 10 viteni min Daniel vit, “Vuo, nasakras eli, veni nametaun asuv houlu onak. Veni kei enges rie lat anien sa koa miheani ka uaen koa mihemuni. Ka munak helesi keke avem hetisa mok en meatin hau sav keil ekek, kei hou vini nau nimat.”

11 Sakini Daniel va selus ral min meatin taleikokoeien koa avat Aspenas rie lati valosil kat kei ral min Hananaea, Misel ka Asaraea. Daniel viteni mini vit, 12 “Komaitel metpeahik eli keke kovasak vis komaitel avong halualim (10). En avong keil enek, kisan anien hon koa vuseri tovuol ien metheani hetal oai enges methemuni. 13 Hevus, kilei vis avemaitel ral min meatin hau sav keil koa amul akan anien koa asuv houlu meng kati keke avani. Hevus, kilei visi hemukave.” 14 Sakini, maen keitel telhoum visi hetokol avong halualim (10).

15 Navong avong halualim (10) muli, meatin taleikokoeien enek lesi keke aveatel keih ka tahos imok mulin koakeil akan anien koa asuv houlu meng kati. 16 Ven sakien koanek, kei maen keitel keke lises telheanian hon enges hemukonek, ka rosantei mun anien ka uaen koa asuv houlu meng kati min keil.

17 Ka min keitel, Ahi san ileilien ka meteisauen ten hihiseien keil, tus keil ka selusien keil onen me-Babilon keil. Ka min Daniel, Ahi sakini mun kilea vahit luvat aneite ten leisanien ka matilvovoien keil.

18 En keite ten sua etel (3) koa asuv houlu meng kati, Aspenas lah meatin hau vasi keil avamai avalomal en meten asuv houlu Nebukanesa. 19 Ka navong asuv houlu sak vis keil vasi en selusien evus, votini keke Daniel, Hananaea, Misel ka Asaraea, keitel teltahos imok mulin teisav keil en hihiseien keil vasi. Sakini, kei rie lat keitel telvamai telvoum mini. 20 Ka en tounah vasi keil koa asuv houlu vis keitel eni, kei votini keke ileilien ka meteisauen oneatel vi halualim (10) nesa mok mulin onen koakeil alei kilea en sise ka onen lingling temat keil koa amul en out vasi koa kei losil kati.

21 Ka Daniel mul mum avong taveah va rokol avong koa Saeros mai vi asuv houlu.

Copyright information for `PMA