Daniel 5

Ahi Mutis Selkatien Tai va min Asuv Houlu Belsesar

Daniel 5:1-9,13-31

En avong tai, asuv houlu hau tai koa isen Belsesar, kei mumon mari ale tai ka sisil en avat keil taosen tai (1000) onen me-Babilon keil keke avamai. Ka navong umai alah ruai, asuv houlu enek mul munmun ral min keil. Navong amul amunmun, uaen muas asuv houlu Belsesar ka meng kat tei en meatin keil onen keke avaha avalah vanikin ka pesin keil koa amumoni en gol ka silva, veni envati vamunmun en kap keil enek vatel min avat keil, ahin kati keil, ka ahin savsav keil onen. Tounah tetahos keil enek, tata onen koa vi asuv houlu Nebukanesa lah lati ran Eim Votut onen Ahi en out Serusalem. Rovitei tuetin, alah vanikin ka pesin koa amumoni en gol ka silva umai. Ka keil vasi amunmun eni. Ka navong amules veah amunmun, asan masmasien va min ahi keil one koa avi nana enges koa amumoni en gol, silva, brons, aean, ahat ka ai.

Hatte tas, hen meatin tai mai kistal ka mutis selusien tai luhu en vali eim omon asuv houlu. Navong ahe enek mul mutis, asuv houlu Belsesar les vareini veni out enek muto ka laet mul ritin eni. Ka navong lesi, kei metau houlu, aven mai memerau ka alen maleilei. Sakini, vise kekarat meatin tai onen vaha valah koakeil alei kilea en sise, eimas keil, koakeil alei kilea asa hekur out ka en hitu, ka lingling temat keil emun umai veni.

Navong meatin keil enek umai veni, asuv houlu viteni min keil vit, “Munak etai en kami kilea vahuli revi tisien ekek ka vahit luvat aneite teni minau, inau nisin en kei en momore eisin tai hesuval koa asuv houlu keil enges amul amusin eni. Hevus, nuani en sen ten houhouen tai en hiren koa vi gol. Hevus, numoni hemai hehi hetetamen imok helin meatin savsav keil vasi en kantri onak. Inau nges komal mama onak melhehi houlu melhelin kei.”
Ka navong keil umai ales tisien enek, asakras avahuli vuo avahit luvat aneite ten selusien teni. Navong asuv houlu Belsesar raengoni, kei metau houlu ka aven mai memerau. Ka avat keil onen emun areingeingeni umon sa.

13 Evus, amulamun Daniel mai ven asuv houlu Belsesar. Ka asuv houlu viteni mini vit, “?Anatin keke keik kovi Daniel, koa tata onak, Nebukanesa, kulatuk ran kantri ten out Sudah keke komai koro en out ekok? 14 Naraengoni keke ninin onen ahi savsav keil asienuk ka ileilien ka meteisauen mul enuk ka kolei kilea en sise ten tounah vasi. 15 Meatin keil enek, koakeil avi meteisau ka koakeil emun avi lingling temat, inau nasisil en keil umai avuli tisien ekek, ka keil asakras avahit luvat aneite teni minau. 16 Ka nalonge keke keik kokilea kovahit luvat aneite ten tounah keil koa aro suai ka kovahit kilea tounah koa keih. Munak keik kihuli tisien enek ka kihit luvat aneite teni minau, nisin en keik en momore eisin tai hesuval koa asuv houlu keil enges amul amusin eni. Hevus, nuanuk en sen ten houhouen tai en hirem koa vi gol. Hevus, numonuk kimai kihi hetetamen imok helin meatin savsav keil vasi en kantri onak. Inau nges komal mama onak melhehi houlu melhelin keik.”

17 Sakini, Daniel vit kesi mini vit, “Asuv houlu onak, kihuli kat sanien keil enek hehi onom, vuo kisani min etai meatin sav. Ka avaseini, inau nihuli tisien koanek minuk ka nihit luvat aneite teni minuk.

18 “O asuv houlu kitaengon revi, Ahi Asuv ten out nesa mumon tata onom, Nebukanesa, mai vi asuv houlu tai koa vi hetetamen imok ka san houhouen ka keihoen mini. 19 Ka ven keihoen koa Ahi sani mini, meatin keil vasi ten out netan koa aka en kantri vasi keil, vati meatin savsav keil koa aselus en selusien vasi keil, keil vasi ametauni ka amaleilei en meten. Navong tata onom vit vou vini meatin tai vamat, muasi varei. Ka navong vit vamaen meatin vamoul, maenis moul. Kei san houhouen min koakeil envati vahouhou min keil, ka koakeil envat keil avamemou, kei mumonis.

20 “Ka veni kei vati lat kei sasen enges en rendemien onen ka mum tisa min meatin sav keil veni kei mul vuvuti, Ahi so lati ran vulin ten keihoen onen ka kulat isen ten houhouen rani. 21 Alikati lokovein meatin keil, ka rendemien onen mai suval tirendan tai enges. Kei va ro ral min dongki rendan keil, ka kan oumunae suval buluk tai. Kei matil en mesaiuai ka tilep kasi. Ros mukonek rokol avong koa rendem kilea suk keke Ahi ten Keihoen enges mul losil kat tounah vasi en out netan ka kilea vatie lat meatin sa koa kei envati vasan losil katien teni mini.

22 “Ka keik, o Belsesar, koa kovi natnali, avaseini kokilea revi en tounah keil enek, kormumontei rendemien onom vaha netan. 23 Keik kovati lat sasom enuk enges kovit kovahi nesa mok valin Ahi ten out nesa. Keik kolah vanikin ka pesin keil koa alahi ran Eim Votut onen Ahi keke kami vasi mimunmun eni: keik, avat onom keil, atou kati onom keil, ral min ahin savsav keil onom emun. Ka navong mimumoni mukonek, misan masmasien vat min ahi keil onami koa avi nana keil enges koa amumoni en gol, silva, brons, aean, ahat ka ai. Ahi keil enek avi ahi kuren keil enges koa asakras avalele, asakras avalonglong, ka asakras availea etai tounah. Ka keik, korvouhoutei min Ahi koa moulien ka ualien onom mules en hen.

24 “Veni komumoni mukonek, Ahi san hen meatin enek vamai vatis selusien enek. 25 Tisien koanek, selusien teni mukok:

MENE, MENE, TEKEL, PERES

26 Ka aneite teni mukok:

Mene - aneite teni vi 'hulien'. Ahi vuli lat avong keil ten losilkatien onom, ka sakini mai rokol keite teni.

27 Tekel - aneite teni vi 'sikel'. Kei sikel enuk ka votini keke korvinvintei en meten.

28 Peres - aneite teni vi 'riti vasi'. Ahi riti vas losilkatien onom ka sani suk min me-Mid keil ka me-Persia keil.”

29 Navong Daniel selus evus, asuv houlu Belsesar meng kat meatin toumien keil onen umai. Keil amusin en Daniel en momore eisin tai suval koa asuv houlu keil enges amul amusin eni. Evus, amuani en sen ten houhouen tai en hiren koa vi gol. Evus, asan longlongien ka vasi out keke Daniel, amumoni mai vi hetetamen imok helin meatin savsav keil vasi en kantri ten out Babilon. Asuv houlu keilu mama onen enges luvi houlu lohlin kei.

30 Ka en hati vongien enek, asuv houlu Belsesar ten out Babilon, amu vini mat. 31 Evus, Derias ten out Mid kur vulin mei losil kat kantri onen. Sua onen Derias vi hanumau etel ka elu mun (62) navong mai vi asuv houlu.

Copyright information for `PMA