Daniel 6

Ahi Ring Koe Daniel en Vulvul Omon Laeon Keil

Daniel 6:1-28

Navong Derias mai vi asuv houlu, kei rie lat minista keil onen avi handred tai ka hanumau tai emun (120) keke avalosil kat out vasi koa mul en hen. Evus, rie lat Daniel ral min meatin elu mun keke avamai avahi avat keitel onen minista keil enek avoum en usite onen asuv houlu Derias ka avalosil kat revi tounah vasi keil onen vasakini varmundemkotei ven etai tounah.

Rovitei tuetin, asuv houlu lesi keke umen onen Daniel tahos imok mulin umen onen avat sav keilu ka onen minista sav keil emun veni ninin tetahos mul ien. Sakini, asuv houlu Derias mundemi keke tahos heling Daniel helosil kat tounah vasi koa mul en hen. Sakini, avat sav keilu ka minista sav keil emun avi elu kati. Keil asak avahotin tounah koa Daniel voumoni vatisa, ka asakras veni umen vasi keil onen Daniel tahos ka romumon etai tounah vatisa.

Evus, en avong tai, hetetamen keil enek aviteni min keil eris avit, “Ir rosakras rovahotin etai tounah koa Daniel voumoni vatisa. Ka vahesa rehehotin tounah tai koa rokilea rovahuli kati en usite ten mengkatien keil onen Ahi koa kei mul va netan mini.”

Sakini, uva ales asuv houlu ka aviteni mini avit, “O asuv houlu Derias, isom vina nesa vis vina nesa mok, moulien onom hetaveah. Komai vasi koa korie lat komai memum suval hetetamen keil onom, memai en rendemien tas. Memundemi mevit tahos imok munak keik, asuv houlu, kumon mengkatien tai koa vit meatin keil vasi iha netan ka ihis minuk enges avong hanumau tai ka halualim emun (30). Ka munak meatin etai heha netan vuo hehis min ahi sav tai, ison meatin enek heha en vulvul omon laeon keil. O asuv houlu, munak kimaeni, mevisuk keke kitis rendemien koanek hemai hehi mengkatien tai ka kitis isom hel ien. Hesakini, musil sakien ten mengkatien keil orer ten out Mid ka Persia, meatin hetovuol hehilesi vuo hekulati.” Sakini asuv houlu Derias maen keil amutis lat mengkatien koanek ka kei ling isen mul ien.

10 Ka Daniel, avaseini keke kei raengon longlongien usil mengkatien koanek, mules musil sakien ten hisien va min Ahi onen. Anatin, en out tai nesa en teim sen, vesesal en windo tai koa mul en usite koa viles va en out Serusalem, kei mul vis ka mul masmas Ahi hatte etel (3) en avong vasi keil, musil sakien koa mumoni tuetin tuai. 11 Avong tai, vativieh keil onen Daniel umai akistal veni ka avotini keke Daniel mul vis min Ahi onen ven kataunien. 12 Sakini, keil vasi uva ris ven asuv houlu ka avis usil mengkatien onen avit, “!O asuv houlu! ?Vi anatin keke keik komutis isom mul en mengkatien tai koa vit meatin keil ihis minuk enges avong hanumau tai ka halualim emun (30)? Ka musil mengkatien onom, meatin koa mul vis min ahi sav tai vuo meatin sav tai en avong keil enek, isoni heha en vulvul omon laeon keil.”

Ka asuv houlu vit kesi min keil vit, “!Anatin! Mengkatien koanek mul ka asakras avahilesi musil sakien ten mengkatien keil onen me-Mid keil ka me-Persia keil.”

13 Ka keil avit usil Daniel mini avit, “Daniel, koa akulati ran out Sudah, kei mundem maenuk, asuv houlu, ka kei romusil kattei mengkatien onom koa komutis isom mul ien. Kei mules musil sakien ten hisien va min ahi onen hatte etel (3) en avong vasi keil.”

14 Navong asuv houlu raengon selusien one, mundemko houlu. Sakini, mul lei kat etai sise vakatau Daniel eni. Mul sakvisi va vio ... meteiai munu.

15 Evus, vativieh keil onen Daniel umai ris ven asuv houlu ka aviteni mini avit, “O asuv houlu, kokilea tuai keke, musil sakien ten mengkatien onen me-Mid keil ka me-Peria keil, meatin hetovuol hehiles mengkatien tai koa asuv houlu lingi mul.”

16 Sakini, asuv houlu meng kati keke avalamun Daniel vamai. Evus, asoni vita en vulvul omon laeon keil. Ka asuv houlu viteni min Daniel vit, “Navisi keke Ahi onom, koa kova netan mini lises, hemai houtut moulien onom.”

17 Evus, avous mari ahat tai ka aring koe metareh ten vulvul koanek eni. Evus, aling tanhili pil rahit ahat enek. Ka navong tanhili mul semau mermer, asuv houlu ral min hetetamen sav keil onen amumon metai keil ien ral min ring ten hetetamenien keil one koa ise mul ien. Sakien koanek rie lati keke meatin hetovuol hekulat Daniel ran vulvul enek. 18 Navong asuv houlu mu ris va teim sen, enrovattei vanian ka enrovattei mun meatin sav tai vahati lat rendemien onen. Ka en vongien enek, kei sakras vamatil.

19 En visokon semau, asuv houlu mea ka kalah va en vulvul omon laeon keil enek. 20 Navong mai vesesal ven vulvul enek, viso ral min demkoen vit, “?Daniel, meatin toumien onen Ahi koa moul, komoul veah? ?Ahi onom koa kuva netan mini lises, keihoen onen vinvin vakur koek ran laeon keil?”

21 Ka ren Daniel ka en vulvul enek vit, “O asuv houlu, moulien onom hetaveah. 22 Ahi onak sila angelo tai mai mumon ongon laeon keil katiloh. Sakini, keil arkat vinitei nau veni en lesien onen Ahi, inau namutolas en meten. Ka asuv houlu, inau narmumon etai tounah vatisa minuk.”

23 Navong asuv houlu raengon ren Daniel, kei si houlu veni ka meng kati keke ileh lati ran vulvul enek. Ka navong aleh lati mah nesa, alesi keke tounah tovuol varei vasut kei veni ling desien onen en Ahi onen.

24 Evus, asuv houlu meng kati keke koakeil vasi aselus tisa va kat Daniel, ihuli kat keil. Ka navong avuli kat keil evus, ason keil ral min ahin keil one ka titae keil emun uva en vulvul omon laeon keil. Ka navong arokoltei mau out netan, laeon keil uvut kat keil ka akat vulvul si.

25 Evus, asuv houlu Derias mutis selusien koanek ka sani min vati meatin savsav keil koa aselus en selusien savsav keil ka rahit kantri vasi keil ten out netan. Ka tisien onen viteni vit:

  • Amas ka tomat hel en moulien onami.
26 

  • Inau nameng kat meatin keil ten kantri vasi koa namul nalosil kati keke ihouhou min Ahi onen Daniel ka imetauni.

Veni kei vi Ahi koa moul
ka mul lises ka lisenges.
Meatin hetovuol hepurun losilkatien onen,
ka kei hehi Asuv Houlu onen meatin vasi keil heha vio ... hervustei.
27 Kei mul kataun meatin keil
ka mutut moulien keil one.
Kei mumon merikel keil ka marmari tounah sav keil emun
en out netan ka en teilang emun.
Kei varei mutut moulien onen Daniel
ran keihoen onen laeon keil.”

28 Sakini Daniel moul ka les tahosien en avong keil koa Derias vi asuv houlu, ka avong keil emun koa Saeros ten out Persia mai vi asuv houlu.

Copyright information for `PMA