Deuteronomy 34

Matien onen Mosis

Duteronomi 34:1-9

Navong Mosis selus min me-Isrel keil evus, mea ran out Moab koa vi aet, ka veou vina en hoi Vatihou Nebo nesa. Vina nesa mok en Vatihou Piska en usite va taon ten out Seriko. Ekonek en hoi hou nesa, Iahova rie lat atan vasi keil mini: atan koa hehi onen Kilead koa mul en usite koa saot rokol hakot ten atan koa hehi onen Dan koa mul soutin en usite koa not. Iahova rie lati mini atan vasi keil koa hehi onen Naptali, atan koa hehi onen Ifriem ka Manase, atan koa hehi onen Sudah, ka lesi va va vio ... rokol out koa meteiai vanu ien en Atas Medeterenia. Kei les hakot ten atan koa hehi onen Sudah koa mul en usite saot, va rokol mari aet koa mul luhu en Soar ka taon ten out Seriko koa avise en 'taon ten vati vipi keil'. Evus, Iahova viteni min Mosis vit, “Koanik vi atan koa navat kati ven Ebraham, Aesak ka Siekob keke nisani min vatiamal keil one. Namaeni kolesi soutin, ka narmaentei keik kovaha en out enek.”

Ka en out enek, en atan ten out Moab, Mosis, koa vi eiloheh onen Iahova mat musil selusien onen Iahova. Iahova rahin Mosis en poal tai en out Moab, en usite va en taon ten out Betpeor. Ka meatin tovuol vailea out kave kati kei rahini ien rokol kosa. Navong Mosis mat, heisavos keke sua onen vi handred tai ka hanumau tai (120), aven keih enges ka meten keilu tahosis. Me-Isrel keil araleh matien veni avati tai en aet ten out Moab.

Navong arangis Mosis evus, Sosua, natnali Nun, koa Mosis rokol kati, mai kur vulin. Iahova sakini vilelau en meteisauen. Ka me-Isrel keil along kat Sosua ka amusil kat mengkatien keil koa Iahova sani min keil ka en Mosis.

Copyright information for `PMA