Deuteronomy 7

“Iahova, Ahi onami, helamun kami miheha en atan koa mivaha mivato ien. En out enek, vangi meatin keil oulu (7) aro ien. Keil vasi avi houlu mok ka akur keihoen mulin kami: me-Hit keil ka me-Kirkas keil; me-Amor keil ka me-Kenan keil; me-Peres keil ka me-Hiv keil; ka me-Sebus keil emun. Ka navong mivaha en out enek, Ahi helikat rasil lin keil vasi ran out enek. Navong Iahova, Ahi onami, heling keil heha en hemi, mihou vasin keil imatmat. Anatin, navong moulien one hel en hemi, minoumontei hatkatien ten tomat natal min keil. !Vuo! Eminamahistei keil.

Minatetalihetei natal min keil ka minamaentei titami keil anatetalihetei natal min keil, veni keil akilea ilamun titami keil iha soutin ran Iahova ka imot min ahi sav keil. Munak hemukonek, hatte tas, Iahova hevuroh kat kami ka hou rasil lin kami. Hesakini mihoumoni hemukonek: ahor ten sanien one, mihou rasil lini; ahat lou keil one, mihou pahasi hemahoiahoi; ai lou keil one, miheta kokotehei; ka nana keil one, mihesoni heha en ahang. Mihoumoni hemukonek ven koa Iahova, Ahi onami, mumon kami mivi votut ka mivi onen. En vangi meatin keil ten out netan, Iahova rie lat kami keke mivi onen enges varei, miteisav ran meatin sav keil.

“Iahova rolei kantei kami ka rolingtei envatien onen val en kami veni mivi houlu mok en vangi meatin sav keil. !Vuo! Veni en out netan, mivi havivi mok en vangi meatin sav vasi keil. Ka mukos, Iahova, envatien onen mul en kami ka envat vousil kat hatkatien takeih koa mumoni ral min avu onami keil telamu. Ven koanik, kei mutut kami ka kulat kami ran hen asuv houlu ten out Isip. Sakini mihendem kati keke Iahova, Ahi onami, kei tanges vi anatin. Kei, enrovobongentei hatkatien keil onen. !Vuo! Lises kei musil kati. Koakeil evati ka amusil kat mengkatien keil onen, kei houm vasin hatkatien takeih onen ka hetie lat envatien onen min keil: min koakeil ten avong kosa, ka min koakeil ikatau veah heha vio ... keite teni hetovuol. 10 Ka Ahi roka merautei, koakeil aseseini, hesan mahien min keil hekalah. 11 Hesakini, mihelosil kat kami keke mivalong kat tounah vasi koa navisein kami eni. Hihiseien keil ka mengkatien keil vasi koa nasani min kami kosa, mihousil kati hekeih.

Copyright information for `PMA