Ecclesiastes 12

Navong mivi litetai keil veah,
tahos imok keke mihendem usil kei koa mumon kami.
Anatin, mihendem usil kei veni avong keil ten mahien mul mai en sua keil koa hemai veah.
En avong enek varei, kami mihersitei mun kami.
Navong moulien onami vesesal vavus,
hesuval meteiai, avati ka hitu keil umai avopoli,
ka mahmah keil ten ous sakras valokovein kami.
Hemi keil koa avi eikokoe en kami, imaleilei.
Alomi koa mal kosa, keil ilumpusi.
Lohomi koa mikat vahas anien ami eni,
houlu hemerahrah ka irmumtei mun hetahos.
Ka metomi koa miles tounah vasi eni,
imai keke irlei revitei mun tounah.
Ralingomi hehonhon en tounah koa mul kur out.
Miherlongtei mun souen keil vuo anien koa amul avilei.
Hisoen onen aman keil, miherlong revitei mun,
ka en menauilan, keil isilasil enuk ka ipurun matilien onom.
Mihemetau keke mivoual vuo mivaha en out tai koa vina nesa.
Hilimu hoh ka hekeih keke mivamea ran vulumi netan
veni keihoen onami hetovuol emun.
Hevus, katau en tounah keil ekek, miheha suk en out tasehien ekor onami,
ka itang ven kami en sise keil ten meteimal.

Hevus, teiai onami heha ris en atan,
ka ninin onami hehina ris ven Ahi koa sani min kami.

Selkatien Ekor

Eklisiastes 12:9-14

Meatin Tahihiseien enek vi meteisau varei. Ka tounah tamun koa mumoni, kei san ileilien min meatin keil. Kei lei kat selusien keil ten meteisauen, mundem usil aneite keil teni, ka ling revi keil en tus tai. 10 Kei sak visi vahotin selusien koa mal, evus, mutis keil keke anatinien teni vamai en mesai.

11 Selusien keil ten meteisauen enek asuval ai keil koa meatin talosilkat sipsip ien mul ring koe sipsip osen keil eni keke avoual vamal. Anatin, asuval nil keil koa amuti kat tounah eni keke voumoni vakeih revi.

12 Natkuli, kusil revi selusien keil onak veni tus keil houlumok koa meatin keil amul amutisi lisenges. Ka munak kosak kovahuli vis keil vasi keke kovakur ileilien eni, avem hemah ka hehi ten heisav enges.

13 Inau naselus en tounah vasi keil minuk, ka keite teni keiek: kihouhou ven Ahi ka kusil kat mengkatien keil onen, veni koanek vi vati rendemien koa Ahi mumonuk veni. 14 Ka Ahi helei revi en tounah vasi koa romumoni en moulien orer, koa romumoni en mesaiuai ka koa romum suai eni, tounah koa tahos ka tounah koa tisa mun. Anatin, Ahi hesan asa koa hemal minir ven tounah vasi koa romumoni.

Copyright information for `PMA