Exodus 17

Me-Isrel keil vasi amemea ran out volvol ten out Saen, umai en out tai. Evus, uva en out sav, musil selusien onen Iahova. Amumon votevav one en out tai koa avise en Revidim, ka oai tovuol en out enek koa avamuni. Keil aselus kutut kat Mosis avit, “!San oai min komai mevamuni!”

Ka Mosis vit, “?Vensa misel kutut kat nau? ?Vensa mivit mivasak vis Iahova keke hetie lat keihoen min kami lises?”

Ka meatin keil, maroro kat keil houlu ka amules aselus kutut kati ka avit, “?Vensa kokulat komai ran out Isip? ?Titiali keil onomai ka tirendan keil emun tive memes, kovit kovou vini komai en maroro?”

Sakini Mosis vis keih min Iahova vit, “?Numonsa min meatin keil ekek? Vesesal avov nau.”

Iahova viteni min Mosis vit, “Kikur hetetamen koan onen me-Isrel keil, kilah ruain keil mihelamu en meatin sav keil. Kikur kat eisal onom koa komuas Oaisal Nael eni. Nilomal vesesal ven mari ahat tai en Vatihou Saenae. En out enek, kuas ahat enek ka oai hekistal houe rani ka meatin keil imuni suk.” Sakini, Mosis mumoni mukonek en meten hetetamen onen me-Isrel keil.

En out enek aling isen 'Meribah' koa aneite teni vi 'selkututien' veni aselus kutut kat Mosis. Ka aling isen tamun vi 'Massah' koa aneite teni vi 'sakvisien' veni asak vis Iahova navong avisi avit, “?Iahova mul venir vuo romultei?”

Ahi Sakin Me-Isrel Keil Avuhu Lin Me-Amalek Keil

Eksodas 17:8-13

Navong me-Isrel keil amul en out Revidim, me-Amalek keil umai ka avit avahu vatal keil. Mosis viteni min Sosua vit, “Kitie lat tei meatin keil miheha mihouas me-Amalek keil. Visuvong, out helan, inau nikur eisal onak koa Ahi vit makuri, nihatinau en hou ke vina kei.” 10 Sakini Sosua mumon tounah suval koa Mosis viteni mini, mulamun meatin onen keil uva avuhu ral min me-Amalek keil. Ka Mosis kur Eron ka Hur, telvina en hou nesa. 11 Mosis san hen vina nesa, ka navong hen mul nesa me-Isrel keil avu mulin me-Amalek keil. Ka navong hen keilu mita ris netan, me-Amalek avu muli keil esuk. 12 Navong hen Mosis maimai, Eron keilu Hur luvous ahat tai mai mini vatondan ien. Ka keilu lumulomal en usiven keilu, lusuv kat hen Mosis rokol avong meteiai munu. 13 En sakien enek, Sosua ka meatin keil onen amu lin me-Amalek keil.

Copyright information for `PMA