Exodus 20

Ahi San Mengkatien Halualim (10) min Me-Isrel Keil

Eksodas 20:1-21

Evus, Ahi selus min meatin vasi keil en selusien keil ekek: “Inau navi Iahova, Ahi onami, koa nalah lat kami ran out Isip, out koa kami mivi slev keil enges ien.

Minahatei netan min ahi sav keil, miheha netan min inau nges.

Minoumontei nana koa nakur niniven tounah keil amul nesa en teilang, vuo amul netan en atan, vuo en huinev ten atas. Minamalinglingtei ka minahatei netan min etai nana, veni inau navi Iahova, Ahi onami, ka ekrovattei kami mivousil ahi savsav keil. Koakeil aseseinau, nisan mahien heat keil, titae keil, havine keil ka hehita hetakol titae keil one mun. Ka koakeil evatnau ka amusil kat mengkatien keil onak, nitie more envatien onak min keil ka min vatiamal one lises ka lisenges.

Minaselus entei en isok natal rendemien tisa vuo heisav enges veni inau navi Iahova, Ahi onami, ka nisan mahien min meatin koa kur heisav en isok.

Mihehuli kat avong ten Sabat ka mihehouhou eni veni kei vi votut. Avong onami heite ahetai (6) keke mihoumon umen onami keil eni. 10 Ka avong koa oulu (7) vi Sabat, avong koa miheling lati hehi onak, Iahova, Ahi onami. En avong enek, kami, titami, slev onami, tirendan esomi, ka meatin keil ten out sav emun koa umai aro ral min kami, kami vasi mihermumtei. 11 En avong ahetai (6), inau Iahova namumon teilang, out netan ka atas, ka namumon tounah vasi keil koa amul en keitel. Ka en avong koa oulu (7), namuseh. Ven tounah enek, inau Iahova narokol kat avong ten Sabat ka naling lati vi votut.

12 Mihehouhou min tata ka mama onami keil, hesakini moulien onami hetaveah en atan koa nisani min kami.

13 Minouastei meatin namat.

14 Minakurtei ahin vuo meatin onen hanu sav.

15 Minahenantei tounah onen meatin sav.

16 Minoumontei luvosien naha kat isen meatin sav.

17 Envatien onami nalentei eim mon hanu sav, vuo ahin onen, vuo slev onen, vuo tirendan esen, vuo dongki esen, vuo tounah sav keil onen.”

18 Navong meatin keil araengon voulul ka amaru koa musel keih, ka ales ahil vil ka rupas mul en vatihou, keil amaleilei en metauen ka amulomales soutin. 19 Keil aviteni min Mosis avit, “Munak keik kos kiselus min komai, mihetaengonuk. Ka munak Ahi heselus eris min komai, mihematmat varei.”

20 Mosis vit risi min keil vit, “!Minametautei! Ahi mita netan enges keke voumon kami mivailea keihoen onen, hesakini, mihelong kati lises, ka mihermumontei mun tisaen keil.” 21 Ka meatin keil amulomales soutin, ka Mosis enges mual va vesesal en out koa Ahi mul ien, en mari mahmah koa malikelik.

Ahi San Mengkatien Sav Keil min Me-Isrel Keil

Eksodas 21:12-17; 22:16-27; 23:1-2

En vatihou nesa, Ahi selus min Mosis ka viteni mini mengkatien tei mun keil keke vahit meseni min meatin keil.

Copyright information for `PMA