Exodus 24

Ahi Mumon Hatkatien Takeih Ral min Me-Isrel Keil ka Keil Avit Ilong Kati

Eksodas 24:3-8,12-18

Navong Iahova selus mini evus, Mosis mita ris ven meatin keil ka vit meseni min keil mengkatien ka selkatien vasi keil enek. Ka navong alonge, keil vasi aviteni avit, “Mehoumon tounah vasi keil Iahova viteni.” Mosis mutis kat mengkatien vasi keil onen Ahi vaha en Tus ten Hatkatien Takeih onen Ahi. Out mulan, en visokon semau, kei kur ahat keil ka mumon avet tai ten sanien en tave Vatihou Saenae. Evus, kei vati lat mari ahat teindan elu (12) amulomal, vinvin ven vatiamal keil onen me-Isrel keil keke hehi imesien ten hatkatien. Evus, sila meatin hau keil koa uva amuas tirendan koa, ka amunit lin keil en ahor ten sanien vaha min Iahova. Evus, akur tirendan koa mun, ka amumon sanien keil talahruaien eni.
24:5 Sanien koa amunit lini amumoni ven Ahi enges. Ka sanien ten lahruaien ariti lini va min pris keil ka meatin sav keil hesuval amul akanian ral min Ahi.
Mosis sien lelat ran tirendan keil enek, ka hatte tai va en pesin keil, ka hatte tamun, mutitil eni va kat vali ahor ten sanien. Evus, kur 'Tus ten Hatkatien Takeih' koa mengkatien keil onen Ahi amul ien, ka mul vuli en meten meatin keil avalonge. Vuli vus, keil avit, “Mengkatien keil vasi onen Iahova, mihelong kati, ka mihousil kat selusien vasi keil onen.”

Navong aviteni mukok, Mosis kur ara koa mul en pesin keil ka mutitil eni ka vasi meatin keil ka vit, “Koanik vi ara koa san keihoen min hatkatien takeih koa Ahi mumoni ral min kami en avong koa miviten selusien keil ekek.”

12 Evus, Ahi viteni min Mosis vit, “Ama nesa en vatihou venau. Ka navong kito kele, nisan ahat elu minuk koa namutis mengkatien keil eni koa vahi selkatien onen meatin keil.” 13 Sakini Mosis kur meatin tai takataunien onen, isen Sosua, lusak mesen keilu keke luvahina en vatihou onen Ahi. 14 Mosis viteni min metai keil vit, “Kami miheto ekok hetakol avong melhemai ris. Eron keilu Hur luheles hetal kami, ka meatin etai koa envati vamal en selkututien onen en kot kilea vaha ven keilu.”

15 Evus, Mosis vina en Vatihou Saenae ka mahmah mutaluh koe. 16 Muohien onen Iahova mita netan en hoi hou nesa. Kei vilahil houlu ka me-Isrel keil amul netan alesi suval ahang rekau en vatihou nesa. Mahmah mutaluh koe vatihou enek avong ahetai (6). Ka en avong koa oulu (7), ren Ahi kistal en mahmah vise Mosis vahina veni. 18 Sakini Mosis vina nesa en vatihou, va neim en mahmah enek. Mules en out enek avong hanumau elu (40).

Copyright information for `PMA