Exodus 3

Ahi Selus Min Mosis

Eksodas 3:1-15

Avong tai, Mosis mul lei kat sipsip ral nani keil esen avu tisa onen koa isen Setro koa vi pris tai onen me-Midian keil. Mosis mulamun keil amu koteh out volvol ka uva vesesal ven Vatihou Senae koa vi votut onen Ahi. Ekonek, angelo tai onen Iahova kistal veni suval ahang koa mul rekau en holeai tai. Mosis lesi keke ahang enek mul mukan ka rokantei varei holeai koanek. Kei mundemi vit, “!Koanik vi tounah sal tai! ?Vensa ahang rokan lintei holeai enek? Maha vesesal malei visi.”

Navong Iahova les Mosis mul mai vesesal, vise ka en holeai enek vit, “!Mosis, Mosis!”

Ka Mosis vit risi mini vit, “?O-o, inau ke li.”

Ahi viteni mini vit, “Konamaitei vesesal. Kulat sandel onom veni atan koa komulomal ien vi votut. Inau navi Ahi onen avu onom keil: onen Ebraham, onen Aesak ka onen Siekob.” Navong longe mukok, Mosis kur koe nan veni ulin metau vales Ahi.

Evus, Iahova viteni mini vit, “Nales mahien onen meatin keil onak en hen me-Isip keil. Nalong tangien one ven avat toumien one keil amumoni keih min keil. Anatin, inau nakilea mahien keil vasi one, sakini namita netan malah lat keil ran hen me-Isip keil. Nilamun keil iha en out tai koa tahos imok, out koa amas mul ien. Atan koanek, kosa meatin sav keil ekek amul ien: me-Kenan keil, me-Hit keil, me-Amor keil, me-Peres keil, me-Hiv keil, ka me-Sebus keil emun. Avaseini, nikulat keil ka nisani suk min me-Isrel keil. Nalong tangien onen meatin keil onak ka nalesi mukave meatin keil ten out Isip amul apurun keil en umen takeih. 10 Sakini, kosa, nisilak kihita ven asuv houlu ten out Isip keke kovalah lat meatin keil onak ran kantri onen.”

11 Ka Mosis viteni min Ahi vit, “Inau navi meatin kuren enges. Nasakras maha ven asuv houlu ka malah lat me-Isrel keil ran out Isip.”

12 Ahi vit kesi mini vit, “Inau ialu minuk. Ka navong kilah lat meatin keil ran out Isip, kilamun keil mihemai en vatihou koanik ka kimot venau. Hemukonek, keik kilea keke inau nasilak.”

13 Ka Mosis vit risi mini vit, “?Ka munak niha ven me-Isrel keil ka nihiteni min keil nihit, 'Ahi onen avu onami keil, kei sila inau numai ven kami,' ka keil ihis inau ihit, '?Isen isei?' ka nihiten sa min keil?”

14 Ahi viteni mini vit, “!Inau, NAVI! Kiha kihiteni mok min keil kihit, 'Koan isen Iahova koa aneite teni vi 'NAVI,' kei sila nau numai ven kami.' Kihiteni min keil keke Iahova sanuk kuva ven keil. Inau, Iahova, navi Ahi onen avu one keil: onen Ebraham, onen Aesak, onen Siekob. Iahova hehi isok, hel sesuk, ka koakeil ikatau en kami ihise nau eni.”

Navong Mosis selus min Ahi evus, va ris teim ka sak mesen kei vaha Isip. En sise vaha Isip, visu min tunali koa isen Eron koa Ahi sila veni. Mosis viteni mini tounah keil koa Ahi mumoni mini. Evus, luva ven hetetamen keil onen me-Isrel keil, ka asi keil keke Ahi les mahien one ka san meatin tai vakataun keil.

Ahi Rie Lat Keihoen Onen min Me-Isip Keil

Eksodas 11:1-8

Navong Mosis keilu Eron lurokol Isip, luva lules asuv houlu. Ka luviteni mini luvit, “Ahi sila komal melmai melvahiteni minuk kovamaen meatin onen keil, me-Isrel keil, avaha en out volvol keke avoumon sanien votut vahina mini.”

Asuv houlu viteni min keilu vit, “!Vuo, me-Isrel keil asakras avalokovein umen one!”

Sakini Ahi mumon tounah tatisa houlu vakat meatin keil ten out Isip. Tai mulamu, evis teisav tamun:

1) Oaisal Nael viles vi ara.

2) Frog keil umai avi houlu en out vasi.

3) Out keil umai avi houlu en aven meatin vasi keil ka tirendan emun keil.

4) Neno tatisa keil umai avi houlu vis avi houlu mok akat meatin keil.

5) Houlu en tirendan keil esen me-Isip keil umatmat, ka esen me-Isrel keil armattei.

6) Utua kikistal en meatin keil ka tirendan emun keil.

7) Ous mus houlu ka heitil teni mai suval merali laklas keil, abon meatin keil ka tirendan keil amul hae umatmat.

8) Kal tatisa keil umai avi houlu ka akan vasi anien en ah keil ese.

9) Mankoli mai mutaluh koe out vasi avong etel.

Avong vasi, asuv houlu vit hemae lat me-Isrel keil ihaha munak Ahi hekulat tounah tatisa ran keil. Ka navong vasi koa Ahi kulati ran keil, asuv houlu viles rendemien onen, romaentei keil avaha. Evus, Ahi vit houmon tounah tamun koa hehi mahien ekor teni.

15 

Copyright information for `PMA