Ezra 3

Me-Isrel Keil Uva Ris Serusalem ka Amum Revi Eim Votut Onen Iahova

Esra 3:1-3,7-8; 6:14-16

Me-Isrel keil uva ris en out kati one ka aling revi tounah keil one. Evus, en avati koa vi oulu (7) en sua koanek, keil vasi umai alah ruai out tas en taon ten out Serusalem. En out enek, Sesua (natin Sedosadak), pris sav keil, Serubabel (natin Seltil), ka tunali sav keil emun, keil amum revi ahor ten sanien votut onen Ahi onen me-Isrel keil. Amumoni keke avanit sanien votut keil onen vaha min Ahi vasuval koa Mengkatien keil onen Mosis koa vi meatin onen Ahi viteni. Avaseini keke ametaun meatin savsav keil koa aro en out keil aka rahit keil, me-Isrel keil amum revi ahor onen Ahi en out kati koa mul ien mulamu. Evus, en visokon ka mendilah vasi keil, umai amunit ris sanien votut keil one ien.

Me-Isrel keil asan mane one keke avahul kapenda keil ka koakeil emun aling sosorin ahat keil ten eim. Evus, keil alah ruain anien, uaen ka oel ten olip mai out tas, ka asani min me-Taer keil ka me-Saedon keil keke sip keil one avalah vati sida keil ran out Lebanon ka avasoni vaha ut en out Tsopa vasuval koa asuv houlu Saeros ten out Persia meng kati.

Navong avati oulu (7) muli va, Serubabel, Sesua, ral min pris sav keil ka koakeil emun akistal en vatiamal onen Livae, aling rendemien one keke avoum ris Eim Votut onen Iahova en out Serusalem. Sakini, arie lat meatin vasi keil koa akistal en vatiamal onen Livae koa sua one mulin hanumau tai (20) keke avalosil kat me-Isrel sav keil koa um en Eim Votut enek. Navong asak mesen tounah keil enek evus, me-Isrel keil umai alah ruai out tas ka amum rohtoh en umen hau ten Eim Votut onen Iahova.

Copyright information for `PMA