Genesis 21

Hatkatien Onen Ahi Mai vi Anatin ka Ebraham Kur Natnali koa Aesak

Senesis 21:1-21

Suval koa Iahova vat kati, rokol kat Serah. Sakini kei meas ka mal en avong koa Ahi vat kati, kur titan. Anatin, navong Ebraham vi ulmatu tuai, Serah kur ehon tai onealu. Ebraham ling isen vi 'Aesak' koa aneite teni vi 'viteai'.
21:3 Ebraham ling isen 'Viteai' veni viteai navong Ahi viteni mini (17:17-19), ka Serah mun viteai navong longe (18:12-14) ka navong kuri (21:6-7).
,
ka navong avong onen rokol ouhat (8), Ebraham mumoni va en vekahoi suval koa Ahi vat kati mini. Ebraham, sua onen hanumau elim (100) navong Aesak avasi. Ka Serah vit, “Ahi san sien houlu minau ka sakinau naviteai. Koakeil vasi itaengoni ihiteai hetal minau. ?Isei kilea vahitehiteni min Ebraham keke inau etin, nitounat en titiali tai? Mukos navi tovuli, ka nakur titan ulmatu onak.” Titiali enek moul, ka navong lokovein susu omon, tata onen mumon mari anien tai.

En avong ten anien enek, Ismael, natin Hakar ten out Isip, mul rohtoh karen Aesak, natin Serah. 10 Navong Serah lesi, viteni min Ebraham vit, “Sila ahin toumien enek keilu natnali luvaha. Naman kivuol navong etai, natin ahin enek nakur etai tounah keil onom koa hehi onen natkuli Aesak.” 11 Koanik sakin Ebraham rendem houlu ven Ismael emun vi natnali keinek. 12 Ka Ahi viteni min Ebraham vit, “Konandemkotei en ehon enek ka mama onen koa vi slev onom. Kumon asa koa Serah viteni minuk veni vatiamal keil koa navat kati minuk, keil ikistal ika en Aesak. 13 Ka en Ismael, natin ahin toumien enek, inau numon vatiamal keil koa ikistal ika eni imai ihi mari vangi meatin tai veni kei emun vi natmali.”

14 Sakini, visokon semau, Ebraham san anien ka veioai tai min Hakar ka lingi en vatisin. Evus, sila lat kei ka natnali luva. Keilu luva luka vasi out volvol ten out Bersiba. 15 Navong oai vus, lokovein titan en nimal ten holeai tai. 16 Kei va rani soutin neli ka rondan netan ka mul mis vit, “!Aue li, ekrovattei males natkuli vamat!”

17 Rovitei tuetin, ehon emun mis ka Ahi raengoni. Ka angelo onen Ahi selus ka out nesa mai ven Hakar vit, “?Hakar, komundemko ensa? !Konametautei! Ahi raengoni titiali mis. 18 Kimea, kiha veni, kitali lati. Veni inau, numon koakeil ikistal ika en vatiamal onen imai ihi mari vangi meatin tai.” 19 Evus, Ahi sakin Hakar les vulvul tai koa oai mul ien. Sakini kei seh oai va en veioai onen ka san hatte tai min natnali muni. 20 Ahi ro ven titiali enek ka, en out volvol ten out Paran, kei mai vi meatin hau tai koa vi more meatin talauien. 21 Navong mai mariso, mama onen votin atouli tai ten out Isip mai retalihe ral mini.

Copyright information for `PMA