Genesis 3

Mukave Tisaen Mai en Out Netan

Senesis 3:1-24

En Ah Iden, amot tai mul ien koa ongon kas mulin tirendan vasi keil koa Iahova mumoni. Kei mai ka vis ahin enek, “?Anatin keke Ahi viteni min kamil vit milherkantei heiai ten vatiai vasi koa mul ekok?”

Ka ahin vit risi mini vit, “Melkilea melvan heiai vasi keil koa mul en ah ekek. Ka vatte tas koa mul luhu keke Ahi vit koe vit melherkantei ka melhertokoltei. Veni munak melheani vuo melhetokoli, melhemat varei.”

Ka amot vit risi, “Koanik rovitei anatin. Milsakras milvamat. Ahi viteni mukonek veni kilea keke munak milheani, ileilien onamil hemai hesuval kei, ka milheilea asa tahos ka asa tisa.”

Evus, ahin lesi keke vatiai enek tahos imok, ka heite teni mun tahos taanian. Ka envati vasak visi vakur ileilien. Sakini kur heite koan ka kani. Evus, san koan min meatin onen, kei mun kani. Hatte tas, rendemien onealu maluv ka lukileile, ka lulei kilea suk keke lukaka hon ka lumemou veni. Sakini, lulah ou fik keil,
3:7ou fik suval ouali
lupar ruaini ka lukav koe keilu eni.

En mendilah enek, luraengon Iahova mul retoun en ah. Navong luraengoni, luro suai en vatiai keil. Ka Iahova vise meatin vit, “?Meatin? ?Keik kave?”

10 Ka meatin vit risi mini vit, “Naraengonuk koretoun en ah, ka nametau veni inau nakaka hon. Sakini, naro suai enuk.”

11 Iahova visi vit, “?Isei viteni vit keik kovakaka hon? ?Mukave? ?Keik kokan heiai koa naviteni navit konantei?”

12 Ka meatin viteni vit, “Ahin koa kolingi ro ral minau san heiai enek minau, nakani.”

13 Ka Iahova vis ahin vit, “?Vensa komumoni mukok?”

Ka kei viteni mini vit, “Amot luvos nau, sakini nakani.”

Ahi San Mahien min Meatin, Ahin ka Tounah Vasi en out Netan ven Tisaen

14 Evus, Iahova viteni min amot vit, “Ven koa komumoni mukok, nisan mahien minuk kos en tirendan vasi keil ka tounah sav koa amoul. Mahien koa nasani minuk ekek: kosa hetokol keite ten moulien onom, en avong vasi keil, kikea en vangom ka vuli meas hel en ongom lises. 15 Numon keik hetal min ahin, tinomil heat kamil, ka titam ka titan ahin, tine mun heat keil. Titan keil ititi lin vatum, ka keik, kiat ale tanetan.”

16 Ka Iahova viteni min ahin vit, “Numon keik kilonge hetisa navong kikur titam, eisilum hemah hemariso. Avaseini kilong mahien, ka kiles kindem kat meatin onom, ka kei hehi avat minuk.”

17 Ka Iahova viteni min meatin vit, “Keik kolong ren ahin onom, ka korlong kattei nau. Kokan heiai koa naviteni minuk navit konantei. Ven asa koa komumoni, sesendaen hel en atan. Sakini, en avong vasi en moulien onom, keik kum hekeih keke kumon anien keil ikistal ien. 18 Oumunai tatisa hehi houlu hehitehiteh ien ka hesar koe anien am. Ka avong tei, kian anien enges ten eivorohus. 19 En avetin ten umen onom, kikur tounah taanian heha vis ... kimat, ka kimai ris kihi atan. Veni keik, namumonuk en atan, ka kiha ris en atan.”

20 Meatin koa mulamu, isen 'Adam' koa aneite teni vi 'meatin'. Ka en ahin onen, kei ling isen 'Iv' koa aneite teni vi 'moulien' veni kei vi mama onen meatin vasi keil koa amoul en out netan. 21 Ka Iahova mumon eisin omealu en hiliven tirendan ka sani min keilu lumusin koe keilu eni.

Iahova Sila Lat Adam ka Iv Ran Ah Iden

22 Lumusin evus, Iahova selus sasen vit, “Ekek, meatin mai suval iatel keke lumai lukileile en asa tahos ka asa tisa. Mukonek, tehermaentei keilu luhekur heiai tamun ran vatiai koa kilea vasan moulien ten lisenges. Veni munak luheani, lusakras luvamat.” 23 Sakini, Iahova sila lat keilu ran Ah Iden. Ka mumon keilu lumum en atan koa kei mumon keilu eni. 24 Kei sila lat keilu evus, ling angelo keil koa avise keil en 'Serub' avalei kokoe meteau ten Ah Iden en usite koa ist. Ka Iahova ling naef koa ahang vilhili eni ka mul vilehiles val koe sise vaha en vatiai koa san moulien ten lisenges.

Copyright information for `PMA