Genesis 35

Navong Siekob mea ran out Mesopotemia, Ahi kistal veni en out Betel hatte tamun ka rokol kat risi. 10 Ahi viteni mini mukok, “Kosa isom 'Siekob' koa aneite teni vi 'meatin tasakluvosien,' ka kosa heha, isom hehi 'Isrel' koa aneite teni vi 'meatin koa lehkao min Ahi'. 11 Inau navi 'El-Sadai,' koa aneite teni vi 'Ahi ten Keihoen'. Mihelah titiali keil hehi houlu. Mari vangi meatin keil houlu ika enuk ka tei en keil imai ihi asuv houlu keil. 12 Atan keil koa nasani min avu Ebraham ka tata onom Aesak, nisani minuk ka min vatiamal onom keil koa ikistal ika venuk.” 13 Navong Ahi selus mini evus, mea rani. 14 Ka en out koa Ahi selus mini, Siekob vati lat ahat tai mulomal vahi out koa hendem kati asa koa Ahi viteni mini. Evus, kur oel ten olip ka uaen, mutah keilu eni vatie lati vi out votut onen Ahi. 15 Out koanek, Siekob ling isen vi 'Bet-el,' 'eim onen Ahi'.

16 Avong vahis muli, Siekob ka onen keil amea ran out Betel. Ka navong amul amual semau, soutin neli ran out Efrat, avong mai keke Resel vakur tivava ka kei votini keih. 17 Navong longe tisa houlu, ahin koa mul katauni viteni mini vit, “Konandemkotei, ehon tamun keinek.” 18 Ka mukos, mahien onen vi ten matien. Ka navong Resel leh ekor en eang, ling isen ehon 'Ben-oni' koa aneite teni vi 'natin ten mahien'. Ka tata onen viles isen mai vi 'Ben-samen' koa aneite teni vi 'natin ten hek matu'.

19 Navong Resel mat, arahini en vali sise koa va Efrat (kosa, out enek avise en Betlehem). 20 Siekob kur mari ahat tai ka vati lati mulomal vatie lat tahitan onen. Ka mari ahat enek mules en out enek rokol kosa.

22 Siekob, ahin onen ehat (4) ka natnali keil teindan elu (12).
35:22 Natnahin tai mul koa isen Dinah koa mama onen vi Leah.


23 Ehon keil koa aka en Leah mukok: Ruben (koa moeite onen Siekob), Simeon, Livae, Sudah, Isekar, ka Sebiulon.
24 Ehon keil koa aka en Resel mukok: Siosep ka Bensamin.
25 Ehon keil koa aka en Bilah, ahin toumien onen Resel, mukok: Dan ka Naptali.
26 Ehon keil koa aka en Silpah, ahin toumien onen Leah, mukok: Kat ka Asar.
Koakeil enek avasi keil en out Mesopotemia.

Copyright information for `PMA