Genesis 41

Ahi Kulat Siosep ran Eim Takeih ka Sakin Kei Mai vi Avat ten Kavmen ten out Isip

Senesis 41:1-16,25-43,47-57

Sua elu muli, asuv houlu ten out Isip matil vovoi keke mulomal en vali Oaisal Nael. Navong ro en out enek, les buluk oulu (7) amea ran oai ka avengan keil en oumunai. Ave tahos ka amusising. Evus, les buluk oulu (7) eris akatau amea ran oai emun, ka ave tisa ka avi sikou. Keil avatimal en vali oaisal enek vesesal en koakeil ave tahos. Ka koakeil avi sikou, akan vasi koakeil ave tahos. Ka asuv houlu muli mea. Evus, kei matil eris, ka les matil vovoien tateisav tai. Les hungei uit oulu (7) mul en vatte tas, keil vasi umen revi. Evus, heite oulu (7) eris akikistal en vatte enek, avitehiteh rotahostei ka amukou ven eang sisil koa ka en out volvol muh lini. Lesi keke koakeil artahostei amoul koe koakeil atahos, sakini uvin li vasi. Navong asuv houlu mea, kilea keke kei matil vovoi. En visokon teni, kei mundemko houlu ka san selusien va min kleva keil ral min meatin taileilien keil ten out Isip vit avamai. Navong umai, viten matil vovoien onen min keil ka tovuol en etai keke vata usili mini.

Navong avat ten meatin keil tatah uaenien lesi, kei mai ka selus min asuv houlu vit, “Kosa, namundem ris tounah tai koa namumoni romaltei. 10 Avong tai, keik tinom kat nau ral min avat onen meatin keil koa aran veret am. Sakini koling komal en hen asuv onen avkeih keil koa lei kat eim takeih onom. 11 En vongien tai, komal vasi melmatil vovoi, ka matil vovoien onomal, aneite ten keilu luteteisav. 12 Meatin hau tai koa vi koan-Hibru ro ral min komal, vi slev onen asuv onen avkeih keil. Navong melviten matil vovoien onomal mini, kei ra usil aneite teni min komal. 13 Tounah vasi mai kistal suval koa viteni, keik koling ris nau en vati umen onak, ka komuas koa mul ran veret am.”

14 Sakini asuv houlu sila meatin onen tai vakur Siosep, ka hatte tas, akulati ran eim takeih. Kalah enges asev eni, asak moteini, ka amusin eni en eisin hau. Evus, amulamuni va mulomal en meten asuv houlu ten out Isip. 15 Ka asuv houlu viteni mini vit, “Namatil vovoi ka meatin tovuol vata usili minau. Naraengoni keke keik kokilea kovata usil aneite ten matil vovoien keil.”

16 Siosep vit risi mini, “Asuv houlu, inau nasakras, ka Ahi enges kilea voumon aneite teni vamai vakistal kovailea.”

25 Navong Siosep long matil vovoien elu onen, viteni mini vit, “Matil vovoien keilu enek, aneite teni vatte tas. Ahi mul viteni minuk asa koa houmoni en avong keil koa hemai. 26 Buluk koa oulu (7), ave tahos, ka hungei uit koa oulu (7), umen revi, aneite ten keilu vasi vatte tas, luvi sua oulu (7). 27 Buluk koa oulu (7), ave tisa, ka hungei uit koa oulu (7), amukou ven eang sisil koa ka en out volvol muh lini, aneite ten keilu emun luvi sua oulu (7) ten amai koa anien hetovuol ien. 28 Suval koa naviteni tuai minuk, Ahi mul rie lati minuk asa koa houmoni. 29 Sua oulu (7) hehi sua keil ten amas koa anien hehi houlu vis hehi houlu mok en out Isip. 30 Evus, sua oulu (7) hekatau koa anien hetovuol. Sua keil ten amas, er hevobongeni ven avong ten amai heat lin tounah vasi en kantri onom. 31 Anatin, avong ten amas keil, er hevobongeni veni avong keil koa hekatau, hetisa revi mok. 32 Ahi viteni minuk hatte elu keke keik kilea revi asa koa kei ling kati ka houmoni hekistal hervitei tuetin.

33 “Sakini, kitie lat etai meatin koa vi meteisau ka kur ileilien. Evus, kilingi helei kat kantri onom. 34 Kilekat tei mun meatin keil koa ihi avat keil keke avalei kat umen vasi keil ten ah en sua keil ten amas. En vangi uit keil koa bak elim amul ien, iling revi bak tai heha en out sav. 35 Evus, san keihoen min keil keke ilah ruain anien koa aling revi tuai heha en mari eim keil en taon keil, ka ilei kokoe eni. 36 Anien keil enek heles hetokol avong keil ten amai koa hemai en out Isip. Mukonek, meatin keil asakras avamatmat ven amai.”

37 Asuv houlu ral min meatin keil onen asi keil ven rendemien onen Siosep. 38 Ka viteni min keil vit, “Rosakras rovahotin meatin etai vasuval Siosep koa ninin onen Ahi mul ien.” 39 Sakini viteni min Siosep vit, “Veni Ahi rie lati minuk tounah keil enek, melei kilea keke keik kovi meteisau ka kokur ileilien mulin meatin sav vasi keil. 40 Nilinguk kihi houlu en kantri onak ka meatin onak keil ilong kat asa kihiteni. Keihoen ten tounah vasi, nilingi en hem, ka vuluk tatondanien enges nututi. 41 Kosa, naling hek enuk keke komai kovi 'Avat ten Kavmen' ten out Isip.” 42 Ka asuv houlu kulat ring ten keihoen onen ka lingi en kalihen. Evus, kei musin en Siosep en more eisin koa muoh ka ling gol sen tai mul en hiren. 43 Evus, san kat koa hos lehei keke Siosep heloh eni, koanek vi onen meatin koa vi he matu onen asuv houlu. Ka navong mul muloh eni, meatin keil avisohiso avit, “!Almalingling! !Avat ten Kavmen mul mai, almalingling!” Mukonek, Siosep mai vi Avat ten Kavmen ten out Isip.

47 En sua oulu (7) ten amas, anien houlu vis houlu mok. 48 En out vasi, Siosep lah ruain tesao en uti uit keil ka lingi mul en mari eim tai en taon keil. Uti uit koa mul en taon vasi keil ka ran ah keil koa mul rahiti. 49 Uti uit houlu vis houlu mok keke Siosep sakras vahuli vasi, asuval veien ten atas.

50 Mulamu en avong ten amai, Siosep kur ahin tai, isen Asenat, natnahin pris tai, isen Potefara. Kei kur titan Siosep elu. 51 En moeite onen ling isen Manase koa aneite teni vi 'ekvobong' veni vit, “Ahi sakinau ekvobongen mahien onak ka koakeil en teim onen tata onak.” 52 Ka en koa katau, ling isen Ifriem koa aneite teni vi 'san titiali' veni vit, “Ahi san titiali keil minau en out tasakvisien keil onak.”

53 Navong sua oulu (7) ten amas en out Isip mai va, 54 avong ten amai mai suval koa Siosep viteni. Mari amai mul en kantri sav keil emun, ka en out Isip enges, anien mul ien. 55 Avong amai kat meatin keil ten out Isip, umai apeah asuv houlu ven anien. Sakini viteni min keil vit iha ven Siosep ka umon asa hehiteni min keil. 56 Avong ten amai mai tisa revi mok, sakini Siosep maeni meatin keil onen asehen voiteh ten mari eim ten uit en taon vasi keil. Ka me-Isip keil umai avuli. 57 Meatin keil umai en out Isip aka en out sav houlu avahul uti uit veni anien tovuol en out vasi.

Copyright information for `PMA