Isaiah 59

Provet Aesea Sel Kat Meatin Keil Onen Iahova ven Tisaen Keil One

Aesea 59:1-4

Provet Aesea sel kat meatin keil vit,

“Kami minandemtei minahit Iahova rokurtei keihoen voutut moulien onami.
Ka minandemtei mun minahit ralingen vonhon keke rolongtei uaien onami ven kataunien. !Romukteinek varei!
Tisaen keil onamis
mul riti vas kami miva soutin ran Ahi onami.
Anatin, tisaen keil enges onami sakin Ahi viles eisilin min kami
ka sakin kei rolongtei mun hisien keil onami.
Sakien keil onami vilehilu en tisaen
ka hemi vi amus ral min ran meatin sav keil koa mimuasi mat.
Hilingomi vilelau en liluvosien
ka mimul miselus en tounah koa romaltei.
En out koa amumon kot ien,
mirmusiltei sise koa vamal.
Ka navong mimulomal keke mivaselus en usite onami,
miluvos ka miselus en tounah koa rovitei anatin
keke mivaleh rendemien onen meatin sav keil.
Kami miling kat sise keke mivapurun meatin sav keil eni,
evus, mimusili.”

Aesea Vit Lat Tisaen Keil Onen Me-Isrel Keil min Iahova

Aesea 59:9-10,12-17,20

Provet Aesea vit lat tisaen en usite onen meatin keil vit,

“Ahi rolestei mun usite keil orer
maluen onen rorokoltei mun out koa roro ien.
Komai merosin meneai vakistal en moulien onomai,
ka melesi vi mankoli enges.
10 Sakini memutivul suval meatin koa meten var.
Anatin, memusavoi en taviai enges suval out mul vong.
Avaseini mesav keil ave keih,
keihoen tovuol enir suval memat tuai.”

12 Sakini, meatin keil avitehit lat keil min Iahova avit,

“O Iahova, sakien tatiso keil onomai koa memumoni va katuk avi houlu ramat.
Tisaen keil onomai amul amuas ris komai.
Anatin, komai mekilea keil vasi,
ka melonge tisa houlu ven keil.
13 O Iahova li, komai mevae va katuk,
ka memun mevit mereingeingenuk varei.
Meseseinuk
ka mermusiltei mun keik koa kovi Ahi onomai.
Lisenges, meselus usil sise koa mevapurun meatin sav keil eni,
ka mukave komai mehemea mehelokovein hem.
Liluvosien keil amul akistal sase enges ran rendemien onomai,
sakini selusien taliluvosien mul kistal ran ongomai lises.
14 Navong meles revi usite onen meatin keil, mermusiltei mun more sakien keil,
ka sakien ten maluen tovuol enir.
Selusien ten anatinien tovuol luhu en meatin keil onomai,
ka merkul anatin entei mun selusien onen meatin sav keil veni komai vasi meluvos.
15 Ka veni anatinien tovuol emun en komai,
koakeil evati avalokovein sakien tisa keil one,
alesi keke meatin sav keil amea apurun keil.”

Sakini, provet Aesea viteni vit,

“Sakien tatisa vasi keil onen meatin keil,
Iahova lei kilea eni ka rositei veni,
veni kei lesi keke maluen tovuol en keil.
16 Kei longe tisa navong lele ka lesi keke
meatin tovuol vakataun meatin sav keil.
Sakini kei vit voutut moulien one
en keihoen ka maluen onen enges.
17 Sakini, musin en kei suval meatin tavaeen tai.
Musin en maluen suval tounah koa mul koe veimasen,
ka ling sakien ten mututien suval tounah koa kur koe vatin.
Kei hemai hesa kesi min meatin keil usil sakien tisa keil koa amumoni,
ka hetie lat vurohien onen min koakeil amum kalkali.

20 “Inau, Iahova, nimai en out Serusalem ka moutut moulien onen meatin keil koa amul ien.
Anatin, nimai nikur koe me-Isrel keil koa aviles ran tisaen keil one.”
Copyright information for `PMA