Jeremiah 20

“En avong keil koa amul umai, vativieh keil onami imai ivae heha kat taon onami ten out Serusalem. Ka keil ilah mane ka tounah vasi onami koa tahos imok koa amumoni en gol, silva ka more ahat keil hehi one. Anatin, keil ilah tounah sav vasi koa tetahos emun koa asuv houlu keil ten out Sudah aling ruaini mul, ka ilahi heha ris en kantri one ten out Babilon.”

Seremaea Selus Kutut Usil Umen koa Ahi Sani Mini

Seremaea 20:7-13

Evus, provet Seremaea vis Ahi vit,

“O Iahova, keik koluvos inau
ka inau nakul anatin eni.
Ral min keihoen onom, kokeih kat nau,
ka komulinau.
!Ven selusien koa kosani minau, meatin vasi keil amul akarenau!
!!Lises amul aviteai enau!!
Ka navong vasi namang vas ongok maselus,
keik kosakinau naviso va kat meatin keil ka namakul kat keil navit,
“!Vaeen keil imai ka u lin tounah vasi onami!”
O Iahova, meatin keil amunge katnau ka avit usil nau
veni namul navitehiten selusien onom.
Ka munak naviteni en rendemien onak navit,
'Nirselustei usil Ahi ka nirvit mesentei mun selusien onen en Isen,'
selusien onom mai suval ahang
koa mukan purun tinok.
Nasak visi mahuli kat selusien onom,
ka nasakras varei.
10 Nalong meatin keil aselus lelau va kat nau avit,
'Meatin ekek vi uti metauen varei.
!Rovaha rovahit lat kei min avat orer keil!'
More tuak vasi keil evat nau mamot en selusien onak
ka arosinau keke avasak luvos nau.
Keil amul avit, 'Munak rokilea rovasak luvosi,
ir rehut kati ka rehouasi vasa kes mahien koa selusien onen mumoni vakat ir.'
11 Ka keik, Iahova, komul koring koe nau suval meatin tavaeen tai koa aven keih.
Sakini, koakeil asak visi avapurunau, keil imot.
Keil isak visi mok ihit avouas nau, ka keil isakras.
Keil imemou vareis
veni keil asakras avoumon etai tounah vaha kat inau.
Memouen one, meatin sav keil asakras evavobongeni en avong etai.
12 O Iahova, Asuv Houlu ten Out Nesa, keik kolei revi usite onen koakeil amal en metom,
ka kokilea asa koa mul en tine ka rendemien one.
Sakini, ekvati malesuk kovasa kes mahien min vativieh keil onak,
veni naling usite onak mul en hem.

13 “!Sakini, mihesau min Iahova!
!Anatin, mihehati lat Isen!
Veni kei mul mutut koakeil meatin sav keil amul apurun keil,
kei mul lah lat keil ran hen koakeil atisa.”
Copyright information for `PMA