Jeremiah 23

Iahova Vat Kati Keke Heling Ris Meatin Keil Onen Ito en Atan Kati One

Seremaea 23:1-6; 29:10-12; 31:3,31-34

Iahova selus min meatin keil ka en provet Seremaea vit, “!Hetisa mok min avat keil onen me-Isrel keil koa amul asak purun meatin keil onak! Keil asuval meatin tisa keil koa arlosil kat revitei sipsip keil ose ka amaen keil aretasile.”

Ven sakien one, koanek vi selusien onen Iahova, Ahi onen me-Isrel keil, va min avat keil koa ling keil avalosil kat revi meatin keil onen. Kei vit, “!Kami mirlosil kat revitei meatin keil onak! Milikat rasilin keil uvaha. Sakini, nisan mahien min kami ven tounah tisa keil koa mimumoni. Hevus, inau nilah ruain vangi meatin keil onak imai ris ran kantri savsav keil koa namaen keil aratasil uva aro ien. Anatin, nilah ris keil imai ito en atan kati one ka ikur titiali keil imai ihi houlu eris. En avong enek, inau nilei kan avat keil koa imai ilosil kat revi keil. Keil isuval meatin keil koa alosil kat revi sipsip ose keil ka umon keil irmetautei mun ka irmundemkotei. Tovuol en keil hevuol.”

Iahova selus eris vit, “Avong tai mul mai keke nihati lat asuv houlu tai koa sakien onen mal revi ran vatiamal onen Deved. Kei helosil kat meatin keil hetahos ka helei revi usite one housil meteisauen onen. Min koakeil amum tisa, kei hesan mahien min keil, ka min koakeil amum tahos, hesan tahosien min keil. Navong kei vi asuv houlu, me-Sudah keil ito en tahosien, ka me-Isrel keil ito en tomat. Keil ihise en 'Iahova-sidkenu' koa aneite teni vi 'Iahova vi maluen orer'.”

Copyright information for `PMA