Job 1

Ahi Maen Temat Vasak Vis Siop

Siop 1:1-22

En avong mulamu, meatin tai ro en out Us, isen Siop. Ka kei musil kat Ahi ka va netan mini lises. Kei vi more meatin tai koa sakien onen mutolas, mul lei kat revi kei ka enrovattei voum vatisa. Natnali oulu (7) ka natnahin etel (3). Sipsip keil esen rokol taosen oulu (7000), kamel esen rokol taosen etel (3000), buluk esen taosen tai (1000), ka dongki esen vi handred elim (500). Meatin toumien onen keil emun avi houlu vis avi houlu mok. En out ist, kei varei vi meatin koa tounah onen houlu loh lin meatin savsav vasi keil.

Natnali keil, lises amul amum retai en marmari anien keil. Navong tai en keil mumon anien en teim sen, kei sisil en tunali savsav keil ka ahinali keitel. Navong akanian ka amunmun evus, uva ris teim ese. Ka rovitei tuetin, tateisav mumoni mukonetinek rokol koa oulu (7) en keil. Ka en avong vasi koa mari anien keil one evus, Siop san selusien va ven keil keke isak motein moulien one. Evus, en visokon semau katau en mari anien one, kei mea ka sa retai en sanien min Ahi en usite one. Lises, Siop mumoni mukonek keke avato ris en meten Ahi, veni mundemi vit vahesa etai en keil mumon etai tounah koa romaltei en meten Ahi koa kei reingeingeni.

En avong tai, en out nesa, angelo keil umai avati keil en meten Ahi Asuv. Ka Temat emun mul ral min keil. Ka Iahova visi vit, “?Keik, koka kave?”

Temat vit risi mini vit, “Naka ko, nuva ko, ka namules naretoun en out netan.”

Ahi visi vit, “?Keik koles more meatin toumien onak Siop? Meatin tovuol en out netan valong kat nau ka vatahos vasuval kei. Kei mul va netan minau ka losil kat revi kei keke romumon etai tounah vatisa.”

Temat vit kesi mini vit, “?Mukave? ?Komundemi keke Siop heles hemot minuk munak kikulat tokolkatien onom ran moulien onen? 10 Lises, koring koe kei, onen keil ka tounah vasi keil onen. Korokol kat vasin tounah keil koa kei mumoni ka tirendan keil emun esen avi houlu vis avi houlu mok, avilelau en out vasi. 11 Ka munak kilah lat tounah keil enek rani, kosa etin, kei hesilik en metom.”

12 Iahova viteni mini vit, “Tahos. Namaen tounah vasi keil onen hel en hem. Ka konatokolteis aven.” Evus, Temat mea va.

13 En avong tai, natin Siop keil amul akanian ruai en teim sen tue koa moeite. 14 Ka en avong enek, eiloheh tai muloh va ven Siop ka vit, “Memul mumumon buluk keil esom amul akah atan, ka dongki keil esom emun amul akanian vesesal ven komai. 15 Memusil, me-Saba keil umai, amu vini vasi meatin toumien onom keil ka avenan tirendan vasi keil. Inau sesuk nalohosai keke numai navit meseni minuk.”

16 Navong mul veah selus, meatin toumien tamun onen mai ka vit, “Meatin toumien keil onom amul alei kat sipsip esom keil, ka ahil vil ka en out nesa, ka kan lin keil vasi. Inau sesuk nalohosai keke numai navit meseni minuk.”

17 Kei mun roselus vasitei mau, meatin toumien tateisav mai ka vit, “Meatin tahenaien keil ten out Kaldea ariti vas keil en vangite etel ka amuloh ven komai. Asal vini meatin keil toumien onom en naef one, ka alah vasi kamel keil esom. Inau sesuk nalohosai keke numai navit meseni minuk.”

18 Kei mun roselus vasitei mau, meatin toumien tateisav tamun mai ka vit, “Natmali keil ka natmahin keil amul akanian ruai en teim sen natmali koa moeite. 19 Memusil, mari eang koa kileles ka en out volvol, mai muh lin eim va netan, mutakat vasi keil umatmat. Inau sesuk nalohosai keke numai navit meseni minuk.”

20 Navong Siop long tounah vasi keil enek, longe tisa houlu. Sakini rali vas eisin omon, reh kokoteh hilin en vatin, retengeiril vita netan ka san houhouen min Ahi. 21 Kei vit, “Navong avasi inau, navi heite hon, ka navong nimat, nihi heite hon emun. Iahova san tounah vasi minau, ka kosa, kei kulat risi. Nihati lat isen Iahova.”

22 Avaseini tounah vasi tisa kistal en Siop, kei romumontei tisaen vuo vahiteni keke Ahi mumoni romaltei mini.

Copyright information for `PMA