Job 2

Temat Sakvis Siop Hatte Tamun

Siop 2:1-10

En avong tai, en out nesa, angelo keil umai ris avati keil en meten Iahova, ka Temat emun ro ral min keil. Ka Iahova visi vit, “?Keik, koka kave?”

Temat vit kesi mini vit, “Naka ko, nuva ko, ka namules naretoun en out netan.”

Iahova visi vit, “?Keik koles more meatin toumien onak Siop? Meatin tovuol en out netan valong kat nau ka vatahos vasuval kei. Kei mul va netan minau ka losil kat revi kei keke romumon etai tounah vatisa. Keik kovis nau mamaenuk kovapurun heisav eni enges, ka avaseini, Siop mules musil kat sakien koa mutolas en metok.”

Temat vit kesi vit, “Meatin tai kilea vasa lat tounah vasi onen keke vasakini vamoul. Ka munak kisasa kovapurun aven, nakilea keke kosasek, kei hesilik varei en metom.”

Sakini Iahova viteni min Temat vit, “Tahos, namaeni hel en hem, ka konouasteis kei namat.”

Evus, Temat va ran Iahova ka mumon memari manu keil akikistal ka vasi aven Siop, vatin vita rokol tinealen keilu tanetan. Sakini Siop va, ka rondan en vuli meas en out amunit tahul ien. Kur soke tounah tai koa kan ka mukal vahas manu keil onen eni.

Ahin onen mai ka viteni mini vit, “?Keik komules kovuli kat mormore sakien keil onom enges veah? Tahos imok kisili Ahi ka kimat.”

10 Siop vit kesi mini vit, “!Keik komul koselus suval ahin koa vi vau! ?Mukave? ?Ir koa rokur kat tounah koa tahos en hen Ahi, rerherkurtei tounah koa tisa emun?” Ka avaseini keke mahien onen Siop mariso, roviten etai tounah vatisa vaha kat Ahi.

Time Keil Onen Siop Umai Veni Emahisi

Siop 2:11-13

11 Navong longlongien usil mahien onen Siop ka vasi out, time etel telraengoni. Iseatel vi Elivas ten out Teman, Bildat ten out Suah, ka Sofar ten out Namah. Navong telraengoni, telmai en rendemien keke telvaha telvasan enmahisien oneatel mini ka telvakatauni en selusien. 12 Navong telmul semau soutin, telles Siop ka tellei rasi. Navong esuk telmai vesesal ka tellei kilea, tellonge tisa houlu ven tueatel. Sakini telmurang keih, telrali vas eisin omeatel, ka telrivin vuli meas vina en mesaiuai ka en vatiatel. 13 Telva telro sili rokol avong oulu (7) teni. Telrova rantei ka telro raeng enges veni telles mahien koa Siop mul kuri mariso ramat.

Copyright information for `PMA