Job 3

Siop Run Kutut Vit Tahos Avarvasitei

Siop 3:1-13,25-26

Navong aro mukonek avong oulu (7) evus, Siop selus esuk ka rin kat avong avasi eni. Siop vit,

“!Ahi eli, kisesenda en vongien koa avange kat nau eni,
ka kisesenda mun en avong koa avasi nau eni!
Ahi eli, avong koanek, kihiles meneai teni hemai hehi vongien.
Konandem kattei mun avong enek.
Konoumontei mun meneai natitin eni.
Kumoni hehi avong ten malikelik
ka mankoli teni hemai hematetel emok.
Kiov koe meteiai teni
en mahmah keil.
Kikulat vongien enek hemea ran sua teni,
ka konamaentei anahuli ris.
Kumon vongien enek hehi lumalum,
isien onen tivava hau hetovuol eni.
Koakeil akur eimas koa keih keke akilea avasakin mari mesau ten huinev ten atas koa avise en Levaetan vamah,
kihiteni min keil isesenda en avong enek.
Hitu ten menauilan, kihuli kati natitintei,
konamaentei vongien enek namai nahi meneai.
10 Kisesenda en vongien enek veni kei maeni avasi inau eni,
ka maeni nakur moulien keke nakilea makur mahien ka malonge vatisa.
11 Tahos imok vahit mamat en vangen mama onak,
vuo mamat en hati avong enges varei avasi nau.
12 ?Vensa mama onak ling nau en urilin?
?Vensa san susu minau?
13 Vahit mamat tuai en avong enek,
kosa, maseh revi ka marlongtei mun mahien.

25 Tounah vasi nametauni, umai asut nau,
asas namundemko eni, mai kistal vi anatin.
26 Narkurtei tomat, rendemien onak mul konakon,
nasakras maseh veni mahien onak sakras vavus.”
Copyright information for `PMA