Job 40

Evus Iahova vit risi min Siop vit,

“Siop, kovit Ahi ten Keihoen mum romaltei.
!Keik koselus va kat nau, kihit kes selusien onak!

Evus Siop vit kesi min Iahova vit,

“Iahova, naselus vau eli vareis. ?Nihit kes asa?
Inau nirviten etai mun tounah.
Inau naviten tounah houlu tuai keke marvitentei.”

Iahova selus min Siop eris kistal en angu vit,

“!Lomal, munak kovit kovi meahos!
Kihit kes selusien koa mahisi minuk.
?Keik komul kovatie lati keke inau namum romaltei?
?Keik koselus va kat nau kovit kovoumonuk kovamal?
?Keihoen onom suval keihoen onak?
?Rem kilea vamakul vasuval voulul vasuval rek?
10 Munak hemukonek, kilomal en houhouen onom ka tuvutien onom.
Kisin en hetetamenien ka muohien onom.
11 Kiles koakeil avut keil, kumon vurohien onom heha kat keil
ka kumon rendemien one heha netan.
12 Anatin, kiles keil ka kisakin keil iha netan.
Kihe lin koakeil amum tisa en out amulomal ien.
13 Kitahin keil vasi en atan.
Kipar kat keil en out ten matien.
14 Munak kokilea kovoumon tounah keil enek, inau varei nilamu nimasmasuk,
ka nihiteni keke keik kokilea kovoutut keik sasom.”
Copyright information for `PMA