Job 42

Evus, Siop vit kesi min Iahova vit,

“Iahova, nakilea keke keik kokeih vis kokeih imok.
Kokilea kovoumon vasi tounah koa emvati.
Kovis nau nakeih kat meteisauen onom mukave,
navong inau meteisauen onak tovuol.
Naselus en tounah keil narkileatei,
en marmari tounah koa nasakras mailea eni.
Koviteni minau nitaengonuk navong koselus,
ka nisak visi nihit kes selusien keil onom.
Mulamu, nalong kilea keik ka en asas koa naraengon meatin sav keil aviteni minau,
ka kosa, nalei kilea keik esuk en metok varei.
Sakini namemou en tounah keil naviteni.
Nikur ris selusien onak, ka nikul en vuli meas vatie lati
keke nalonge tisa houlu ven asa namumoni.”

Ahi San Tokolkatien min Siop Mulin Asa Kuri Mulamu

Siop 42:7-17

Navong Iahova selus min Siop evus, kei viteni min Elivas ten out Teman vit, “Tinok katuk ral time keilu onom, veni korselus entei anatinien enau vasuval more eiloheh onak, Siop, mumoni. Kosa, mihekur buluk oulu (7) ka sipsip oulu (7) heha ven Siop, ka mihesan keil hesuval sanien tai minau ven kami. Siop hehis ven kami ka inau nihit kes hisien onen ka nirpuruntei kami hesuval koa kami mevahinati. Kami merselus entei anatinien enau vasuval kei mumoni.”

Elivas, Bildat, ka Sofar telmumon asa koa Iahova viteni min keitel telvoumoni. Ka Iahova raengon hisien onen Siop.

10 Navong Siop vis ven time keitel, Iahova rokol kat ris Siop en tounah keil onen ka ling kati hatte elu eris en tounah keil kei lahi mulamu. 11 Tunali Siop vasi keil, ka ahinali keil emun, ral min time sav keil onen umai asao eni. Keil amumon mari anien ral mini en teim sen. Asan enmahisien one mini ka akatauni ven mahien vasi keil Iahova sani mini. Tetai en keil san hati mane ka ring koa vi gol mini.

12 Iahova rokol kat avong ekor onen Siop mulin avong kei rokol kati mulamu. Siop, sipsip esen keil vi taosen teindan ehat (14,000), kamel keil vi taosen ahetai (6,000), buluk keil vi taosen elu (2,000), ka dongki keil esen vi taosen tai (1,000). 13 Natnali keil oulu (7) ka natnahin keil etel (3). 14 Natnahin koa moeite vise en Semaemah. Koa elu eni vise en Kesiah. Ka koa tasite en keitel vise en Keren-Hapuk. 15 En out vasi en out netan, ahin keil atovuol koa avales keil avatahos imok vasuval natnahin Siop keitel. Ka tata oneatel sani min keil atan ka tirendan keil suval koa sani min tueatel keil.

16 Siop moul handred tai ka hanumau elu (140) eris. Ro taveah keke les havinali ka havinahin keil ral min titae keil emun. 17 Navong Siop matu vis matu revi mok, emat esuk.

Copyright information for `PMA