Joshua 1

Ahi Meng Kat Sosua Vakur Atan ten out Kenan

Sosua 1:1-9

Katau en matien onen Mosis koa vi eiloheh onen Iahova, Iahova selus min Sosua, natin Nun vit, “Mosis koa vi eiloheh onak mat tuai. Sakini kosa, kisak mesenuk, keik ka me-Isrel vasi keil, ka mihou koteh Oaisal Sodan ka miheha en atan koa namul nasani min keil. Suval koa navat kati min Mosis, atan vasi keil koa mihoual ien, inau nasani tuai min kami. Hakot keil ten atan onami mul en out volvol en usite saot vina rokol vatihou keil ten out Lebanon en usite not; ka en mari Oaisal Upretis en usite ist, atan vasi keil onen me-Hit keil, va rokol Atas Medeterenia en usite wes.

“En avong vasi komoul koro, out vasi koa kiha ien, vangi meatin sav keil tovuol valinuk. Inau, nito venuk hesuval koa naro ral min Mosis. Anatin, inau nito hetal minuk lisenges ka nasakras malokoveinuk. Rendemien onom hekeih ka konametautei, kilomal hekeih veni keik kihi avat onen meatin keil enek ka kilamun keil iha ikur atan koa navat kati min avu one keil telamu. “Anatin, rendemien onom hekeih ka konametautei.

Kilei katuk keke kusil kat mengkatien vasi keil koa eiloheh onak Mosis sani minuk. Konasesein etai mengkatien keil enek ka tounah vasi keil koa kum visi en out vasi kiha ien, hekistal hemai hehi anatin.
Tus ten Mengkatien Keil, kihuli lises en meten meatin keil. Kindem usili meneai ka vongien. Hemukonek, kokilea kovoum vousil asa koa amutisi mul ien. Hesakini tounah vasi koa kiling hem eni hekur aneite ka asa koa kum visi hekistal hemai hehi anatin.

“Anatin, navit mahit risi minuk keke rendemien onom hekeih ka konametautei. Tinom namaleileitei vuo konandem maenuktei, veni inau, Iahova, Ahi onom, nito venuk en out vasi kiha ien.”

Copyright information for `PMA