Joshua 5

Longlongien keke Iahova mumon Oaisal Sodan memes rokol avong me-Isrel vasi keil amual kotehei ka vasi out. Rokol asuv houlu vasi keil ten out Amor koa amul wes ten Oaisal Sodan, ka rokol asuv houlu keil emun ten out Kenan koa aro vesesal en Atas Medeterenia. Ka navong alonge, ahang one mat varei ka ametaun keil houlu.

Vekahoi en out Kilkal

Sosua 5:2-12

Evus, Iahova viteni min Sosua vit, “Kumon tei naef en ahat takan
5:2 Avise ahat enek en flint.
ka kumon vekahoi en me-Isrel keil koa arvi vekahoitei veah.”
Sakini Sosua mumoni suval koa Iahova meng kat kei eni. Ka kei mumon vekahoi en me-Isrel keil en out tai koa avise en Hou ten Vekahoi. Mulamu, en avong me-Isrel keil alokovein out Isip, meahos vasi keil avi vekahoi tuai. Ka ven keil enek along ras Iahova, meahos keil koa avinvin avahu en avong enek umatmat en ualien one en out volvol. Suval koa Iahova viteni, kei romaentei keil avales atan koa vat kati min avu one keil, atan koa tahos imok ka amas mul ien. Sakini me-Isrel keil amual koteh out volvol sua hanumau elu (40), ka tivava one keil koa meahos arvatei en vekahoi. Sakini koakeil enges avi heite hau en avong enek, Sosua mumon vekahoi en keil veni arvatei veah en vekahoi.

Navong amumon vekahoi evus, me-Isrel keil vasi aro out tas en votevav keil one rokol avong manu one mah. Iahova viteni min Sosua vit, “Kosa nakulat memouen ten out Isip ran kami, out koa mivi slev keil ien.” Sakini out enek avise en 'Kilkal' koa aneite teni vi 'kulati', ka eis enek mul veah rokol kosa.

10 Navong me-Isrel keil amul veah en out Kilkal, en mari aet vesesal en out Seriko, keil amumon mari ale ten Anien ten Mul Laui. Amumoni en mendilah en avong teindan ehat (14) en avati Aviv.
5:10Aviv vi avati koa mulamu en kalenda onen me-Isrel keil.
11 Out mulan eris, akan rohtoh en anien ten out Kenan. Alengas uti uit ka akan veret koa is tovuol ien. 12 En avong enek varei, manna rorivtivtei mun, ka me-Isrel keil arkantei mun. Avong koanek va, keil akan anien keiles koa amoul en atan ten out Kenan.

Copyright information for `PMA