Luk 22
d22:7 Mat 26:17-25; Mak 14:12-21; Sion 13:21-30
 
Luk 22
e22:14 Mat 26:26-30; Mak 14:22-26; 1 Kor 11:23-25
 
Luk 22
g22:31 Mat 26:31-35; Mak 14:27-31; Sion 13:36-38
 
Luk 22
h22:39 Mat 26:36-46; Mak 14:32-42
 
Luk 22
k22:63 Mat 26:59-68; Mak 14:55-65; Sion 18:19-24
 

Luke 22

Avat keil onen Siu keil amumon sise keke avouas Iesu vamat vaka ien
22:1 Mat 26:1-5, 14-16; Mak 14:1-2, 10-11; Sion 11:45-53

Avong mai vesesal keke Siu keil avahouhou ven ‘Avong Keil koa Akan Veret koa Is Tovuol ien.'
22:1 Avong Keil koa Akan Veret koa Is Tovuol ien: En ouh vasi keil, avong outel (8), Siu keil akan veret koa is tovuol ien vasakin keil avandem eris usil avong koa avu one keil telamu akalah alokovein kantri ten out Isip eni ka avong rovinvintei avaling is vaha en veret ae keke vatahtaho (Eks 12:1-14).
Ka en avong tai teni, amumon ale koa avise en ‘Anien ten Mul Laui.'
22:1 Anien ten Mul Laui: Siu keil amumon anien enek vasakin keil avandem eris usil avong koa Ahi mu vinvini moeite vasi keil onen me-Isip keil. Ka moeite onen me-Isrel keil, ran sipsip koa akas voiteh one eni sakin Ahi mul laui en keil (Eks 12:15-20).
Asuv keil onen pris keil ka tiser keil ten Mengkatien keil onen Mosis amul alekat sise keke avou suain Iesu vamat vaka ien. Ka veni meatin keil houlu amul vesesal ven Iesu en avong vasi, keil ametaun asa koa meatin keil anoumoni.

Navong avat keil enek amul arun usili, Temat mai san rendemien tatisa min Sudas Eskariot, koa vi tai en meatin teindan elu (12) onen Iesu. Sakini Sudas va les asuv keil onen pris keil ka avat keil onen avkeih keil ten Eim Votut usil sise koa kei kilea valing Iesu vaha en he. Keil asi keil ven kataunien onen ka avat kati keke ihuli veni. Sakini, Sudas maeni vakataun keil. Ka navong va ris, kei lekat vis more sise tai keke valing Iesu vaha en he en avong tai koa meatin keil irvitei houlu ien.

Meatin elu onen Iesu lusak mesen tounah keil ten Anien ten Mul Laui d 

En ‘Avong Keil koa Akan Veret koa Is Tovuol ien,' avong mai mal keke meatin keil amul amuas sili sipsip keil ven ‘Anien ten Mul Laui’. Sakini, Iesu sila Pita keilu Sion ral min selusien enek vit, “Milheha mihesak mesen Anien ten Mul Laui keke ir rehean vituai eni.”

Sakini, luvisi luvit, “?Keik emvat komal melvaha melvasak meseni en out kave?”

10 Kei vit kesi min keilu vit, “Navong kamil melheha en out Serusalem, milhehisu en meatin tai koa mul vus veioai tai. Milhousili milheha neim en teim koa kei va ien. 11 Hevus, milhehis meatin ten eim enek milhelhit, 'Tiser mul visuk vit, “?Inau nimai nian Anien ten Mul Laui hetal min meatin keil onak en out kave?”' 12 Ka kei hekur kamil milhehina nesa en eim onen ka hetie min kamil out tato ien tai koa amumoteini tuai mul leisin kamil. En out enek varei, kamil milhesak mesen tounah vasi ien.”

13 Sakini, Pita keilu Sion luva, ka lules tounah vasi suval etin asa koa Iesu viteni min keilu. Ka keilu lusak mesen Anien ten Mul Laui enek ekonek.

Anien votut onen Asuv Iesu e 

14 En avong mal taanian ien, Iesu mai vituai ral min meatin keil onen ka arondan rahit avet tai taanianien. 15 Navong arondan evus, Iesu viteni min keil vit, “Iek vati li houlu mok maan Anien ten Mul Laui ekek vatal min kami. Hevus, niha suk nikur mahien keil onak. 16 Naviteni min kami, nirkantei mun anien ekek heha vio ... aneite ten Anien ten Mul Laui enek hemai hehi anatin en avong koa hiasuvien onen Ahi hemai hekistal ien.”

17 Evus, Iesu kur veiuaen, ka masmas Ahi veni vit, “Mihekuri, ka kami vasi mihemuni. 18 Naviteni min kami, kosa heha, nirmuntei mun uaen koanek hetokol avong koa Ahi hesakin hiasuvien onen hemai hekistal.”

19 Evus, Iesu kur veret ka san masmasien min Ahi veni. Evus, vul vahasi ka riti min meatin keil onen vit, “Koanik vi avek koa nasani min kami. Mihoumoni hemukonek keke mihendem usil nau.” 20 En vati sakien enek, navong akanian evus, Iesu kur veiuaen ka sani min keil vit, “Uaen koanik vi rak koa mue ven kami vasakin hatkatien takeih hau onen Ahi vamai vahi anatin.
22:20 En Eks 24:6-8, Mosis mutah ran buluk en ahor ten sanien vasakin hatkatien takeih matu koa Ahi mumoni ral min me-Isrel keil vamai vahi anatin. Musil sakien enek, ran Iesu mul sakin hatkatien takeih hau onen Ahi mai vi anatin keke voutut moulien onen meatin keil en out netan. (Eks 24:8 ka Ser 31:31-34 emun mul selus usili.)


21 “!Ka mihetaengon nau! Kei koa hemae lat nau niha en hen vativieh keil onak mul ekok. Anatin, kei mul kanian ral minau en avet koanik. 22 O anatin eli keke Natin Meatin heha hemat hesuval etin koa Ahi ling kati tuai. !Ka hetisa vis hetisa mok min kei koa hehi sise teni!”

23 Navong alonge mukok, meatin keil onen amul avihis keil eris usil isei en keil kilea voumon tounah enek.

Meatin keil onen Iesu amusel usil isei en keil avi hetetamen imok mulin teisav

24 Navong meatin keil onen Iesu amul veah en out amul akanian eni, keil amul amusel en keil eris usil isei en keil vi hetetamen imok mulin teisav en keil. 25 Sakini, Iesu viteni min keil vit, “En kantri sav keil, asuv houlu keil onen meatin keil koa areingeingen Ahi ie vati avoumoni vakeih en koakeil alosil kat keil vatie lat keihoen one. Ka evus, akeih kat meatin keil one avalong kat re ka avatie lat houhouen min keil. 26 Ka en usite onami, hermukteinek. !Vuo! Kei koa vi houlu en kami, hemai hekur rendemien tai koa heha netan hesuval vi meatin koa vi heisav enges. Ka kei koa vi avat onami, hekataun teisav en kami hesuval vi slev onami enges. 27 ?Veni isei vi hetetamen imok, kei koa mul kanian en avet, vuo kei koa mul san anien mini? Meatin vasi keil amundemi avit kei koa kanian vi hetetamen imok. Ka inau, naro ral min kami suval slev tai koa mul san anien min kami.

28 “Kami miro ral minau en sakvisien keil vasi koa nakuri tuai. 29 Ka, suval koa Tata san hiasuvien minau keke mamai mahi asuv houlu tai, inau mun namul nasan hiasuvien min kami keke mihehi asuv houlu keil. 30 Ka navong nitondan en vulin ten keihoen onak hesuval asuv houlu, kami miheanian ka mihemun uaen hetal minau. Ka kami mun, mihetondan en vulumi ten keihoen ka mihelosil kat me-Isrel vasi keil koa amul en mari vatiamal teindan elu (12) one, ka mihelei rahit usite keil one.”

Iesu vit luvati keke Pita heluvos hehit kei reingeingeni g 

31 Evus, Iesu viteni min Saemon Pita vit, “!Saemon, Saemon kiteongonau! Temat vis Ahi keke vasak vis kami vasi, ka Ahi maeni tuai keke vailea anatinien ten demkatien onami. 32 Ka inau navis venuk Saemon keke demkatien onom hervustei. Ka navong kihiles moulien onom ka demkatien onom hemai ris hekeih enau, kiha kikataun demkatien onen tumali keil hemai hekeih tamun.”

33 Ka Pita mea ka viteni mini vit, “!Asuv, inau nasak mese keke maha en eim takeih vatal minuk ka mamat vatal minuk!”

34 Ka Iesu vit kesi mini vit, “Naviteni minuk Pita, navong ato herkokorattei mau en visokon semau ekek, keik kuun hatte hetal (3) keke koreingeingenau.”

Iesu sel kat meatin keil onen vit isak mese revi en keil ven avong takeih keil koa hemai

35 Evus, Iesu viteni min meatin keil onen vit, “Navong nasila lat kami miva mivoum, minakurtei mane, ateli vuo sandel. ?Ka mukave, mitetamure en etai tounah?”

Ka avit kesi mini avit, “Vuo, tounah tovuol koa metetamure eni.”

36 Ka Iesu viteni min keil vit, “Ka kosa, tai koa mane vuo ateli onen mul, hekur kati hetal mini. Ka munak naef tavaeen onen tovuol, kei hesalem en eisin omon ka hehul tai. 37 Naviteni min kami, selusien koanek en Tus Votut hemai hehi anatin en moulien onak koa vit,‘Mesaea hehi tai en vangi meatin keil tavaeen.’(Aes 53:12) Sakini, keitinek, mihekur naef keil keke asa koa amutisi usil inau hemai hehi anatin.”

38 Navong meatin keil onen along selkatien onen aviteni mini avit, “!Asuv, les visi! Naef elu tavaeen keiek.”

Ka Iesu vit kesi min keil vit, “Koanek vinvin etin.”

Iesu va en hou nei olip keke vahis ven kataunien h 

39 Navong akanian evus, Iesu lokovein out Serusalem ka va en Hou Nei Olip suval koa, lises, kei mumoni, ka meatin keil onen amusili. 40 Navong arokol out enek, Iesu viteni min keil vit, “Kami mihehis keke Ahi hekataun kami minamottei en tisaen navong sakvisien keil hemai.”

41 Evus, Iesu mea ka mual neli ran keil. En out enek, kei retingeiril netan ka vis vit, 42 “Tata, munak kimaeni, kikulat mahien koa mul mai venau heha keke nasuttei li nau. Ka konoumontei asa koa inau iek vati, kumon asas koa keik iem vati.” 43 Ka angelo tai ten out nesa kistal mini ka sakin aven ka rendemien onen mai keih tamun. 44 Kei mundem houlu usil asa koa hemai, ka peahi keih vis keih imok avong tamun. Ka navong mul vis, avetin onen mue houlu ka mutitil vita netan suval ara.

45 Navong Iesu vis evus, kei mea, va ris ven meatin keil onen. Ka votini keke keil vasi amul amatil. Amatil veni demkoen mul muas keil ka sakin ave mah. 46 Ka Iesu viteni min keil vit, “?Mimul mimatil vensa? !Almea! !Ka mihehis keke Ahi hekataun kami minamottei en tisaen navong sakvisien keil hemai!”

Avat keil onen Siu keil avuli kat Iesu
22:47 Mat 26:47-56; Mak 14:43-50; Sion 18:3-11

47 Navong Iesu mul semau selus min meatin keil onen, Sudas, koa vi tai en teindan elu (12) onen, mul mual mai ven keil ral min vangi meatin keil. Navong les Iesu, mai vesesal veni keke vamusi en vivin. 48 Ka Iesu visi vit, “?Sudas, vensa kumai kovamus nau vasuval kovi tuak tahos tai en hati avong tas koa komul kosa lat nau, Natin Meatin, maha en hen vativieh keil onak?”

49 Navong meatin keil onen Iesu ales asa koa mul kur out, avisi avit, “?Asuv, mekilea mevavae vatal min naef tavaeen keil ekek?” 50 Evus, tai en keil leh lat naef onen ka musah koteh ralingen matu onen slev onen asuv houlu onen pris keil.

51 Ka Iesu vit, “!Ei, vus tuai!” Evus, kei mutelan hen rokol ralingen slev enek ka sak revi.

52 Evus, Iesu viteni min asuv keil onen pris keil, avkeih keil ten Eim Votut, ka elda keil onen Siu keil koa umai keke avahuli kati vit, “?Vensa varei kami mimai venau ral min naef keil tavaeen ka ai tahuen keil vasuval mivahuli kat meatin tavaeen tai? 53 En avong vasi namul vesesal ven kami en Eim Votut, ka mirsak vistei mivahuli kat inau en avong enek. Ka navong vi mankoli mukok mimul mimumoni, veni koanek vi avong onami, ka vi avong onen kei koa kur keihoen ten mankoli.”

Pita muun vit kei reingeingen Iesu
22:54 Mat 26:57-58, 69-75; Mak 14:53-54, 66-72; Sion 18:12-18, 25-27

54 Keil avuli kat Iesu ka amulamuni uva en teim onen asuv houlu onen pris keil. Ka Pita mul lehni musil keil. 55 Navong arokol teim enek, amunit ahang tai mul mukan luhu en teahu teni. Ka Pita mul rondan vituai ral min keil. 56 Evus, ahin toumien tai lesi keke ahang ritin en veinan Pita. Sakini, lele mamah kati ka vit, “!Ei, meatin ekek emun vi tai en koakeil amusil Iesu!”

57 Ka Pita muun vit, “Ahin, narkileatei meatin enek.”

58 Avong havivi mai muli, ka meatin tamun lei kilea Pita ka viteni mini vit, “!Keik emun kovi tai en keil!”

Ka Pita muun eris vit, “!Ei, narvitei tai en keil!”

59 Evus, rovitei tuetin, meatin tamun teisav lesi ka selus keih vit, “!Vi anatin! Meatin ekek vi tai en meatin keil onen Iesu, veni selusien onen suval etin koakeil ten out Kaleli.”

60 Ka Pita muun keih avong tamun vit, “!Rovitei anatin! !Inau narkileatei varei tounah koa komul kovit usili!”

Hatte tas, navong kei mul semau selus, ato tai kokorat.
61 En avong enetinek, Asuv Iesu viles lele mal en Pita. Ka Pita mundem kati keke Asuv viteni mini vit, “Navong ato herkokorattei mau en visokon semau ekek, keik kuun hatte hetal (3) keke koreingeingenau.” 62 Sakini, Pita lokovein teahu enek, tin mah houlu ka murang.

Apurun Iesu ka akuri va en kot onen Siu keil k 

63 Avkeih keil ten Eim Votut koa alei kokoe en Iesu amumon tohtohien mini ka amumuasi. 64 Keil apar kat meten, ka navong amuasi avisi avit, “?Isei muasuk? !Hit luvat visi!” 65 Ka keil aselus kareni en tounah keil houlu mun koa tisa.

66 Navong out mulan, elda keil onen Siu keil, asuv keil onen pris keil, ka tiser keil ten Mengkatien keil onen Mosis umai vituai uva en kot. Evus, amulamun Iesu mai mulomal en mete. 67 Keil avisi avit, “?Hit visi min komai, keik kovi Mesaea koa Ahi rie lati?”

Ka Iesu vit kesi min keil vit, “Munak nihiteni min kami, kami miherkultei anatin eni.
68 Ka munak inau nihis kami vensa mirkultei anatin eni, kami mihervitentei minau. 69 Ka naviten koanik, kosa heha, Natin Meatin hetondan en out ten keihoen en usite matu onen Ahi.”

70 Navong Iesu viteni mukok, keil vasi avisi avit, “?Mukave? ?Komul koviteni kovit keik kovi Natin Ahi?”

Ka Iesu vit kesi min keil vit, “Suval etin koa kami miviteni.”

71 Sakini keil avit, “?!Vensa varei rovalekat ris etai meatin keke vasan selusien tai vaha kati!? !Ir vasi rolong selusien tatisa keil koa mea ran ongon kati ka heha heat kei sasen enges!”

Copyright information for `PMA