Luk 4
a4:1 Mat 4:1-11; Mak 1:12-13
 
Luk 4
b4:14 Mat 4:12-17; 13:53-58; Mak 1:14-15; 6:1-6
 
Luk 4
g4:31 Mak 1:21-28
 
Luk 4
h4:38 Mat 8:14-17; Mak 1:29-34
 
Luk 4
i4:42 Mak 1:35-39
 

Luke 4

Temat sak vis Iesu, ka kei romottei en tisaen a 

Navong Iesu lokovein out koa Oaisal Sodan mul ien, Ninin Votut koa mul ien mulamuni va en out volvol. En out enek, Temat sak vis Iesu avong hanumau elu (40). En avong keil enek, Iesu rokaniantei, sakini en keite ten avong enek, amai kati houlu.

Ven koanek, Temat sak visi vit, “Munak kovi Natin Ahi anatin, kimeng kat ahat ekek vahiles vamai vahi veret am.”

Ka Iesu vit kesi mini vit, “!Vuo! Nirmumontei ven Tus Votut viteni vit,

'Meatin romoultei en anien enges.”(Dut 8:3)
Evus, Temat mulamun Iesu vina nesa en mari hou tai ka, en avong tas, rie lat kantri vasi keil ten out netan mini. Ka sak visi vit, “Keihoen ten out vasi keil enek asani mul en hek. Ka inau nakilea nisani min meatin sa koa iek vati masani mini. Sakini, nakilea nilinguk kihi asuv houlu kovalosil kati ka tounah keil koa mul ien hehi onom. Munak kiha netan minau enges, nisan tounah vasi keil enek minuk.”

Ka Iesu vit kesi mini vit, “Inau nirmumontei veni Tus Votut viteni vit,

'!Miheha netan min Iahova koa vi Ahi onami
ka mihelong kat kei enges!'”(Dut 6:13)
Evus, Temat kur Iesu va en out Serusalem, ka lingi mulomal en out tai nesa mok en hoi Eim Votut onen Ahi. En out enek, Temat viteni mini vit, “Munak kovi Natin Ahi anatin, kihut kihita netan vahotini keke Ahi ro ral minuk, 10 veni Tus Votut viteni vit,

'Ahi hemeng kat angelo keil onen
avating koe revi keik.'(Sam 91:11)
11 ka

'Keil ihati latuk hehina nesa en he,
hesakini kirmusavoi entei alom en ahat tai.'”(Sam 91:12)
12 Ka Iesu vit kesi mini vit, “!Vuo! Nirmumontei, veni Tus Votut viteni mun vit,

'Minasak vistei Iahova koa vi Ahi onami
keke mivahotini kei mul ral min kami.'”(Dut 6:16)
13 Navong Temat sak vis Iesu en sise vasi keil, lokoveini va rokol avong sav koa heles ahho tai keke vasak vis risi.

Iesu mum rohtoh en umen onen ka meatin keil ten out Nasaret aseseini b 

14 Navong Iesu lokovein out volvol, va ris en provins ten out Kaleli, ka keihoen onen Ninin Votut mai vilelau eni. Longlongien usili ka rahit out vasi keil koa mul vesesal en out enek. 15 Kei va en eim tahihiseien onen Siu keil ka visein meatin keil ien. Ka meatin vasi keil koa along usili avati lat isen.

16 Iesu mual rokol taon ten out Nasaret, out koa kei moul ien. En Sabat, va en eim tahihiseien suval koa lises mumoni. Ka navong mulomal vahuli Tus Votut onen Ahi, 17 keil asani mini tus koa tisien onen provet Aesea mul ien. Kei voei, votin out koa selusien enek mul ien ka vuli vit,

18 Ninin Votut onen Iahova mai sienau,
veni rie lat nau mahitehiten more longlongien min koakeil tounah one tovuol.
Kei sila nau mahiteni min koakeil amul en eim takeih,
akilea avasital rani.
Ka min koakeil mete var, ilelei ris,
min koakeil amul en hen mesav keil, imaluv iha.
19 Kei sila nau mahitehiteni keke Iahova rie lat avong koanek
vasan kataunien min meatin keil onen.”(Aes 61:1-2)
20 Navong vuli evus, Iesu koteh kat tus, san risi min meatin takataunien, ka rondan keke vahisein meatin keil. Navong meten meatin vasi keil en eim enek va kati, 21 viteni min keil vit, “Tus Votut onen Ahi koa milonge navuli min kami, kosa etin, selusien keil teni mai vi anatin.”

22 Navong meatin keil along mormore hihiseien keil koa sani min keil, keil vasi amuti manin ka avati lati en selusien one. Ka evus, tei en keil amundem maeni avit, “Ei, kei vi natin Siosep etin.”

23 Iesu viteni min keil vit, “Nakilea keke mihehiteni minau selusien matu koa vit, 'Dokta, kisak revi onom keil helamu,' veni iemi vati keke num en out enek, en meteimal kati onak, tounah vasi keil koa milonge namumoni en meteimal ten out Kapaniam keke mihekul anatin enau. 24 Ka naviteni anatin min kami, provet tovuol veah koa onen keil avakur revi en meteimal kati onen. 25 Mulamu, en avong onen provet Ilaetsa, ous romustei sua etel ka haf eris (3-1/2), ka meatin keil vasi, amai kat keil.
4:25 1 Ki 17:1
Ka en me-Isrel keil, vatina keil avi houlu.
26 Ka Ahi sila Ilaetsa vaha vamal ven vatina tai koa rovitei ten out Isrel. Kei ka en meteimal ten out Sarevat vesesal en taon ten out Saedon.
4:26 1 Ki 17:8-16 viteni keke vatina enek kul anatin keke Ilaetsa vi provet onen Ahi ka katauni.
27 Ka tamun, en avong onen provet Elisa, meatin houlu ten out Isrel, mesaien leporsi mul muas ave. Ka Elisa romumontei ave vatou ris, kei sak revis Neman ten out Siria koa rovitei ten out Isrel.”
4:27 2 Ki 5:1-14 viteni keke Neman kul anatin en selusien onen provet Elisa ka Ahi kulat mesaien rani.


28 Navong meatin keil koa amul en eim tahihiseien along selusien onen, keil vasi avuroh kati.
4:28 Siu keil avuroh kati veni Iesu mul viteni keke Ahi mul kataun tei en koakeil arvitei Siu veni akul anatin en provet keil onen mulin Siu keil kati.
29 Amea, ka aring lelati ran meteimal one ka amulamuni va vesesal en vali hou tai koa mul en hakot ten meteimal one veni ie vati avatue lat Iesu vamot vahita netan eni. 30 Ka Iesu, kei viles, mual va luhu en vangi meatin keil enek, ka lokovein keil keke vaha ris en sise onen.

Iesu vile lat ninin tisa tai ran meatin tai g 

31 Evus, Iesu va en meteimal ten out Kapaniam koa mul en provins ten out Kaleli. En Sabat, Iesu mul visein meatin keil ekonek. 32 Meatin keil amuti manin en hihiseien keil onen veni mul vit luvati suval koa kur aneite teni ka ven Ahi varei. 33 En avong enek, meatin tai koa ninin tisa mul ien mul en eim tahihiseien. Kei viso keih va ven Iesu vit, 34 “!Ei, Iesu ten out Nasaret! ?!Kovit kovoumon sa min komai!? ?Kumai keke kovou lin komai? !Inau nakileak, keik kovi Meatin Votut onen Ahi!”

35 Iesu musel keih va min ninin tisa enek vit, “!Kito raeng, ka kimea ran meatin ekek!” Ninin tisa mu lat meatin enek va netan en meten meatin vasi keil. Evus, mea rani ka tounah tovuol vasuti.

36 Meatin keil vasi amuti manin ka avis keil eris avit, “?Vati hihiseien sa enek? Meatin enek selus ral min keihoen, ka navong selus keih min ninin tisa keil, along kati ka alokovein meatin keil.” 37 Sakini, longlongien usil Iesu ka rahit out vasi vesesal en meteimal ten out Kapaniam.

Iesu sak revi meatin houlu h 

38 Navong Iesu lokovein eim tahihiseien en out Kapaniam, va en teim sen meatin tai, isen Saemon Pita. Navong rokol teim sen, longe keke avu ahin onen Saemon Pita, aven mutin ramat. Sakini avis Iesu vasak revi. 39 Sakini Iesu va veni ka musel kat mesaien enek vit, “!Mea rani!” Ka hatte tas, ahin enek longe tahos, mea, ka va mumon anien vahi ae.

40 Navong meteiai va netan ka Sabat evus, meatin keil akilea avoumon tounah. Sakini meatin houlu avous koakeil amesai en mesaien savsav keil uva ven Iesu. Kei ling hen en retai keil, ka sak revi keil vasi umai atahos. 41 Ka navong Iesu vile lat ninin tisa keil ran meatin houlu, avisohiso keih va mini avit, “!Keik kovi Natin Ahi anatin!” Ka kei ring koe keil keke anaselustei veni akilea kei vi Mesaea koa Ahi rie lati.

Iesu mul vihisei en eim tahihiseien keil i 

42 En visikon semau, Iesu va sasen en out volvol tai. Ka navong meatin keil alesi vuol, uva alekati. Navong avotini, asak visi avapeahi herlokoveintei keil. 43 Ka Iesu viteni min keil vit, “Niha nihitehiten more longlongien usil hiasuvien onen Ahi min meatin keil koa amul en out sav emun. Veni Ahi sila nau numai moumon vati umen koanek.”

44 Sakini, Iesu va en meteimal keil onen Siu keil
4:44 Navong amutis ris tus ten Luk en avong telamu, tei en keil amutisi avit, '... meteimal keil en provins ten out Sudea.' Teimun tesav amutisi avit, '... meteimal keil en provins ten out Kaleli.'
ka mul vitehiten more longlongien onen Ahi en eim tahihiseien keil one.

Copyright information for `PMA