Mark 1

Sion koa Rang Rindun Meatin Keil Sak Mesen Sise ven Iesu

Mak 1:1-8

Koanik vi more longlongien onen Iesu Kristo, Natin Ahi. Longlongien enek, vatte teni suval koa provet Aesea mutisi usil isei hesak mesen sise onen. Aesea mutisi vit,

“!Kitaengoni! Nisila eiloheh onak vasak revi sise venuk.
En out volvol, meatin enek hehisohiso hehit,
'!Sak revi sise ven Asuv heka ien!
!Houmon sise onen hemal!'”
1:3 Mal 3:1; Isa 40:3

Ven koanek, meatin tai, koa isen Sion va en out volvol ka visohiso min meatin vasi vit, “!Mihehiles moulien onami ran tisaen! Mihemaenau nitang rindun kami ven mivatie kilea keke miheha ris ven Ahi. Hesakini, methos onen hetahos eris en kami.” Ka meatin houlu vis houlu mok en provins ten out Sudea ka mari meteimal ten out Serusalem, ouva ven Sion. Avitehiten tisaen keil one ka kei rang rindun keil en Oaisal Sodan. Musin en eisin koa amumoni en hilin kamel (koa eisilin vuvu) ka mutoh eni.
1:6 Sakien onen Sion suval sakien keil onen provet Ilaetsa telamu. Lumusin vatte tas (2 Ki 1:8), sakini, meatin houlu amundemi Sion vi Ilaetsa koa moul eris ran matien.
Anien an vi kal ka suka koa suka bak keil amumoni en eivorohus.
Ka kei mul viteni min meatin keil vit, “Katau enau, hetamen tai hemai. Kei marite mok mulinau, narvinvintei suk makulat savat onen. Inau narang rindun kami en oai enges, ka kei, hetang rindun kami en Ninin Votut.”

Sion Rang Rindun Iesu

Mak 1:9-11

En avong enek, Iesu ka Nasaret en out Kaleli, ka Sion rang rinduni en Oaisal Sodan. 10 Ka navong Iesu mea ran oai, lele vina nesa ka les teilang mutah. Ka Ninin Votut muka mita netan ka rondan eni suval ame tai. 11 Ka rea tai ka en out nesa vit, “Keik, kovi natkuli. Ka inau, nasinau venuk.”
1:11 Isa 42:1


Iesu Va en Out Volvol ka Kur Sakvisien

Mak 1:12-13

12 Navong Iesu mea ran oai, Ninin Votut sila Iesu vina en out volvol, 13 ka kei ro en out enek rokol avong hanumau elu (40). En avong enek, Temat mul sakvisi. Ka Iesu ro en out enek ral min tirendan keil, ka angelo keil alei kat revi.

Avong Mai Iesu Voumon Umen Onen

Mak 1:14-15

14 Katau en avong aling Sion en eim takeih,
1:14 Sion rang rindun Iesu evus, mul mumon umen onen mulin sua tai. Ka evus, Asuv Herod ling Sion va en eim takeih.
Iesu va en out Kaleli ka vitehiten more longlongien koa ka ven Ahi.
15 Kei mul vit, “!Avong mal vinvin koa hiasuvien onen Ahi hemai hel ekok! !Mihehiles moulien onami ran tisaen, ka mihekur anatin en more longlongien koa naviteni min kami!”

Iesu Vise Lat Meatin Ehat Telvousili

Mak 1:16-20

16 Navong Iesu mul mual va en vali oai en out Kaleli, kei les Saemon Pita ka tunali Andiru. Keilu luvi meatin tasar mesauien ka lumul luson net onealu vita en oai. 17 Viteni min keilu vit, “!Lumai, milhousilnau! Kosa milsar mesau enges, ka inau nihisein kamil mukave milhesar meatin keil.” 18 Hatte tas, lumali time luling net onealu mules ka lumusil Iesu.

19 Iesu mual eva ka les Tiemes ka Sion, koan tata onealu Sepeti. Luro en vot ka lurili revi net onealu. 20 Navong les keilu, vise keilu vit, “!Lumai, milhousilnau!” Sakini, luvutahut en vot ka luva ran tata onealu ral min meatin toumien keil oneatel, ka luva lumusil Iesu.

Iesu Vile Lat Ninin Tisa ran Meatin Tai

Mak 1:21-28

21 Iesu ral min meatin onen telva en meteimal ten out Kapaniam. En Sabat, telva en eim ten hihiseien onen Siu keil ka Iesu mul vihisei ien. 22 Koakeil vasi amuti manin en keihoen ten hihiseien onen, koa rosuvaltei tiser keil ten mengkatien onen Mosis. 23 Ka rovitei tuetin, navong Iesu mul vihisei veah, meatin tai koa ninin tisa mul ien va neim en out enek. 24 Kei visohiso ka viteni, “?Iesu ten out Nasaret, kovit kovoumonsa min komai? ?Kovit kovou rasil lin komai? !Inau nakileak! !Keik kovi Meatin Votut onen Ahi!”

25 Iesu selus keih min ninin tisa enek vit, “!Konavertei! !Mea rani!” 26 Ninin tisa maleilei kat meatin enek, visohiso keih ka mea rani.

27 Ka koakeil vasi koa alesi, amuti manin eni. Amul aviteni min keil eris, avit, “?Asa keinek? !Koanek vi hihiseien hau tai koa keihoen mul ien! Kei sel kat ninin tisa keil esuk, ka along kati.” 28 Ka rovitei tuetin, longlongien usil asa Iesu mul mumoni ka vasi out Kaleli.

Iesu Mum Revi Meatin Houlu en Out Kapaniam

Mak 1:29-34

29 Ka navong Iesu keitel telmea ran eim ten hihiseien, kei ral min Tiemes ka Sion telmusil Saemon Pita keilu Andiru telva teim sealu. 30 Navong telva en out enek, aviteni min Iesu keke avu tisa onen Saemon Pita mesai, mul en avet veni aven mutin. 31 Iesu va veni, vuli kat hen ka rali lati mea. Hatte tas, mesaien vuol rani, kei longe tahos ka mumon anien aeatel.

32 En mendilah enek, navong Sabat evus ka meatin keil akilea avoum, alah koakeil amesai ral min keil koa ninin tisa mul en keil, ouva ven Iesu. 33 Sakini, meatin keil vasi en meteimal en out enek alah ruai rahit eim koa ro en. 34 Ka Iesu lah lat mesaien ran keil koa, ka vile lat ninin tisa keil ouvaha. Ka romaentei ninin tisa keil avaselus ven akilea kei vi Kristo.
1:34 Aneite ten isen 'Kristo' vi meatin tai koa Ahi rie lati ka tai koa kei vat kati en Tus Votut onen en avong telamu.


Iesu Va min Meatin Sav Keil

Mak 1:35-39

35 En visokon semau, out vong veah, Iesu mea ran keil, va en out tai koa kilea heto kei sa sen, ka mul vis. 36 Ka navong Saemon Pita ka teisav emun keil amea, amul alekat Iesu. 37 Ka navong alesi aviteni mini avit, “!Meatin vasi evati avalesuk!”

38 Ka Iesu viteni min keil vit, “Nakilea. Ka numai ven mailea mahiten more longlongien min meatin vasi keil. Rovaha en out sav.” 39 Evus, telva en out vasi en out Kaleli. Ka kei mul visein meatin keil en eim ten hihiseien onen Siu keil ka vile lat ninin tisa keil ouva ran meatin.

Iesu Lah Lat Mesaien Leporsi
1:40 Leporsi vi mesaien koa mumon hiliven meatin mul mat, mul sakini mul vo, ka mul mattot. Siu keil avit mesaien leporsi houlu mok mulin mesaien sav keil. Meatin koa kuri reingeingeni vatokol meatin etai. Heto sasen enges.
ran Meatin Tai

Mak 1:40-45

40 En avong Iesu keitel telmul veah en out Kaleli, meatin tai koa mesaien leporsi mul ien va ven Iesu, retengeiril mini, ka peahi vit, “Munak komaeni li, kokilea kovoumon hilivek vamai vato ris.”

41 Iesu enmahis meatin enek ka ling hen mul ien ka viteni, “!Mal! !Kito ris!” 42 Hatte tas, mesaien enek va rani ka aven muto varei.

43 Evus, Iesu selus keih imok mini mukok vit, 44 “!Konahitentei asa namumoni minuk min meatin sav! Kihas en Eim Votut, kihit lat keik min pris, ka kikur sanien votut koa Mosis viteni.
1:44 Lev 14:1-32
Hesakini, koakeil vasi ilea keke keik komuto.” Ka Iesu sila meatin enek va.
45 Ka navong va rani, mang vas ongon houlu ka viteni min meatin sav keil asa koa Iesu mumoni mini. Sakini, Iesu sakras vaha en out meatin keil alango ien. Mukos, rovatei mun en meteimal keil. Ka meatin keil aka soutin en out vasi umai avalesi.

Copyright information for `PMA