Mark 11

Asan More Masmasien min Iesu Navong Kistal en out Serusalem

Mak 11:1-11

Navong Iesu ka onen keil umai vesesal en out Serusalem, keil akistal en meteimal ten out Betfas vesesal en Hou Nei Olip. En out enek, Iesu sila meatin elu onen ka viteni min keilu vit, “Milheha en meteimal koa keisom. Navong milhekistal en out enek, milheles titan dongki tai asar kati mul en out enek koa meatin tovuol veah vatondan en eisilin. Milheluvati ka milhelehei hemai ekok. Ka munak meatin etai hehis kamil vensa milmumon tounah enek, milhehiteni keke asuv envati ka hervitei tuetin, hesan risi hemai.”

Sakini, luva lules titan dongki enek en vali sise, asar kati vesesal en voiteh ten eim tai. Navong lumul luluvati, meatin keil koa amul en out enek avis keilu avit, “?Vensa milluvat titi dongki keisom?”

Luvit kesi min keil suval koa Iesu viteni min keilu, ka alokovein keilu luva. Ka lukur titi dongki luva ven Iesu, lukuvin eisin onealu vina en eisilin titi dongki ka Iesu rondan eni. Navong Iesu mul mual en dongki, meatin keil houlu amul asak mesen sise onen voual ien. Keil koa amul avoein eisin one ka teisav amusah oumeil en vali sise ka aling revi en sise. Meatin keil koa amul amulamu ka koakeil akatau amul avisohiso,

“!Masmasien min Ahi!
11:9 !Hosana!

Ahi Asuv hetokol kat kei koa mai en isen!
10 Tokolkatien onen Ahi Asuv hel en hiasuvien koa vesesal hekistal,
koa mul en hen Asuv Houlu Deved, avu orer telamu!
!Masmasien hehina min Ahi en out nesa!”
11:10 Sam 118:25-26

11 Iesu kistal Serusalem ka va en Eim Votut. Lele ka rahit, lei vasin tounah keil. Ka veni meteiai mul vita netan, kei mea ris ral teindan elu (12) onen keil ouva varei en out Betani.

Iesu Selus Keih Vit Vatiai Tai Vamat

Mak 11:12-14

12 Out mulan, navong aka ris Betani, Iesu raengon amai kati. 13 Les vati fik mul keva neli, oute houlu. Ka mual va, valei vis heite. Navong va vesesal, les outes, ven rovitei avong teni vatekao. 14 Ka Iesu viteni min vati fik enek vit, “!Meatin hetovuol emun hean etai heiai eris ranuk!”

Ka teindan elu (12) onen alonge.

Iesu Likat Rasil Lin Meatin Houlu ran Eim Votut

Mak 11:15-19

15 Navong akistal en out Serusalem, Iesu va en Eim Votut ka mul likat rasil lin meatin keil koa amul avulhul ka asalem. Kei vou vilehiles avet onen meatin koa amul akekes en ahat ka out tatondanien onen koakeil asalem en ame. 16 Ka romaen etai meatin vakur tei tounah avaka pas teahu ten Eim Votut. 17 Ka sel kat keil vit, “Ahi viteni en Tus Votut vit,

'Eim mok ihise en 'Eim Tahisien'
onen meatin vasi keil ten out netan.'
11:17 Isa 56:7

Ka kami, mivilesi mai vi 'Eim Mon Tarhena Keil'.”
11:17 Jer 7:11


18 Ka navong asuv keil onen pris keil ka tiser keil ten mengkatien onen Mosis alonge, amul alekat sise koa vasakini avouas Iesu vamat. Ka keil ametaun Iesu ven vasi keil amuti manin en hihiseien onen.

19 Navong mendilah mai, Iesu ral meatin onen keil amea ris ran out Serusalem.

Hihiseien Usil Demkatien

Mak 11:20-26

20 En visokon semau, navong amual en sise, alei ris vati fik mukou tuai, oute vita rokol litei netan. 21 Pita rendem ris en tounah koa kur out ka viteni min Iesu vit, “!Tiser, kilesi! Vati fik koa koselus keih mini, mukou tuai.”

22 Iesu vit kesi min keil vit, “Mihekur demkatien en Ahi. 23 Anatin eli naviteni min kami, munak kami tai hehiteni min hou eke vamea ka vahita en atas, tounah koa visi, Ahi houmoni mini. Ka demkatien onen hekeih en asa koa visi. 24 Mukonek, naviteni min kami, navong mivis ven tounah tai, mihekur demkatien keke mikuri tuai, ka kei hesan tounah koa mivisi.

25 Ka navong kami tai mulomal vahis, ka mundem tounah tisa koa meatin sav mumoni mini, helokovein vurohien onen ka methos onen heha ris min meatin enek. Hesakini, Ahi Tamer ten out nesa, methos onen hel eni ven asa tisa kei mumoni. 26 [Munak methos onom tovuol en meatin sav, Ahi Tamer, methos onen sakras val en tounah tisa koa kumoni.
11:26 vahera Mak romutistei
]”

Hetetamen Keil Avis Iesu Usil Isei Maeni Voumon Umen Onen

Mak 11:27-33

27 Umai ris en out Serusalem. Ka navong Iesu mul mual neim en Eim Votut, asuv keil onen pris keil, tiser keil ten mengkatien onen Mosis, ka elda onen Siu keil umai veni. 28 Keil avisi avit, “?Vensa komumon tounah keil eke?
11:28 Keil avisi ven Iesu likat meatin keil ran Eim Votut nenganeh.
?Isei maeni minuk?”

29 Iesu vit kesi min keil vit, “Nihis kami suk en tounah tai. Ka munak mihitehiteni minau, nihiteni mun min kami isei maenau namumon tounah keil eke. 30 Alhit visi minau ?Isei keke maen Sion koa rang rindun meatin keil? ?Ahi vuo meatin enges ten out netan?”

31 Koanik sakin keil amul aselus rahiti min keil eris avit, “?Rehehiten sa? Munak rehehit 'Ahi maeni,' kei hehit, '?Ka vensa mirmundem kattei Sion?' 32 Ka rosakras rovahit, 'Meatin enges maeni' ven meatin keil eke amundem kat Sion vi provet tai onen Ahi.” Ka keil ametau meatin keil anavuroh kat keil. 33 Sakini, avit risi min Iesu avit, “Komai mereingeingeni.”

Ka Iesu viteni mun min keil vit, “Inau mun, nirvitentei varei isei maen tounah keil eke namumoni.”

Copyright information for `PMA