Mark 14

Hetetamen Onen Siu Keil Evati Avouas Iesu Vamat

Mak 14:1-2

Navong elu sesuk hetokol avong Siu keil amundem kat 'Avong keil ten Veret Is Tovuol Ien'
14:1 'Avong keil ten Veret Is Tovuol Ien: En sua vasi keil, avong outel (8) Siu keil mul kanian veret koa is tovuol ien vasakin keil amundem eris avong koa keil amea akalah asital ran out Isip (Eksodas 12:1-14).
koa amumon rohoni en 'Anien ten Mul Laui,'
14:1 Anien ten Mul Laui:Siu keil amumon Anien eke vasakin keil amundem eris usil avong koa angelo keil onen Ahi amu vini moeite vasi keil en out Isip. Ka moeite onen Siu keil armattei ven koa ran sipsip koa akas voiteh omon eni sakin Ahi mul laui en keil (Eksodas 12:15-20).
asuv keil onen pris keil ka tiser keil ten mengkatien onen Mosis alah ruai. Keil amul arun lekat sise koa ika suai ien ihuli kat Iesu ka uasi hemat.
Ka amul avit, “Rehermumontei en avong ten ale, ven meatin keil anoumontei rea.”

Ahin Tai Vouhou min Iesu

Mak 14:3-9

Navong Iesu mul veah en out Betani, mul kanian en teim sen Saemon koa mulamu mesaien leporsi
14:3 Mak 1:40 mul selus usil mesaien leporsi.
mul en hiliven. Ka ahin tai mai neim, kur oel koa vite tahos imok, ka mane teni va nesa.
14:3 Veite amumoni en ahat koa muoh koa avise en alapasta ka oel koa mul ien amumoni en litei ten vati nad.
Ka kiles lat meten ka mutahi en vatin Iesu vatie keke vouhou mini.
Koanek sakin koakeil amul en out enek avuroh ka amul arun kutut eni ral min keil eris, “?Vensa kei mul purun oel mukok? Munak kei hesani minir, rokilea rovamaen meatin tai vahuli en ahat vavinvin en asa koa meatin toumien tai mul kuri sua tai.
14:5 Mak vit 300 denarias koa suval 300,000 vatu.
Evus, rokilea rovasan ahat enek vaha min livere keil.” Ka aselus keih min ahin enek.

Ka Iesu vit, “!Alsokoveini! ?Vensa mimul mimumoni mini mukonek? Kei mumon more tounah minau. Livere keil ito hetal kami lises. Ka nengeis esuk mihehit mihekataun keil, mul esuk en kami. Ka inau, nirtotei hetal kami lises. Kei mumon tounah koa kilea voumoni. Ka navong mutah oel en avek, kei sak meseni ten tahinien. Anatin eli naviteni min kami, en out vasi netan koa ihitehiten more longlongien, ihiteni mun asa keke ahin enek mumoni minau. Ka hesakin meatin sav keil emun indem silat kei.”

Sudas Va Maen Iesu min Asuv Keil ten Pris Keil

Mak 14:10-11

10 Navong akanian evus, Sudas Eskariot, teindan elu (12) tai, va ven asuv keil onen pris keil vit vamaen Iesu min keil, avahuli kati. 11 Keil asi keil navong araengoni, ka avat kati mini avit ihuli. Sakini, Sudas mul lekat sise heka ien hemae lat Iesu min keil.

Asak Mesen Anien Ten Mul Laui

Mak 14:12-16

12 Navong Ale ten Veret Is Tovuol Ien mai, en visokon teni, teim sen Siu vasi keil amul asak mese avouas sipsip keil koa avani vatal Anien ten Mul Laui. Teindan elu (12) onen Iesu avisi avit, “?Out kave emvati mevasak mesen Anien ten Mul Laui ien?”

13 Sakini, Iesu viteni min meatin onen elu vit, “Milheha Serusalem, milhehisu min meatin tai mul vus veioai, milhousili. 14 Ka navong milhelesi va neim, milhehiteni min meatin koa eim onen milhehit, ‘Tiser onomai envati vailea keke out kave hean Anien ten Mul Laui vatal meatin onen keil ien.’ 15 Hevus, meatin ten eim hekur kamil mithehina, hetien out koa mariso ka sak revi tuai. Milhesak mesen anien en out enek.”

16 Sakini, keilu luva Serusalem ka lules tounah vasi suval koa Iesu viteni min keilu. Ka lusak mesen Anien ten Mul Laui en out enek.

Iesu Kanian Ekor ral min Meatin Onen Keil

Mak 14:17-21

17 En vongien enek, Iesu ral min meatin onen keil ouva en out ten anien. 18 Ka navong amul akanian ruai, Iesu viteni min keil vit, “Anatin eli naviteni min kami, tai en kami koa mul kanian ral minau ekok, kei varei hesa lat inau niha en hen meatin tatisa keil”.

19 Koanek sakin meatin onen keil alonge tisa, ka keil avis Iesu, tai vis ka teisav, avit, “?Konahitentei konahit inau?”

20 Ka Iesu vit kesi vit, “Tai en kami koa romul rokanian ruai ral minau. 21 Ka anatin keke Natin Meatin hemat, hesuval koa Tus Votut viteni. Ka hetisa suk min kami tai koa hemae lati. Meatin enek, tahos imok kei vahit avarvasitei, veni Ahi hesan mahien mini hemariso mok.”

Anien Votut Onen Asuv Iesu

Mak 14:22-26

22 Navong amul akanian, Iesu kur veret ka san masmasien veni. Evus, vul vahasi ka riti min teindan elu (12) onen ka viteni min keil vit, “Mihekuri miheani, koanik vi avek.”

23 Evus, Iesu kur veiuaen, san masmasien veni, ka sani min keil ka amuni, tai vis ka teisav. 24 Ka viteni min keil vit, “Uaen koanik vi rak vasakin hatkatien hau onen Ahi vakeih ka vamai vahi anatin.
14:24 Eksodas 24:6-8. Mosis mutah ran buluk en out ten sanien vasakin hatkatien matu koa meatin keil ten out Isrel amumoni ral min Ahi vamai vakeih ka vahi anatin.
Rak houe hesakin meatin houlu ikur moulien.
25 Anatin eli naviteni min kami, nirmuntei mun uaen koanik, hetokol avong koa nimun ris uaen hau en Meteimal onen Ahi.” 26 Akanian evus, amusau en souen tai. Evus, asital ka avina en Hou Nei Olip.

Iesu Vit Meatin Onen Keil Ilohosai rani

Mak 14:27-31

27 Navong arokol Hou Nei Olip, Iesu selus min meatin onen keil vit, “Kami vasi mihesokovein inau hesuval koa Ahi viteni en Tus Votut koa vit,

'Munak nuas meatin
koa losil kat sipsip keil,
keil vasi iloh rasil.'
14:27 Sak 13:7

28 Ka navong nimoul eris ran matien, nilamu en kami niha mau en out Kaleli.”

29 Pita mea selus vit, “!Nahi koakeil eke isokoveinuk, ka inau, nasakras!”

30 Ka Iesu vit risi mini vit, “En vongien enek, out hermulantei mau, ka ato herkokorattei mau hatte helu; ka keik, kihiteni hatte hetel keke korkileatei nau.”

31 Ka Pita viteni keih tamun vit, “!Vuo, hermuktei nek! !Inau, nimat hetal minuk! !Inau, nasakras mahiteni keke mahit inau narkileatei keik!” Ka keil vasi aviteni vatte tas.

Hisien Onen Iesu

Mak 14:32-42

32 Iesu ral min meatin onen keil, ouva en out koa avise en ‘Ketsemane’ ka viteni min keil vit, “Mihetondan ekok, mihetosin nau. Maha mau, mahis.”

33 Ka kur Pita, Tiemes ka Sion, telmusili. Iesu envon ka mundemko houlu. 34 Ka viteni min keitel vit, “Demkoen vil en tinok, vit vahonet inau. Mitheto ekok, mithele hetal minau.”

35 Iesu mual ran keitel havivis, retengeiril va netan, ka vis Ahi hekulat avong takeih enek rani. 36 Ka kei viteni vit, “!Abba, itet! Kokilea kovoumon tounah vasi, konoumontei li nau nanalong mahien. Ka heisav enges, kumoni hesuval koa keik emvati, hersuvaltei koa inau ekvati.”

37 Navong Iesu muris votin keitel, telmatil. Ka viteni min Saemon Pita vit, “?Pita, komatil? ?Kosakras kovatos kovaleh avong vahi havivis? 38 !Kamitel, telmea! !Telhis keke mithermottei navong sakvisien keil hemai en kamitel. Tinomi maenis voumoni, ka avemi mah.”

39 Iesu muris va, ka vis en vati hisien koa vis eni mulamu. 40 Ka navong muris mai ven keitel, votin keitel telmatil eris. Telsakras telvahuli kat metalong. Sakini, telmemou, telreingeingen tounah koa telhehiteni mini.

41 Ka navong Iesu muris hatte etel eni, viteni min keitel vit, “?Mitmatil eris? ?Mitmuseh veah? !Vus tuai! ?Mitlesi? Ekek, avong mai avasa lat Natin Meatin vaha en hen meatin tatisa keil. 42 !Telmea, tovaha! Meatin koa vasa latnau keie, mai tuai.”

Avuli Kat Iesu

Mak 14:43-52

43 Navong Iesu mul semau selus, meatin onen tai mai kistal, vi Sudas. Ka meatin keil amusili umai, alah kat mari naef ka ai tavaeen keil. Umai musil rendemien onen asuv keil onen pris keil, elda keil ten out Serusalem ka tiser keil ten mengkatien onen Mosis. 44 Sudas vat kati min keil vit, “Meatin koa nimusi, koanek keke mihehuli kati, mihesar kati ka mihekuri miheha.”

45 Ka navong Sudas va vesesal ven Iesu, vise vit, “!Tiser!” Evus, kav kati ka musi en vivin. 46 Sakini, meatin keil enek avuli kati.

47 Ka tai en keil vati mul vesesal en out enek, leh lat mari naef onen ka musah koteh ralingen eisisil onen asuv houlu onen pris keil.

48 Ka Iesu vis meatin keil enek vit, “?Vensa mimai milah kat naef ka ai tavaeen keil? ?Mimai mivahuli katnau vasuval navi tarhena tai? 49 En avong vasi navisein meatin keil en Eim Votut vesesal ven kami, ka mirvuli kattei nau. Ka tounah koa mimumoni sakin asa koa Tus Votut viteni usil inau, hemai hehi anatin.”

50 Ka teindan elu (12) keil vasi onen Iesu alokoveini ka aloh rasil.

51 Ka litetai tai koa kav koe en kaliko tas, muleh musil Iesu. Ka navong meatin keil asasa avuli kati, 52 kuvi lat kaliko mules ka muloh hon enges.
14:52 Litetai koanek, amundemi avit Mak koa mutis tus eke.


Hetetamen Keil Akur Iesu en Kot Avahisi

Mak 14:53-65

53 Ka meatin keil koa avuli kat Iesu akuri va en asuv houlu onen pris keil. Ka asuv keil onen pris keil, ral min elda keil ten out Serusalem, ka tiser keil emun ten mengkatien onen Mosis alah ruai en out tas ekonek. 54 Ka Pita mul leh lini musil keil va vio ... arokol teahu ten teim sen asuv houlu onen pris keil. Kei rondan ral min avkeih keil koa alosil kat teim enek, ka mul mutai en ahang.

55 Asuv keil onen pris keil ka hetetamen sav keil emun koa aro en out ten kot enek, amul alekat meatin koa voun kat Iesu en tisaen, vasakini avouasi vamat. Ka arvotin etai meatin. 56 Meatin houlu aviten liluvosien va kat Iesu, ka en selusien one, keil armaitei varei en rendemien vatas.

57 Ka en avong enek, meatin tei, amulomal aliluvos eni avit, 58 “Metlonge kei vit hou rasil lin Eim Votut koa meatin keil amumoni. Ka en avong etel, houm kes tamun koa meatin tovuol houmoni.” 59 Ka en selusien somok enek, tunien one tateisav.

60 Sakini, asuv houlu onen pris keil mulomal luhu en keil ka vis Iesu vit, “?Tounah tovuol kovahiteni? ?Kolong selusien somok koa aviteni va katuk?” 61 Ka Iesu mules ro raeng, roviten etai selusien.

Ka asuv houlu enek vis risi vit, “?Keik kovi Kristo koa Ahi rie lati keke vat kati minir? ?Kovi Natnali?”

62 Ka Iesu vit risi vit, “Inau keinek. Ka hervitei tuetin,

'Natin Meatin hetondan
en usite matu onen Ahi ten Keihoen,
koa hesan houhouen ka keihoen mini.
Ka mihelesi hemai hetal mahmah ten out nesa.'”
14:62 Sam 110:1; Dan 7:13

63 Asuv houlu onen pris keil tin tisa houlu ven selusien onen Iesu. Sakini, rali vas eisin onen
14:63 Tus Votut ling mengkatien en asuv ten pris keil vit asakras avatali vas etai eisin one navong along tisa (Lev 10:6; 21:10).
ka musel vit, “?!Vensa romul rolekat selusien sav koa vaha kati!?
64 ?Mitlonge? !Kei selus va kat isen Ahi! Kei rali koteh mengkatien orer. ?Rendemien onami mukave?” Keil vasi umai en rendemien tas keke Iesu hemat.

65 Ka koakeil amutiv kat Iesu, apar koe meten ka amul amuti. Keil avit, “?Ei provet, hit visi, isei mutik?” Evus, avkeih keil ten eim enek akulat Iesu ran keil, ka keil esuk amuasi.

Pita Vit Kei Rokileatei Iesu

Mak 14:66-72

66 Navong Pita mul semau en teahu, atouli toumien tai onen asuv houlu onen pris keil mai. 67 Ka navong les Pita mul mutai en ahang, kei lei kati keih ka rie lati vit, “!Keik kamil Iesu ten out Nasaret!”

68 Ka Pita muun ka vit, “Rovitei anatin. Inau narkileatei tounah koa komul koviteni.” Ka kei mea mual va en meteau. Hatte tas, ato kokorat.

69 Ka atouli enek lei ris Pita ka viteni min meatin keil koa amul en out enek vit, “!Meatin ekek vi meatin tai en keil!”

70 Pita muun eris vit, “!Vuo! Rovitei inau.”

Rovitei tuetin, meatin sav keil emun aviteni min Pita avit, “Keik tai en keil keinek. Selusien onom suval koan Kaleli.”

71 Ka evus, Pita selus keih min keil ka vit, “!Inau narkileatei varei meatin koa mimul miviteni. Ka Ahi hesan mahien minau munak selusien onak vi luvosien!”

72 Mal en hati avong enek, ato kokorat hatte elu ris. Ka hatte tas, Pita mundem ris asa koa Iesu viteni mini vit, “Ato herkokorattei mau hatte helu, ka keik kihiteni hatte hetel korkileatei nau.” Sakini, Pita envon ka murang.

Copyright information for `PMA