Mark 2

Iesu Sak Revi Meatin Tai koa Usiven Mat

Mak 2:1-12

Avong vahis muli, Iesu muris va en meteimal ten out Kapaniam, ka keil ten out enek alonge keke ro teim tai. Keil houlu umai asien teim enek, sakini out mutikoe neim ka meatin houlu mun amules arapei hae en voiteh, ka Iesu mul visein keil en selusien onen Ahi. Navong Iesu mul semau vihisei, meatin ehat telmai telvou kakan tai koa usiven mat, ral min vulin. Ka ven koan meatin keil avi houlu, telsakras telvakur tueatel vaha min Iesu. !Sakini, telvousi vina en hoi eim koa vi vetavet ka telvoulat hatte tai varei en out koa Iesu ro mal ien! Telrutun tueatel vita ka vas meatin keil koa amul en out enek. Ka navong Iesu les asa telmumoni, lei kilea demkatien oneatel ka viteni min meatin enek vit, “Tuak, kosa, Ahi rolestei mun vatisa enuk ven tisaen keil onom.”

Ka navong tiser keil ten mengkatien onen Mosis koa amul arondan en out enek along selusien koa Iesu viteni, amurendem en rendemien one avit, “?Vensa kei run mukok? ?Kei enga mundemi kei vinvin suval Ahi? !Ahi tas kilea valah lat tisaen!”

Navong amundemi mukok, Iesu kilea ka viteni min keil vit, “?Vensa mimul mirendem en tounah enek? ?Maes minau keke nihiteni min leimesai eke keke 'Nikulat tisaen onom,' vuo nihiteni mini nihit, '!Mea! Lum lat vulum ka ha teim'? 10 Ka ven koa ekvat mivailea keke Natin Meatin kilea vakulat tisaen en out netan, mivales koanik eke.” Ka Iesu viteni min leimesai vit, 11 “!Mea! Lum lat vulum ka ha teim.”

12 Hatte tas, meatin enek ravul mea, lum lat vulin ka mea sital ran keil. Ka navong meatin keil koa amul en out enek alesi, amuti manin ka amasmas Ahi veni. Amul arun eni avit, “!Ekovei! !Rorles etaili tounah va mukok!”

Iesu Vise Livae (koa isen tamun Matiu)

Mak 2:13-17

13 Navong tamun, Iesu va ut en mari oai ten out Kaleli. Tali meatin keil umai aka rahiti, ka kei mul visein keil. 14 Ka navong mul mual va, visu min meatin tai koa mul kur takis ran meatin keil en titi eim mon, isen Livae, natin Alveas. Ka Iesu vise, “!Amai! !Usil inau!” Ka kei ling umen onen mules ka musili.

15 Evus, en mendilah, Iesu ral meatin onen keil amul akanian en teim sen Livae. Meatin houlu ten takis ka meatin tisa keil, amul akanian ral min keil ven houlu en keil emun amusil kat Iesu. 16 Ka navong tiser tei ten mengkatien onen Mosis, koa avi Farasi emun, ales Iesu mul kanian ral min meatin keil ten takis ka meatin sav keil koa arendem tisa en keil, amuti manin. Avis meatin keil onen Iesu avit, “?Vensa kei mul kanian ral min vatte meatin tisa keil koa mukok?”

17 Ka Iesu raengon selusien one ka vit kesi min keil vit, “Meatin keil koa ave tahos arvatei avales dokta tai, ka koakeil amesai, keil ouva avalesi. Narmaitei mahise meatin keil avit moulien one mal tuai avamai avousilnau. Vuo, numai ven meatin keil koa akilea atisa.”

Meatin Keil Avis Iesu en Sakien koa Tasokovein Anien Ien ven Hisien
2:18 Meatin tai kilea vasokovein anien ven envat hisien keil onen hekeih imok ka ven vatte rendemien keil mukok: (1) amul amasmas Ahi; (2) amundemko ven tisaen one; (3) amurang ven meatin tai mat; (4) ven mari avong tai; (5) vuo amul avis Ahi veni voumon tounah tai min keil.

Mak 2:18-22

18 En avong tai, meatin keil onen Sion koa rang rindun meatin keil ka Farasi keil amul asokovein anien. Meatin keil umai ka avis Iesu avit, “Meatin onen Sion ka Farasi keil asokovein anien, ka meatin onom keil armumontei. ?Vensa?”

19 Iesu vit kesi min keil en tatavolien tai vit, “Navong meatin tai vatetalihe, meatin keil koa umai ven mari ale enek, asi keil veni. Sakini, asakras avasokovein anien navong kei ro veah ral min keil. 20 Ka navong mul mai keke kei hevuol ran keil. En avong enek, keil isokovein anien ven ilonge hetisa.”

21 Ka Iesu vit risi min keil en tatavolien tamun vit, “Meatin etai sakras vatili koe eisin matu en soke eisin hau. Veni navong akasi, hatte koa heite hau mai sim kati ka hetali vas koa heite matu, hesakini hemahoi hemariso suk. 22 En vati sakien enek, meatin etai sakras vatah uaen koa heite hau
2:22 suval sakien koa amutah si veine va en veioai koa heite matu koa hetatahou ka hesipasi.
vaha en veite matu koa amumoni en hiliven sipsip veni kei keih tuai. Uaen enek hetatahou ka hesipas veite enek, hesakin uaen enek houele. Hesakini, uaen enek koa heite hau heha mok en veite koa heite hau veni kei memerau, kilea vatahou.”
2:22 En tatavolien koanik, Iesu vit hihiseien hau onen teisav ran hihiseien matu keil onen Siu keil.


Avis Iesu en Usite ten Sabat

Mak 2:23-28

23 En Sabat tai, Iesu ral meatin onen keil amual ouva aka vas ah tai ten uit
2:23 Amumon uti uit vi pulaoa ten veret.
ka amul alah utite, akokoa, ka amul akani.
24 Ka Farasi oteta keil alesi ka avis Iesu avit, “?Vensa meatin onom keil amum en Sabat? Umen enek rali koteh mengkatien onen Mosis.”
2:24 Deu 23:25


25 Ka Iesu vit kesi min keil vit, “?Kami mirkileatei asa koa Deved ral meatin onen keil amumoni navong amai kat keil, ka anien ae tovuol? 26 En avong enek, Abiatar vi asuv houlu ten pris keil, ka Deved va neim en Eim Votut ka visi ven veret koa vi votut, koa pris keil enges ten Eim Votut akilea avani. Ka Abiatar maeni ka Deved kani ka riti mun min meatin onen keil akani.”
2:26 1 Sam 21:1-6


27 Iesu vit vasi min keil vit, “!Ahi mumon Sabat keke vakataun meatin keil! Kei romumontei meatin keil ven koa avakataun Sabat. 28 Sakini, Natin Meatin vi houlu mok mulin Sabat.”

Copyright information for `PMA