Mat 12
a12:1 Mak 2:23-3:6; Luk 6:1-11
 
Mat 12
c12:22 Mak 3:20-30; Luk 11:14-23; 6:43-45
 
Mat 12
e12:38Tunien enek mul en Mak 8:11-12; Luk 11:24-26,29-32
 
Mat 12
f12:46 Mak 3:31-35; Luk 8:19-21
 

Matthew 12

Iesu Visein Meatin Keil Usil Sabat a 

En avong enek, avong ten Sabat emai. Ka Iesu ka meatin keil onen amual koteh ah tai ten uit. Navong amul amual, meatin keil onen, amai kat keil, sakini amul alah uti uit keil ka amul akani. Ka navong Farasi keil alesi, aviteni min Iesu avit, “?Kolesi? Asa koa meatin keil onom amumoni mul rali koteh mengkatien keil ten Sabat.”

Ka Iesu vit kesi min keil vit, “?Mukave? ?Kami mirvulitei asa asuv houlu Deved ka meatin onen keil amumoni navong amai kat keil? Deved va neim en Eim Tavolin onen Ahi ka alah veret votut koa pris keil enges akilea avani. Ka Deved ka meatin keil onen akan veret enek, avaseini keke amul arali koteh mengkatien tai onen Ahi. ?Ka mukave? ?En out sav, mirvulitei keke en Sabat vasi keil, pris keil koa amum en Eim Votut amul arali koteh mengkatien ten Sabat, ka en meten Ahi armumontei tisaen?
12:5 Nam 28:9-10
Ka kosa, meatin tai ro ekok koa vi houlu mok mulin Eim Votut onen Ahi. Tus Votut mul viteni vit,'Ekrovatei sanien votut keil enges onami, ka ekvati mok keke emihemahis meatin sav keil.'(Hos 6:6) Munak mikilea aneite ten selusien koanek, mivarsantei selusien takeih min koakeil armumontei tounah koa tisa. Meatin keil onak armumontei tisaen veni amusil kat inau, Natin Meatin, koa navi houlu mok mulin Sabat.”

Evus, Iesu ka onen keil aloh kovien out enek ka uva neim en eim tahihiseien onen Siu keil. 10 En out enek, meatin tai mul koa hen kalkali. Ka meatin oteta keil emun amul en out enek ka evat avaselus karen Iesu en tounah. Sakini keil avis Iesu avit, “Kihiteni min komai. ?Mengkatien onen Mosis maeni keke avasak revi meatin tai en Sabat?”

11 Iesu vit kesi min keil vit, “?Mukave? ?Munak tai en kami, sipsip osen tai, ka mot vita en avul en Sabat, houmon sa? Kei heha ka heleh lati rani. 12 Ka meatin tai vi tounah koa hetetamen imok mulin sipsip tai. Sakini Mengkatien orer maen ir rovoumon sakien tahos keil en Sabat.”

13 Evus, kei viteni min meatin koa hen kalkali vit, “Kitea en hem.” Sakin kei mutea en hen ka mai ris tahos suval hen tateisav.

14 Ka Farasi keil uva hae ka arun lekat sise koa akilea avouas Iesu vamat ien.

Iesu Vi Eisisil Toumien koa Ahi Rie Lati

15 Ka Iesu kilea en rendemien one; sakini kei loh kovien out enek. Ka marmari vangi meatin keil amusili ka Iesu sak revi koakeil vasi amesai. 16 Ka kei meng kat keil keke anahitentei tounah koa mumoni min meatin sav keil. 17 Kei mumon tounah enek vasakin asa koa Ahi viteni ka en provet Aesea vamai vahi anatin koa vit,

18 “Koanik eisisil toumien onak koa narie lati,
envatien onak mul ien ka nasi nau houlu mok veni.
Nisien kati en Ninin onak,
ka kei hehitehiten maluen onen Ahi min meatin vasi en out netan.
19 Kei herseltei hetal min meatin sav vuo hermakultei.
Meatin tovuol valong ren vaha nesa en sise.
20 Ven enmahisien, koakeil arkeihtei,
kei hermumontei hekeih min keil.
Ka koakeil amemerau,
herpuruntei keil.
Kei heles houm hemukonek
hetokol avong koa hesakin sakien ten maluen helin sakien tatisa keil.
21 Ka vangi meatin vasi keil ten out netan
iling desien one eni.”(Aes 42:1-4)

Farasi Keil Avise Iesu en Temat c 

22 Evus, meatin keil koa akur meatin tai va min Iesu. Meatin enek, meten var ka sakras vaselus veni ninin tisa mul ien. Ka Iesu sak revi ka meatin enek mai lele ka selus. 23 Meatin keil koa alesi, amuti manin ka avit, “?Vahesa meatin enek vi kei koa hekistal heka en vatiamal onen asuv houlu Deved koa Ahi vat kati vit hesani hemai?”

24 Ka navong Farasi keil araengon selusien onen meatin keil aviteni min keil avit, “Ei, meatin enek kilea vahile lat ninin tisa keil ral min keihoen koa Belsepul,
12:24 'Belsepul' vi isen tisa onen Temat koa aneite teni vi 'Asuv onen angolu keil.'
asuv onen ninin tisa keil, mul sani mini.”

25 Ka Iesu kilea en asa keil amul amundemi. Sakini kei viteni min keil vit, “Munak meatin keil onen asuv houlu tai amumon rea min keil eris, keihoen onen asuv houlu enek hevuol rani. Ka sakien enek vatte tas en taon vuo teim tai. Munak meatin keil teni ariti vas keil ka uvae kat keil eris, meatin keil enek ipurun taon one ka vatiamal one. 26 Sakini, munak Temat mul vile lat onen keil, kei mul riti vas keihoen onen kei eris. Ka hemukonek, hiasuvien onen sakras valomal vakeih. 27 ?Ka munak Belsepul mul san keihoen minau mahile lat ninin tisa keil, mukave en meatin keil onami koa keil emun amul avile lat ninin tisa keil? ?Keil amumoni ral min keihoen onen sei? Sakini, umen onen meatin keil onami enges mul rie lati keke selusien keil onami romaltei. 28 Ka munak namul navile lat ninin tisa keil ral min keihoen koa Ninin onen Ahi mul sani minau, koanek mul rie lati keke hiasuvien onen Ahi mai kistal en kami tuai.

29 “Ka nihit kilea min kami hetal min tatavolien tai. Tarhena tai sakras vaha neim en teim sen avkeih tai navong kei ros teim. !Vuo! Helamu, heha hepar kat avkeih enek. Evus, kilea suk vahenan tounah keil en eim onen.

30 “Koakeil arkapiltei vatal inau, keil uvae kat inau. Ka koakeil arkatauntei nau malah vituain meatin keil vasuval alah vituain sipsip keil, keil alikat rasilin keil. 31 Ka naviteni min kami, Ahi kilea valele vatahos eris en meatin koa mumon tisaen tateteisav keil vuo selus karen Ahi vuo tounah teisav. Ka meatin koa selus kekar va kat Ninin Votut, Ahi sakras emun valele vatahos eni. Anatin, Ahi hesan vasi mahien onen mini. 32 Anatin, koakeil aselus tisa va kat nau, Natin Meatin, Ahi kilea valele vatahos eris min keil. Ka koakeil aselus tisa va kat Ninin Votut, Ahi herleletei hetahos min keil en avong kosa, vuo en avong keil koa hemai.

33 “Munak vatiai tai tahos, heite teni hetahos. Ka munak vatiai tai tisa, heite teni hetisa. Heiai koa vatiai tai mul soni mul rie lati keke vatiai enek tahos vuo tisa. 34 !Kami mivi vangi amot tisa keil koa mimul mirili vini meatin keil en ongomi! ?Kami koa mivi meatin tisa keil, hemukave suk miheilea miheselus en tounah koa tahos? !Misakras! Veni meatin mul selus en tounah koa mul en tin. 35 Meatin koa tahos, tin vilelau en rendemien tetahos, sakini mul selus en tounah koa tahos. Ka meatin koa tisa, tin vilelau en rendemien tatisa, sakini mul selus en tounah koa tisa. 36 Naviteni min kami, en Avong koa ilei revi usite vasi onen meatin keil, Ahi heleka en selusien varu keil vasi meatin keil aviteni ka hesan mahien min keil veni. 37 Anatin, hetal min selusien keil onami enges, Ahi hehothot eni keke kami mimal vuo mikalkali ka hesan asa koa mal min kami housili.”

Tiser Keil ten Mengkatien onen Mosis ka Farasi Keil Avis Iesu Voumon Etai Merikel e 

38 Evus, tiser otetai keil ten Mengkatien onen Mosis ka Farasi keil umai ven Iesu ka avit, “Tiser, emaivati mevalesuk kovoumon etai merikel.”

39 Ka Iesu vit kesi vit, “Kami meatin keil ten avong kosa, emivati mivales etai merikel keke mivakul anatin enau eni. Anatin, emivati mivalesi veni mikalkali ka milokovein Ahi suval ahin tai koa loh kovien meatin kati onen keke vamaen kei min meatin sav. Ka nirmumon etai merikel mivalesi, tanges varei mihelesi koa hehi merikel onen provet Siona. 40 Veni suval provet Siona ro en vangen mari mesau meneai rokol vongien avong etel (3), en vati sakien enek inau, Natin Meatin, emun nito en houitan ten matien meneai ka vongien avong etel (3). 41 En Avong koa ilei revi usite vasi onen meatin keil, meatin keil ten out Nineve ilomal ka iselus heha kat sakien onen meatin keil ten avong kosa. Anatin, keil iselus heha kat kami veni navong keil koa arvitei Siu along selusien onen Ahi koa provet Siona vitehiteni min keil, aviles ran tisaen keil one. Ka kosa, tai koa houlu mok mulin Siona ro ekok. 42 Anatin, en Avong koa ilei revi usite vasi onen meatin keil, asuv houlu ten out Seba koa vi ahin helomal ka heselus heha kat meatin keil ten avong kosa. Veni kei ka en out tai koa soutin vis soutin keke vamai vataengon meteisauen onen asuv houlu Solomon. Ka kosa, tai koa vi hetetamen imok mulin Solomon ro ekok.

43 “Munak ninin tisa mea ran meatin tai, kei va en out tames valekat out tasehien keke vato ien. Ka munak herhotin etai out vato ien, 44 hehiteni min kei eris hehit, 'Maha ris teim onak koa naloh kovieni.' Ka navong hemai heha ris eni, kei hehotini keke eim enek, ninin sav keil tovuol ien, amuteasi tuai, ka aling revi tounah keil koa mul ien. 45 Sakini, kei heha ka hekur ninin oulu (7) koa atisa mok helin kei. Ka keil iha neim ka ito en out enek. Eim enek vi meatin tai, ka keil isakin moulien onen meatin enek hetisa mok helin koa mulamu. Koanik asa koa hekistal en kami, meatin tatisa keil ten avong kosa.”

Iesu Vit Lein Isei vi Tunali ka Mama Onen f 

46 Navong Iesu mul semau selus min marmari vangi meatin keil, tunali keil ka mama onen umai. Umai avatimal hae ka avit avaselus vatal min Iesu. 47 Sakini meatin tai mai ven Iesu ka vit meseni mini vit, “Mama onom ka tumali keil amul amulomal hae, ka evati avaselus vatal minuk.”

48 Ka Iesu vit kesi mini vit, “?Isei vi mama onak? ?Isei vi tuak keil?” 49 Ka rie ka rahit meatin keil onen ka vit, “?Kolesi? Koakeil ekek avi mama onak ka tuak keil. 50 Veni meatin koa mumon asa koa Tata onak en out nesa envati, kei vi tuak ka ahinkuli ka mama onak.”

Copyright information for `PMA